Giuseppi Pitrè
Giuseppi Pitrè (Palermu, 21 di dicemmiru 1841 - 10 di aprili 1916) fu un sicilianu allittratu celibbri, supratuttu pû sò travagghiu nta l'area dû folklori sicilianu. Avìa fattu li soi studî nnâ midicina, ma si ntrissau ô folklori di l'isula nta ogni aspettu e cu granni didicazzioni. Pitrè ideau e realizzau lu "Museu etnograficu sicilianu", chi asisti ancora oi 'n Palermu, e unni cugghìu tuttu chiddu chi attruvau supra la cultura dû sò pòpulu.
Ntra lu 1871 e lu 1913 pubbricau la Biblioteca delle tradizioni popolari siciliane chi cumprenni vinticincu vulumi. (Viditi st'asempiu nicu dû vulumi IV: Folklori:Tutti Semu). Stu nzemi di nuvelli, liggenni, custumi, canti, pruverbi, joca e stori, pâ prima vota, difiniu la natura e li cunfini dû folklori sicilianu.
Ntô libbru Fiabe, novelle e racconti popolari sicilani trascrivi certi cunti e fàuli pupulari di l'èbbica, tra cui li cunti di Giufà.
N'autra opra ppi cui Pitrè veni canusciutu è pâ Grammatica Siciliana (suttatitulata: un saggio completo del dialetto e delle parlate siciliane). Stu libbru (pubbricatu ntô 1875) nun veni titulatu pricisamenti picchì la maggiuranza dû libbru nun si occupa specificu dâ grammatica siciliana. Lu libbru havi tri parti:
- Teoria dei suoni, o la tiuria dî soni, chi si tratta supratuttu dî canciamenti dî soni tra lu latinu e lu sicilianu;
- Teoria delle forme, o la tiuria dî formi. Sta parti si tratta bona e bonè dî formi grammatichi dâ lingua siciliana; e
- comu n'appendici, la littiratura siciliana (ma sulu chidda scritta ntô talianu).
Puru siddu sta grammatica veni scritta ntô 1875, ancora riteni pirtinenza oi pû studiu dû sicilianu (viditi Cumpenniu Stilisticu).
Òpri[cancia | cancia la surgenti]
- Biblioteca delle tradizioni popolari siciliane, 25 vulumi pubbricati ntra lu 1871 e lu 1913
- Fiabe, novelle e racconti popolari sicilani
- Grammatica Siciliana - un saggio completo del dialetto e delle parlate siciliane, 1875
- Le storie di Giufà
- Proverbi Siciliani
