Vicenzu De Simone
Vicenzu De Simone (Villarosa , 19 di nuvèmmiru 1879 – Milanu, 12 aprili 1942) fu un pueta ca cumpunìa 'n sicilianu.
Avìa deci anni quannu tutta â famigghia si trasfirìu a Catania e ccà fici tutti li scoli nzinu a la làuria 'n midicina, ma li vacanzi si li passava a Villarosa, ca, macari quannu si nni ivu a fari lu mèdicu a Milanu, eppi sempri ntô cori e ntê sò puisìi e ntê prosi cuntava a cantava di li biddizzi dô sò paisi e dâ Sicilia. Ntâ sò casa milanisa s'arricugghèvanu tutti li megghiu ngegni siciliani c'abbitàvanu nta ssa cità lummarda e la sò casa era cunsacrata a la sicilianità.
Li sò puisìi foru traduciuti di Armand Goduy 'n francisi. Li sò òpiri sunnu carattirizzati dâ nustargìa pâ sò terra.
A iddu additicaru la scola mèdia di Villarosa (EN).
Iddu additicau sta puisìa a lu sò paisi:
Bellarrosa terra amurusa
Dintra 'na conca sutta 'na muntagna
'ntra dù ciumi, unu amaru e l'autru duci,
cc'è un paiseddu ccu li strati 'n cruci
e tanticchia di virdi a la campagna;
'ntra ripa e ripa la terra siccagna
di centu rarità frutti produci,
di jornu fumichìa, di notti luci
e 'ntra li 'nterni sò chianci e si vagna.
Òpiri
[cancia | cancia u còdici]- I Fioretti di San Francesco
- Bellarosa, terra amurusa
- A la riddena
- La Funtana
- Canzuni a lamentu
- Bellarosa: uomo serio!
