La Fata Galanti
| « Dunca ascuta a lu patri, e teni accura a sti pochi e sinceri avvirtimenti, » | |
(Giuvanni Meli di La Fata Galanti)
|
La Fata Galanti (cu suttatìtulu: Poemettu Berniscu) fu la prima òpira dû pueta sicilianu, Giuvanni Meli, chi vinni pubbricata (ntô 1762).
Astrattu
[cancia | cancia u còdici]N'astrattu di La Fata Galanti (li primi deci versi):
- CAPITULU
- A LA GALANTI CONVERSAZIONI
- Figghiu miu, libriceddu rispittusu,
- Chi spunti, e nesci a la mala vintura,
- Privu d'un vistiteddu fattu all'usu;
- Cu sa, cu sa, sta sira unni ti scura;
- Cu sa s'annu a scanciariti pri mulu;
- Cu sa si si jittatu a la malura.
- Senti cca, figgiu miu, sai chi 'un t'adulu;
- Tu intornu a robbi sì scumituliddu;
- E nun si cosa di nesciri sulu;
- Nè poi trattari cu chistu, e cu chiddu;
- Anzi li Varvasapii, e li Saccenti
- Dirannu: gioja mia, sì picciriddu.
- Diu ti scansi di Critici impurdenti,
- Di chiddi, ch'annu impegnu di passari
- Pri Saputi, ma poi nun sannu nenti.
- Cu sa si chisti t'annu a capitari;
- Cu sa si t'annu a dari un sgranfugnuni;
- Cu sa si t'annu a scùsiri, e tagghiari.
- Cu sapi, s'annu a serviri a taluni
- Li toi fogghi pri spezii e zafarana,
- O pri ammugghiari li Fruaridduni.
- Ma 'un ti pigghiari, tu, di mala gana
- Pri chisti cosi, cho'ora t'aju dittu,
- Ca forsi 'un ai a passari sta carvana;
- Anzi sta allegru, e sempri tira drittu;
- O beni, o mali, chi ti senti diri,
- Nun ti picari, nè ti stari afflittu.
- Sciala, quannu ti senti cuntradiri,
- Chi censura a li corvi nun li tocca,
- Ma soli a li palummi proseguiri.
