Tiurìa dî furmi di Pitrè

La tiurìa dî furmi fa parti dâ Grammatica Siciliana di Giuseppe Pitrè (pubbricata ntô 1875). Si tratta supratuttu dî furmi grammaticali dâ lingua siciliana. Sutta putiti truvari na parti, 'n òrdini di comu veni prisintatu di Pitrè ntô so libbru.

Artìculi

Ditirminativi

Singulari:

	Maschili	Fimminili
Nom e Acc.	Lu, 'u	La
Gen e Abl.	Di lu, d'u	Di la, d' 'a
Dat.	A lu, a 'u, ô	A la, a 'a, â

Plurari:

Nom e Acc.	Li
Gen e Abl.	Di li, d' 'i
Dat.	A li, ê

Nditirminativi

Singulari:

	Maschili	Fimminili
Nom e Acc.	Un, nu	'na
Gen e Abl.	D'un	Di 'na
Dat.	A un, ôn	A na

Nomi

Gèniri

Sti nomi sunnu fimminili: ficu, manu e soru; e arrèstanu senza canciamentu nnô plurali.

Sunnu maschili: lu dilizziu, lu frunti, lu fruntuzzu, lu leccu, lu scrufulu, lu forzu, lu schinu; e fimminili: la pàsima, l'esami, la raja, la viaggia, la vommara e la ciura.

Nùmmura

Sti nomi maschili pìgghianu l'«a» nnô plurali: libbra, jardina, vòscura, tèmpura, jòcura, còrpura.

Sti nomi sunnu singulari ntô sicilianu: la forficia, la lenti, l'ucchiali.

Aggittivi

Gradi

L'aggittivi cumparativi: megghiu, peju, minuri, majuri (o maggiuri), suprajuri, nfiriuri, ricèvinu quasi sempri l'artìculu cchiù: cchiù suprajuri, cchiù maggiuri, cchiù megghiu.

Lu superlativu si fa usannu l'artìculi ditirminativi: lu, la.

Cc'e' macari la manera di fari lu superlativu pi menzu di l'avverbiu veru, chi signìfica assai: veru beddu, veru duci, longu veru. Si ripètiri p'aviri lu stissu senzu: duci duci; longu longu; nicu nicu.

Pussissivi

1. miu, meu, me e mia, me; nostru/nostra/nostri
2. to e tua, to; toi; vostru/vostra/vostri
3. so e sua, so; soi; soi.

Quantatitivi

L'aggitivu quantitativu quantu nun si cancia pi gèniri, nè pi nùmmura; p'asempiu: «A Taurmina quantu su' l'acchianati su' li pinnina»; «Qauntu amici si perdinu tanti scaluna di scinninu».

Dui nun signìfica sempri nu nùmmuru pricisu, pò rifiriri a na quantitati nditirminata: «Vi purtai du' cusuzzi; datimi du' coccia di racina».

È cumuni usari vintina pi cuntari, spiciarmenti pi l'anni: «Quant'anni aviti? - Tri vintini e deci» (sittant'anni).

Prunomi

Pirsunali

	Singulari	Plurali
Nom.	Io, iu	Nui, nuatri
Gen e Abl.	di mia	di nui, nuatri
Dat.	a mia, mi	a nui, nuatri
Acc.	mi, mia	nui, nni

	Singulari	Plurali
Nom.	Tu	Vui, vuatri
Gen e Abl.	di tia	di vui, vi
Dat.	a tia, ti	a vui, vi
Acc.	ti, tia	vi

	Singulari	Plurali
Nom.	Iddu	Idda	Iddi
Gen e Abl.	d'iddu	d'idda	d'iddi
Dat.	a iddu, cci	a idda, cci	a iddi, cci, li
Acc.	lu, 'u, cci	la, cci	li, cci

Io nnî varî parrati passa 'n iu, eu, jeu, jè, jò, ju, i', ia, jua. Li littirati scriveru quasi tutti: jeu, iu e eu.

Nui nun si usa mai or quasi mai a sulu, chiossai si nn'attròvanu: nuatri, nuàutri, niàtri.

Vui si pò usari parrannu a pirsuna a cui si duna lu voi â manera francisi.

Dimustrativi e Rilativi

Li prunomi dimustrativi: chistu, chista, chisti; chissu, chissa, chissi; chiddu.

Sti tri prunomi sunnu macari aggittivi, ma e' cchiù cumuni ca nni pèrdinu la prima silabba: stu, sta, sti; ssu, ssa, ssi; ddu, dda, ddi.

Si pò agghiùnciri n'avverbiu a ciascunu p'èssiri cchiù pricisu: chistu ccà, chissu ddocu, chiddu ddà.

Li prunomi rilativi sunnu lu quali, la quali, li quali; chi ca cui: «Cu' duna pani a lu cani di cui, perdi lu pani e lu cani cchiui» (pruvverbiu).

Verbi

Aviri e Essiri

Nnicativu prisenti:

Haju, hè	Sugnu
Hai	Si'
Havi, ha	E'
Avemu	Semu
Aviti	Siti
Hannu	Su', sunnu

Mpirfettu:

Avìa	Era
Avivi	Eri
Avìa	Era
Avìamu	Èramu
Avìavu	Èravu
Avìanu	Èranu

Passatu rimotu:

Appi	Fui
Avisti	Fusti
Appi	Fu
Àppimu	Fômu
Avìstivu	Fùstivu
Àppiru	Fôru

Cungiuntivu mpirfettu:

Avissi	Fussi
Avissi	Fussi
Avissi	Fussi
Avìssimu	Fùssimu
Avìssivu	Fùssivu
Avìssiru	Fùssiru

Verbi Rigulari

Nnicativu prisenti:

Purtari	Ripètiri	Finiri
Portu	Ripetu	Finisciu
Porti	Ripeti	Finisci
Porta	Ripeti	Finisci
Purtamu	Ripitemu	Finemu
Purtati	Ripititi	Finiti
Pòrtanu	Ripètinu	Finìscinu

Mpirfettu:

Purtari	Ripètiri	Finiri
Portava	Ripitìa	Finìa
Portavi	Ripitivi	Finivi
Portava	Ripitìa	Finìa
Purtàvamu	Ripitìamu	Finìamu
Purtàvavu	Ripitìavu	Finìavu
Purtàvanu	Ripitìanu	Finìanu

Passatu rimotu:

Purtai	Ripitivi	Finivi
Purtasti	Ripitisti	Finisti
Purtau	Ripitìu	Finìu
Purtamu	Ripitemu	Finemu
Purtàstivu	Ripitìstivu	Finìstivu
Purtaru	Ripiteru	Fineru

Cungiuntivu mpirfettu

Purtassi	Ripitissi	Finissi
Purtassi	Ripitissi	Finissi
Purtassi	Ripitissi	Finissi
Purtàssimu	Ripitìssimu	Finìssimu
Purtàssivu	Ripitìssivu	Finìssivu
Purtàssiru	Ripitìssiru	Finìssiru

Verbi nun rigulari

Nnicativu prisenti:

Dari	Vidiri	Jiri
Dugnu	Viju	Vaju
Duni	Vidi	Vai
Duna	Vidi	Va
Damu	Videmu	Jemu
Dati	Viditi	Jiti
Dùnanu	Vìdinu	Vannu

Mpirfettu:

Dava	Vidìa	Java
Davi	Videvi	Javi
Dava	Vidìa	Java
Dàvamu	Vidìamu	Jàvamu
Dàvavu	Vidìavu	Jàvavu
Dàvanu	Vidìanu	Jàvanu

Passatu rimotu:

Detti	Vitti	Jivi
Dasti	Vidisti	Jisti
Detti	Vitti	Jìu
Dèttimu	Vìttimu	Jemu
Dàstivu	Vidìstivu	Jìstivu
Dèttiru	Vìttiru	Jeru

Cungiuntivu mpirfettu:

Dassi	Vidissi	Jissi
Dassi	Vidissi	Jissi
Dassi	Vidissi	Jissi
Dàssimu	Vidìssimu	Jìssimu
Dàssivu	Vidìssivu	Jìssivu
Dàssiru	Vidìssiru	Jìssiru

Modi e tempi

Lu passatu rimoti pigghia quasi sempri lu postu dû passatu pròssimu comu lu latinu. Per lu futuru cumpostu, veni usata sta frasa: Haju a fari, haju ad aviri.

Lu futuru sèmprici nun si usa cchiù, usannu mmeci lu prisenti nnicativu: «N'âtr'annu, si voli Diu e campamu, nni videmu cu saluti».

Nun si usa cchiì lu prisenti dû cungiuntivu, usannu mmeci lu prisenti nnicativu pricidutu dâ cunjunzioni: ca o chi. La ccizzioni asisti pi certi verbi e cunjugazzioni, p'asempiu: sia, vegna, fazza.

Li vuci cunnizziunali si ùsanu raramenti, sustituennu àutri formi, comu lu mpirfettu e lu chiuchipirfettu cungiuntivu, propiu nnâ manera latina: «Iu nun avissi nuddu timuri di vèniri si sapissi ca la casa arriniscissi»; «Putìssivu favuriri a la me casa>»;«Si li cosi si sapìssiru, gran cosi si facìssiru».

Àutri assirvazzioni

Quannu si tratta di nu cumprimentu di pirsuna, sia nomu, sia prunomu, chissu cumprimentu ricevi la pripusizzioni a (ad lat.), p'asempiu: «Iu cercu a me frati»; «Cu voli a mia, aspittassi a me patri». Quannu e' nu cumprimentu di na cosa, e' un accusativu senza pripusizzioni: Cercu un libbru; Cu voli dinari, vaja a lu bancu; Tintu cu ajutu di parenti aspetta. St'usu mustra nu cunfruntu cû spagnolu e latinu.

La vuci du participiu passatu nnî tempi cumposti a cui apparteni s'arresta mmariàbbili pi gèniri e pi nùmmuru, p'asempiu: «Ha vinutu me frati?»; «Ha vinutu me soru?»«Hannu vinutu nutizzii?». S'attrova la ccizzioni nta stu tipu di custruzzioni: «Vinuti chi foru, s'hannu misu tutti a tavula». Nnî verbi di forma passiva lu participiu passatu a cui si unisci l'èssiri tèrmina 'n u pû maschili, 'n a pû fimminili, 'n i pû plurali d'ogni gèniri.

Nnô sicilianu sunnu friquenti li furmi riflissivi chi nun lu sunnu nnô latinu, p'asempiu: «Iu mi manciai un piru»; «Ti la vidisti la miss?»; «Me frati si nsunnau».

Li terzi pirsuni singulari e plurali àttivi addivèntanu passivi pi menzu dâ vuci si. Nnî tempi cumposti ricèvinu 'n sicilianu l'ausiliari aviri e nun l'èssiri: «s'ha circatu», «s'avìa circatu»,

Nzècutu, si usa quasi sempri sulu aviri comu nu verbu ausiliari: «Ha chiuvutu»; «ha scampatu»; «ha truniatu»; «haju vinutu»; «haju trasutu»; «s'avìa pintutu»; «s'avìa scurdatu»; «ha successu», «ha divintatu», ecc.

Avverbi

Di locu

• Ccà, ddocu, ddà, supra, ncapu, sutta, addabbanna, addavia, a jiri ddà, a sta banna, a sta via, jusu, susu, unni, a tutti banni, cci.

Di tempu

• Ora, antura, poi, dipoi, doppu, ajeri, avanteri, oj, dumani, stamatina, stasira, doppudumani, tannu, quannu, mmeri, mmersu.

Di modu

• Beni, mali (e megghiu e peju, gradu cumparativu), comu, ammucciuni, prestu, accussì, accuddì, nùtili, ntôn fiat, ntôn vidiri, ntôn fallanti, a la sdossa, a la bona di Diu, manu manu, a manu a manu.

Quantità

Cchiù, mmidiatu, menu, assai, picca, tanticchia, anticchia, tantu (variàbbili)

Vari

Si, no, nun, unni, mai, siccomu, dunqui, addunca, unca, ca, sparti, nnamentri, stamentri, gnursì, nnasi, nnanò.

Pripusizzioni

'N, nni, pi, pri, jintra, ntra, nta, di, a cu, e li cumposti di sti pripusizzioni e di l'artìculi: pi lu, p' 'u, pi la, p' 'a, pi li, p' 'i, di lu, d' 'u, d' 'a; ncapu, ncostu, sina, fina, nfina, p'assina, mmeri, mmersu, nfacci, a l'affaciu.

Cunjunzioni

Chi, ca, puru, ancora, midemmi, midemma, mmidè, ma, picchì, parò, sparti, aliunna, mancu, sippuru, mmeffi.