Wikipedia:Versu nostru
Sta pàggina cunteni astratti dâ littiratura siciliana chi foru pubbricati ntâ pàggina principali nta l'appòsita finestra. Rapprisèntanu asempi dâ littiratura tìpici e aducativi, supratuttu dâ lingua littiraria stissa. Spiramu ca chiddi chi n'attròvanu ccà pâ prima vota, forsi senza na canuscenza bona dû sicilianu, s'addùnanu ca la lingua scritta asisti, e hà sempri asistutu, e ca la wikipedia siciliana prova a riflèttiri sta lingua scritta asistenti.
Lu tìtulu di sta pàggina: Versu nostru porta dui significanzi. Nu versu fa parti di na puisìa, e dunca rapprisenta nu tèrmini littirariu, ma significa puru «modu» o «manera», p'asempiu: «Fallu a versu nostru», zzoè, l'avissi a fari pû nostru modu o comu facemu nuiàtri. Diri ca unu fa lu versu di n'àutru signìfica cci sta immitannu.
P'ogni astrattu chi veni prisintatu ntâ finestra dâ Pàggina Principali, l'ammustramu ccà e cci mintemu na discrizzioni di l'òpira, na spiacazzioni dû cuntestu e/o na lijami chi vi ndrizza a na vuci p'ammustràrivi l'òpira pi di cchiù e/o àutra nfurmazzioni chi cci apparteni.
2009
[cancia lu còdici]5 di jinnaru
[cancia lu còdici]Dû Cantu Sestu di Don Chisciotti e Sanciu Panza di Giuvanni Meli:
- Lu squatrau beni beni, e poi s'afflissi,
- Lu fastu, e la ricchizza chi cridìa,
- Vidi ch'è puvirtati; "oh celu!" dissi,
- "Si lu rignanti nun vali tri calli,
- Penza poi chi sarrannu li vasalli?"
- ...
26 di jinnaru
[cancia lu còdici]Dâ Canzuna I di Bartulumeu Asmundu:
- E si li cosi stannu un tempu uguali,
- lu tempu muta e consuma l’usanza;
- e si muta ed ha fini ogni aspru mali,
- ma no lu miu, chi cu lu tempu avanza.
- ...
3 di aprili
[cancia lu còdici]Di li puisìi di Luiggi Capuana:
- Sta notti mi sunnai quattru funtani,
- Quattru pedi d'aranciu a lu ciuriri;
- Vitti li stiddi scinniri e acchianari,
- Vitti lu suli comu un lebbru jiri;
- ...
6 di giugnu
[cancia lu còdici]Di li puisìi di Vicenzu De Simone:
- Bellarrosa terra amurusa
- Dintra 'na conca sutta 'na muntagna
- 'ntra dù ciumi, unu amaru e l'autru duci,
- cc'è un paiseddu ccu li strati 'n cruci
- e tanticchia di virdi a la campagna;
- 'ntra ripa e ripa la terra siccagna
- di centu rarità frutti produci,
- di jornu fumichìa, di notti luci
- e 'ntra li 'nterni sò chianci e si vagna.
16 di sittèmmiru
[cancia lu còdici]Di li puisìì di Lina La Mattina
- ISULA
- Isula nascivu, isula vogghiu moriri.
- Isula comu mi fici lu Signuri
- cu li turmenti e li dulura
- ma sempri abbrazzata a lu mari
- e figghia pridiletta di lu suli.
- Bedda tra li beddi sugnu
- 'nghirlannata stati e mmernu di ciuri.
- Curtigghiara, baggiana, ciaurusa
- mi vestu di milli culura
- e cu sta peddi di meli e di rosi
- attiru lapuna d'ogni razza e paisi.
