Wikipedia:Versu nostru/Archiviu 2008

2008

26 di maiu

Lingua e dialettu, Gnazziu Buttitta, 1970

Un populu

mittitulu a catina

spuggghiatulu

attuppatici a

vucca,

è ancora libiru.

2 di giugnu

Di nu rèpitu dû carnivali (tradizziunali)

È mortu lu Nannu

Lu Nannu murìu!

Pri fin'a n'àutr'annu

nun pipita cchiù!

9 di giugnu

Di Mi veni a menti di Giuseppi Scandurra:

Quannu tra canni e salici arrivai,

l'ummira mia si spersi frunni frunni

e senza cumpagnia sulu ristai.

Dicennu: Rosa venimi e mi trovi

macari ca ti parru e non rispunni

macari ca pri l'ummira ti movi.

16 di giugnu

Di La Barunissa di Carini, na puisìa pupulana e tradizziunali:

e sempri chi lu senziu cci smacedda,

ch’havi davanti na fijura bedda;

e sempri chi lu senziu 'un ha valuri,

ca tutti cosi domina l’amuri.

23 di giugnu

Di Celia, Lib. 2, viii, (c. 1580) di Antoniu Vinizzianu:

In parti dubbiu e in parti sicuru,

fra lu zertu e l'inzertu scurru e penzu,

contemplu ora lu chiaru, ora lu scuru,

e dugnu or'unu ed ora un autru senzu;

pisu, assuttighiu, bilanzu, misuru,

criju, non criju, risolvu e ripenzu,

ogn'hura penzu e guastu, muru e smuru,

e sempri ddà finixxu, undi 'ncumenzu.

30 di giugnu

U MUCCATURU E RA SACCA di Vittoriu Butera (pi Calabbrisi); funti: [1]

'A sacca de 'na giacca,

Vidìennu 'u muccaturu

'Ntuornu listatu scuru,

Addimannàu: - Ppecchì

Si' ttinciutu ccussì?

- Ma cumu? Viramente

U nn'hai saputu nente?

A ru patrune miu

L'è mmuortu, chiru ziu

Chi l'ha llassatu tuttu,

E mmo, dìcica, 'u luttu

L'haju 'e portare iu!

7 di giugnettu

Castagnu dê Centu Cavaddi dû pueta catanisi Giuseppi Borrellu:

Un pedi di castagna

tantu grossu

ca ccu li rami so' forma un paracqua

sutta di cui si riparò di l'acqua,

di fùrmini, e saitti

la riggina Giuvanna

ccu centu cavaleri,

quannu ppi visitari Mungibeddu

vinni surprisa di lu timpurali.

14 di giugnettu

Petru Fudduni e lu Dottu di Tripi di Petru Fudduni:

Lu Dottu:

Mi fu mannatu un marzapani chiusu,

di supra scrittu lu O e lu C;

ddà dintra cc'è un domanti priziusu,

ca ntra lu munnu lu paru nun cc'è;

e nautra cosa a la parti di jusu,

chi fa lu fruttu e dici a l'omu: te!

Petru Fudduni, pueta famusu,

va sciogghimi stu dubbiu cos'è.

...

21 di giugnettu

Accattari Vurrìa di Luiggi Capuana:

Accattari vurrìa 'na virrinedda,

Di notti la to porta spurtusari;

Vidiri, figghia mia, quantu si' bedda

Quannu ti spogghi, prima di curcari;

...

(Chista puisìa fu musicata e divintò na canzuna di lu ripirtoriu di li gruppi folklurìstici catanisi)

28 di giugnettu

Diciottu Jaròfuli di Sarvaturi Camilleri:

...

Ntuttuna, dintra l'ànima, diciottu

jaròfuli gintili,

sirinata a li stiddi

e prufumu d'aprili.

...

4 di austu

Idilliu VII di La Buccolica di Giuvanni Meli:

Supra un ruccuni, chi si specchia in mari,

rusicata da l'unni e li timpesti,

chi orribili e funesti

sòlinu ntra ddi grutti ribbumbari;

...

11 di austu

La Libertà di Dumìnicu Tempiu:

Cardidduzzu, e non vidi

La tua felicità. Tu non hai dica

D'abbuscarti la spisa;

Mangi, e bivi, e non fai nudda fatica.

...

18 di austu

'Lamentu cubbu pi Rocca Ciravula di Santu Calì:

Matri, dda notti ca prujisti càlici

d'amuri, nta li manu d'alabbastru,

a la siti sprivera di me patri

ca turnava fuddettu di li boscura,

chi pinzavi di mia?

...

25 di austu

N'astrattu di Lu Rebellamentu di Sichilia scrittu 'n sicilianu anticu ntô 1290:

In lu annu dili milli du chentu octanta dui anni dilu aduentu di Christu, in lu misi di Agustu cabalcau lu Re di Aragona di Trapani inPalermu, et li Palermitani ficiru grandi solemnitati dila sua vinuta, sicomu homini liquali aspittavanu liberacioni di morti; di chi lu ascuntraru ben sei migla cum grandi gazara di donni e dunzelli, homini, effimini, Conti eBaruni e Caualeri, li Arcifiscopu di Murriali no ni vosi trovari a dari li coruna (et inPalermu havia statu mortu lu loru Arcifiscopu) si ki quilla di Murriali fugiu, et andau piedi alu Papa; e cussì no fu corunatu, si no chamatu dilu populu.

...

1 di sittèmmiru

N'astrattu di Lu cuntu di « Si raccunta » trascrittu di Giuseppi Pitrè. Stu cuntu è lu primu dû sò libbru: Fiabe, Novelle e racconti, e l'addijìu p'addimustrari la mpurtanza di sta riga accuminzanti assai tìpica dî cunti siciliani (lu cuntu cuntìnua ca nu mircanti cerca a quarchirunu chi pò cuntari nu cuntu senza diri « si raccunta», e la picciridda rinesci a fàricci tinennu la pulisedda e vinci lu pattu):

Si cunta e si raccunta ca na vota cc'era na mamma e na figghia. Sta mamma avìa tanti puddicini, e si nni jìa a la missa, e cci li lassava a la figghia. Na jurnata cci dissi: – « Saddaedda, Saddaedda, ti lassu sti puddicini; vidi ca ha' a scupari la casa, ha' a cunzari lu lettu, ca poi vegnu. »

Saddaedda cunzau lu lettu, scupau la casa, poi si pigghiau un puddicineddu 'n manu; a stu puddicineddu cci misi a circari piducchieddi, linnireddi, nna na pinnicedda cci avìa na pulisedda, e sta pulisedda cci vinni 'n manu a la picciridda.