Ninu Martogliu
Ninu Martogliu nascìu a Malpassu (Catania) lu 3 di dicèmmiru dô 1870 e murìu a Catania a lu 15 di sittèmmiru 1921. Scritturi di tiatru, discrissi na Sicilia culurata ca rapprisintava pirsunaggi pupulani. Fu diritturi di cumpagnìi siciliani, animaturi tiatrali, riggista cinimatugràficu, pueta e jurnalista.
Dû 1889 ô 1904 pubbricò lu sittimanali D'Artagnan, pi discùtiri di arti, littiratura, tiatru e pulìtica.
Appi un rolu mpurtanti pi l'affirmazzioni dû sicilianu comu lingua littiraria, spiciarmenti pi lu tiatru e la puisìa.
Comu animaturi, fu iddu chi scuprìu a Giuvanni Grassu e a Ancilu Muscu. Fu iddu chi fici rapprisintari comu diritturi di cumpagnìi, l'òpiri di Pier Maria Rosso di San Secondo e di Luigi Pirandellu. Ntô 1903 funnò la Compagnia drammatica siciliana.
Dû 1913 ô 1915 accuminzò la carrera di riggista cinimatugràficu. Ricurdamu Teresa Raquin e Sperduti nel buio. Ntô 1919 funnò la Compagnia Drammatica del Teatro Mediterraneo.
Tra li sò òpiri tiatrali ricurdamu Nica dû 1903, rapprisintata 'n tiatru di Giuvanni Grassu, L’aria del Continente dû 1915 e San Giuvanni Decollato dû 1908, rapprisintati n tiatru di Àncilu Muscu.
La sò òpira littiraria chiù mpurtanti è Centona.
Asempi di puisìa
[cancia | cancia u còdici]L'AMURI
[cancia | cancia u còdici]- Mamma, chi veni a diri 'nnamuratu?
- ...Vòldiri... un omu ca si fa l'amuri.
- E amuri chi vòldiri? -
...E' un gran piccatu;
è 'na bugia di l'omu tradituri!
- Mamma..., 'un è tantu giustu 'ssu dittatu...
- ca tradimenti non nn'ha fattu, Turi!
- Turiddu?.. E chi ti dissi, 'ssu sfurcatu?
- Mi dissi... ca pri mia muria d'amuri!
- Ah, 'stu birbanti!... E tu, chi ci dicisti?..
- Nenti!... Lu taliai ccu l'occhi stòrti...
- E poi?.. - Mi nni trasii tutta affruntata!...
- Povira figghia mia …..Bonu facisti!....
E… lu cori? – Mi batti forti forti....
- Chissu è l'amuri, figghia scialarata!
IL TELEFRICO SENZA FILI
[cancia | cancia u còdici]- Siti bestia, quadrupedi, animali...
- e non vi dicu artro, non vi dicu!...
- Le 'ntinne ci su' sempri, tali e quali,
- e l'àmu vista ju e cumpari 'Ricu...
- Chiddu ca non c'è chiu, mio caro amicu,
- è il filo!... Oh, binidittu San Pasquali!...
- Il filo, dintra il quale, a tempu anticu
- curreva il telecrama naturali!...
- La mia difoortà, però, 'n è chissa;
- c'è un'artra cosa, ca ancora non. sacciu
- e della quali nn'arristai scossu:
- Chiovi, mintemu, l'acqua si subissa?..
- Com'è ca la parola del dispacciu
- agghica bella, asciutta comu 'n ossu?
