Carru Gimmillaru
| « Sti pocu palori aju fattu pricèdiri a lu brevi raccuntu di la Rivuluzzioni di Sicilia di Jinnaru 1848, pri richiamari a la mimòria ca tuttu pò uttèniri un pòpulu quannu aggisci pri càusa cumuni; e chi nun fu chista la prima vota ca la Sicilia avissi fattu vidiri ca vulènnucci è Nazzioni puru idda... » | |
(Carru Gimmillaru, dâ sò saggìstica: Cenni Storici di la Rivoluzioni Siciliana.)
|
Carru Gimmillaru (o Carlo Gemmellaro 'n talianu) nascìu a Niculosi lu 14 di nuvèmmiru 1787 e murìu a Catania lu 22 di uttùviru dô 1866; era n'omu di scienza e di littiratura. Scrivìu puisìi pri sicilianu e pri talianu, ma è arricurdatu chiossai di tuttu ntô campu dâ gioluggìa, unni appi fama chi supirau li cunfini dâ Sicilia e puru di l'Italia.
Si lauriau dutturi 'n midicina e chirurgìa ntô 1808, ntâ l'Univirsitati di Catania. Appoi, pri sett'anni, si nni ivu appressu ê ngrisi, contru a Napuliuni Bonaparti.
Viaggiannu di un capu a n'àutru di l'Auropa, potti studiari, ammunziddari e scrìviri ccu pricisioni tuttu chiddu ca sirvìa sapiri dê petri, minirali, cosi antichi attruvati sutta terra e ogni àutra cosa ca putìa studiari. Quannu turnau a Catania pubblicau, attraversu l'Accadèmia Giuènia dê Scenzi Naturali - ca era funziunanti dô 1824 -, li risurtati dê sò ricerchi; ccu stu sistema iddu desi na svorta a la gioluggìa, ca a ddu tempu 'n Sicilia nun era canusciuta assai, e criau a Catania la scola giològgica a liveddu auropeu.
Prestu lu fìciru prufissuri di Storia Naturali nta l'Univirsitati di Catania, e ccu na sèrii di travagghi, pruducìu nu stùdiu dâ stratigrafìa dâ Sicilia, n'àutru supra la fàuna dô Golfu di Catania, e n'àutru mpurtanti stùdiu supra l'urìggini giològgica di tanti tirreni siciliani.
Fu iddu ca sistimau una dê primi mappi giològgichi dâ Sicilia.
Ntô 1832, intra l'Univirsità di Catania, sistimau l'Ussirvatòriu Mitiriològgicu, custruennu strumenti, comu lu pluviòmitru di sô mminzioni. Accuminciau a urganizzari lu Gabinettu di Storia Naturali. Fu Rittori dô 1847 e membru di l'Accademia Giuènia di Catania, di l'Accademia dê Licei di Roma, dô Riali Culleggiu dê chirurghi di Londra, di l'Accadèmia Sankinbiggiana di Francuforti dâ Girmania, di l'Istitutu Culumbianu di Vashintonni ntâ Mèrica e dâ Sucità Giològgica dâ Francia.
Ntê soi sittantanov'anni di vita Carru Gimillaru viaggiau assai e scrivìu ca c'era assai assai la nicessità di rializzari lu Portu di Catania, nnispinzàbbili â citati pô sô sviluppu cummirciali; scrivìu macari supra ô sviluppu di l'agricurtura 'n Sicilia e supra lu Risurgimentu sicilianu. Comu giòlugu e vurcanòlugu sturiau l'Etna; li sò studii sunnu riassumuti ntâ monugrafìa "Vurcanuluggìa di l'Etna 1859-1860". Quannu spuntàu di lu mari lu vurcanu di l' Ìsula Firdinandèa, currìu sùbbitu ppi studiàrilu e nn'addisignau macari li pruspetti.
Gimmillaru campau nta n'èbbica dâ storia siciliana unni appi oppurtunitati di vidiri armenu quattru rivuluzzioni pulìtichi siciliani, accuminzannu cu chidda dû 1812, finennu cu chidda dû 1860.
Di sti rivuluzzioni chi iddu vitti, ni lassau na seria di saggìstichi chi nun foru mai pubbricati. Foru sulu scupreti sti l'ùrtimi anni di Vicenzu Finucchiaru.
Una si chiama: Cenni Storici di la Rivoluzioni Siciliana, l'annu MDCCCXLVIII. Scritta pi sicilianu, si tratta dâ rivuluzzioni ndipinnintista dû 1848. Ccasutta si pò lèggiri n'astrattu nicu di sta saggìstica (funti: Arba Sicula, vulumi II). È lu ntroducimentu.
- «Fin'atantu ca li picciuli populi non sunu riuniti 'ntra d'iddi e non pigghianu lu nomu di Nazioni, solinu essiri in continua disenzioni; e l'odii privati, li gari municipali, passanu tanti di li voti a divintari ostilità decisi; e pri lu chiù, chiddu ca si vidi debuli ricurri al'ajutu d'unu statu chiù potenti, pri superari l'avversariu, senza riflettiri ali mali ca ni ponnu viniri, basta chi arriva ad ottiniri la disiata vinnitta. Succedi spissu, infatti, chi lu statu potenti, comu dici l'antica favula di lu Cavaddu e lu Cervu, finuta la cuntisa di li dui picciuli populi, si fa patruni na vota pri sempri di cui lu chiamau in ajutu. Alu cuntrariu però, quannu diversi populi si uniscinu in Nazioni, allura diventanu potenti, e non hannu bisognu di ricurriri a nuddu pri difennirsi, o pri farisi rispittari.»
E la cunchiusioni (funti: Arba Sicula, vulumi 4/5):
- «Tali verità sunu cogniti a tutti, pri cui non c'è bisognu ca iu li ripitissi; ma begnu chiù tostu ad esponiri li fati successi ntra st'annu, memorabili pri la Sicilia è un avvenimentu si non unicu, rarissimu certamenti ntra la storia, in quantu a lu modu di comu si fici annunziari, ed alli effetti ca produssi nelli populi di Europa.»
