Micheli Amari
Di Wikipedia, la nciclupidìa lìbbira.
Micheli Amari (Palermu, 7 di giugnettu 1806 - Firenzi, 16 di giugnettu 1889) fu stòricu, scritturi, e omu pulìticu sicilianu. Doppu nu piriudu di esiliu in Francia, pi la sò attività pulìtica contra lu reggimi di Francischieddu, ritorna in Italia unni pòi, rivesti la càrrica di sinaturi a partiri dû 1861.
[cancia] Biugrafìa
Era ancora picciutteddu quannu ntô 1820, pigghiannu asèmpiu di sò patri Firdinannu, accuminciau a participari a li riunioni siparatisti pri la nnipinnenza dâ Sicilia di Nàpuli; ma la rivuluzzioni siparastista dû 1820/21 finìu cu la riprissiuni burbònica e a li siciliani non cci aristaru ca l'occhi pri chiànciri. Nti stu clima, vinni ncriminatu p'aviri scrivutu l'òpira "La Guerra dû Vèspiru" ("La Guerra del Vespro" 'n talianu), ca, pri la mpusizzioni dâ cinzura, niscìu a l'èbbica cû tìtulu "Un periodo delle istorie siciliane del XIII secolo"; accussì, pri non cascari ntê manu dû cuvernu di Nàpuli, si nni fujìu 'n asìliu a Pariggi. Ddocu vinni accugghiutu di àutri siciliani ca si nn'avìanu macari iddi scappati dû solu pàtriu, assicutati dî napulitani. Cu na situazzioni di chiossai tranquillitati, di unni ora s'attruvava, aripigghiau li so' studî di lingua àrabba, ca duraru pri cchiui di deci anni; di iddu foru studiati tutti li manuscritti di ssà lingua ca parràvanu dâ Sicilia nti lu pirìudu dâ duminazzioni islàmica, e nni vinni fora la munumintali "Storia di li mussurmani 'n Sicilia" (titulata 'n talianu Storia dei mussulmani in Sicilia). Lu primu vulumi di l'òpira, ca è cumposta di tri vulumi, vinni pubbricatu ntô 1854 a Firenzi di l'edituri Felice Le Monnier; lu secunnu vulumi niscìu ntô 1858 e lu terzu, fattu di tri tomi, nti l'anni 1868-72.
Mentri ca ancora travagghiava supra a la "Storia di li mussurmani 'n Sicilia", eppi la pinzata di nu nova travagghiu: la priparazzioni di la "Bibbliuteca àrabbu-sìcula", ca vinni appoi pubbricata ntô 1841; macari chista fu n'òpira munumintali, unni vènunu llustrati l'òpiri àrabbi ca parràvanu di la Sicilia, o macari ca nni trattàvanu qualchidunu di li sò aspetti: òpiri giugràfichi, stòrichi, puètichi; prestu l'auturi di ss'òpiri divintaru famusi macari nti la cultura uccidintali, comu Al-Idrisi, comu a lu viaggiaturi Ibn Gabayr o a lu pueta Ibn Hamdis, ca cantò la Sicilia.
Ntô 1848 turnau 'n Patria pri participari a la Rivuluzzioni ndipinnintista siciliana dû 1848 e pi sìdici misi (quantu durau lu novu abbrivisciutu Statu Sicilianu) vinni eliggiutu diputatu ô Parramentu Sicilianu e numinatu Ministru di li Finanzi. Finutu l'autucuvernu sicilianu, si nni turnò arrè ntâ Francia unni s'avvicinò a Giuseppi Mazzini e a li soi idèi pulìtichi.
Ntô 1859, a l'universitati di Pisa, cû cuvernu pruvvisòriu tuscanu, fu prufissuri di lingua e storia àrabba. Turnau 'n Sicilia ntô 1860 comu ministru di Garibbaldi, participau a la vita pulìtica di l'Italia unita e vinni numinatu sinaturi a lu 20 di jinnaru 1861; fu appoi ministru di la Istruzzioni Pùbbrica di lu 1862 a lu 1864; ntô stissu 1864 ripigghiau lu nzignamentu dâ lingua àrabba nti l'Istitutu di Studi Supiriuri di Firenzi nzinu a lu 1873 .
Murìu mpruvvisamenti a Firenzi a lu 16 di giugnettu 1889, mentri ca ancora travagghiava pi fari mudìfichi e aggiustamenti supra a la "Storia di li mussurmani 'n Sicilia".
[cancia] Òpiri
Amari fu auturi di Storia della guerra del Vespro siciliano e Storia dei Musulmani di Sicilia; si fa canùsciri comu ricircaturi seriu di l'idintità siciliana. Lu primu vulumi di I Musulmani di Sicilia fu pubblicatu ntô 1854. Espertu arabbista, traduci in italianu nu nùmmuru mpurtanti di testi di la prisenza àrabba in Sicilia. Amari fu tistimoni ntê sò òpiri di nu dialugu e di na tulliranza diffusi nta la Sicilia di l'èbbica àrabba.
