Gnazziu Buttitta

Dâ Wikipedia, la nciclupidìa lìbbira.
Gnazziu Buttitta

Gnazziu Buttitta (Bagaria, 19 di sittèmmiru di 1899 - 5 di aprili 1997) fu unu di li pueti siciliani cchiù mpurtanti dû Sèculu XX. Autudidatta, li so' òpiri, tutti 'n sicilianu, foru traduciuti 'n talianu di pueti comu Sarvaturi Quasimodu e Eliu Vittorini. Pi littirati comu Cesare Zavattini, Liunardu Sciascia, Pier Paolo Pasolini fu na figura assai rapprisintativa dâ puisìa cuntimpurània.

Asempi dâ sò puisìa[cancia | cancia la surgenti]

di La Peddi Nova[cancia | cancia la surgenti]

(~1963)
La Morti

Nun è la morti chi scanta,
è lu pinzàrisi mortu,
cunzatu mmenzu la casa,
tisu, cu l'occhi chiusi,
cu li parenti chi chiàncinu,
cu li stranî ca giùdicanu
e cunnànnanu senz'èssiri visti.
Nun è la morti,
è l'impussibbilità
(si murissi ora)
di gràpiri la finestra,
di taliari ccà sutta
li picciriddi chi ghiocanu;
di taliari lu mari,
li muntagni, lu celu;
di nun putiri mannari lu cori
a cantari
supra na cima d'alivi
comu n'aceddu.
Nun è la morti chi scanta,
è chiddu chi si lassa,
lu pinzari
ca l'occhi di chiùdinu pi sempri
e chi si parti pi nun turnari;
cumminti ca la morti lu sapi
e nun lu dici: pirchì poi?
Nun lu dici;
ma quannu veni a pigghiàrini
(stàticci attenti!)
la viditi chiànciri cu vuatri.


Lu Pisu di lu Duluri

Vaiu unn'è ca chiàncinu
e mi nni tornu
cu li quartari chini;
nun m'affliggi lu pisu,
ma nun sapiri comu sdivacàlli.

di Io faccio il poeta[cancia | cancia la surgenti]

(~1982)

Lingua e dialettu (1970)

Un populu
mittitilu 'a catina
spugghiatilu
attuppatici a vucca:
è ancora libbiru.
Livatici u travagghiu,
u passaportu,
a tavula unnu mancia,
u lettu unnu dormi:
è ancora riccu.
Un populu
diventa poviru e servu
quannu ci arrubbanu a lingua
addutata di patri:
è persu pi sempri.
Diventa poviru e servu
quannu i paroli non figghianu paroli
e si mancianu tra d’iddi.
Mi nn’addugnu ora,
mentri accordu la chitarra du dialettu
ca perdi na corda lu jornu.
[.....]
E sugnu poviru:
haiu i dinari
e non li pozzu spènniri;
i giuelli
e non li pozzu rigalari;
u cantu
nta gaggia
cu l’ali tagghiati.
[.....]
Nni ristò a vuci d’idda,
a cadenza,
a nota vascia
du sonu e du lamentu:
chissi non nni ponnu rubari.
Non nni ponnu rubari,
ma ristamu poviri
e orfani u stissu.

Bibbliografìa[cancia | cancia la surgenti]

  • Sintimintali, Sabio, Palermo 1923;
  • Marabedda, La Terrazza, Palermo 1928;
  • Lu pani si chiama pani, Cultura Sociale, Roma 1954;
  • Lamentu pi la morti di Turiddu Carnivali, Arti Grafiche Palermo 1956;
  • La peddi nova, Feltrinelli, Milano 1963;
  • Lu trenu di lu suli, Avanti!, Milano 1963;
  • La paglia bruciata, Feltrinelli, Milano 1968;
  • Io faccio il poeta, Feltrinelli, Milano 1972 (Premiu Viareggio);
  • Il cortile degli Aragonesi Giannotta, Catania 1974;
  • Il poeta in piazza,Feltrinelli, Milano 1974;
  • Prime e nuovissime, Forma, Torino 1983;
  • Le pietre nere, Feltrinelli, Milano 1983.

Vuci Currilati[cancia | cancia la surgenti]

Pi sapìrinni cchiossai[cancia | cancia la surgenti]

Lijami di fora[cancia | cancia la surgenti]

"Un seculu di storia" cuntata di Ninu Buttitta