Turi Lima

Dâ Wikipedia, la nciclupidìa lìbbira.
« Ju puru nascivi unni la pala e lu cuteddu lùciunu (nta la terra di lu focu!). »

Turi Lima (Venero Maccarrone pi l'anàgrafi) nascìu a Catinanova lu 18 di austu 1925 e murìu a Catania a lu 10 di dicèmmiru di lu 1996.
Pueta civili sicilianista, catanisi d'aduzzioni, fu auturi di lìrichi ricchi di significatu pri mpegnu civili e pulìticu, espunenti di la cchiù àuta curtura siciliana ca parra e non stà muta.
Pri càusa dâ guerra, la famigghia Maccarrone si traslucau a Catania, unni lu giùvini Vènniru trasìu ntâ "Lega Giuvanili Siparatista" , urganizzazzioni giuvanili e paramilitari dû M.I.S. (Muvimentu pâ nnipinnenza dâ Sicilia), e sùbbitu nn'addivintau un diriggenti. Ncuminciannu dû doppuguerra, travagghiau cuncretamenti nta l'àmbitu littiràriu e giurnalìsticu, cullaburannu chî piriòdichi La Libertà , Sicilia Martire , Sicilia Rossa e Sicilia Indipendente .
Ntô 1970 funnau lu " Centru Studi Stòricu Suciali Siciliani ", pigghiannu la càrica di Sicritàriu Ginirali nzinu a la sò morti.
Nta l'anni 1982-1983 vincìu chìnnici premî nta mpurtanti cuncorsi littirari.
Ntô 1978 funnau, nzemi a àutri, la ràdiu " R. T. Trinacria " appoi chiamata Antenna Trinacria, la ràdiu d'assartu.

Picchì "Turi Lima"[cancia | cancia la surgenti]

Lu nomu "Turi Lima" era, ntâ pinzata dû pueta, lu "limaturi" , lu firraru, ca, cu tanta pacènzia, "Lima" pri curriggìri e pirfizziunari un pezzu di ferru difurmatu.

La puisìa[cancia | cancia la surgenti]

Turi Lima cunta chî sò puisìi la rialitati drammàtica di lu pòpulu sicilianu, cunta lu sgrùsciu di l'avvinimenti; la Sicilia è lu sulu stìmulu pâ sò puisìa: matri bona e ginirusa, la Sicilia nzunnata di Antoniu Canepa, chidda dô vèspiru, la Sicilia di Ducezziu, la Sicilia ca si cunquistau l'autonumìa, ma ca na crassi pulìtica assuggittata non fici mai cuncritizzari; la Sicilia sintuta comu Patria dû Pòpulu Sicilianu, comu Nazzioni scancillata:

« Si sugnu lava o sùrfuru
si sugnu aranciu o pala
si sugnu jnestra o mènnulu
ju non lu pozzu diri
Chiddu ch'è certu, sugnu:
e sugnu sicilianu.  »


Lu mudellu di rialitati scigghiutu di Turi Lima fu chiddu di stimulari la cuscenza di tutti pri "vigghiari":

« Tu non canusci lu scuru di li notti, stiddati di duluri,
di cù vosi spizzari li catini e truvau lami e focu
e ancora curri,nudu e dispiratu, tra celi e inferni...
Sunò lu cornu Eunu e ancora pi li strati l'omu camina mpintu a lu juvu...[1] »


  1. Wikizziunariu[1]