Sicilia

Dâ Wikipedia, la nciclupidìa lìbbira.
Jump to navigation Jump to search


Sicilia

Stemma dâ Sicilia
(Stemma dâ Sicilia)
Bannera siciliana
(Bannera siciliana)
Nomu ufficiali : Regione Siciliana
Innu sicilianu Sicilia, Patŗia mia (nun ufficiali, di Carlo Muratori)
Lingua ufficiali: Talianu.
Autŗi lingui : sicilianu, arbëreshë, dialetti lummardi e pruvinzali o lingui gallu-sìculi.
Capitali: Palermu
Tipu di Cuvernu: Riggiunali
Prisidenti: Raffaele Lombardo
Pruvinci : Agrigento, Caltanissetta, Catania, Enna, Messina, Palermo, Ragusa, Siracusa, Trapani
Superfici: 25,708 km²
Abbitanti: 5.098.034 (1998)
Dinzità: 198 /km²
Festi cchiù mpurtanti : 2 di giugnu 1946 (dâ Ripùbbrica Taliana)
25 di aprili 1945 (libbirazzioni d'Italia)
Valuta Euro (€)
Cuntinenti : Europa e Àfrica
Fusu urariu CET (UTC +1)
CEST (UTC +2)
Sigla automubbilìstica :   I (Italia)
Prifissu telefònicu : +39 (Italia)
Membru di : ONU, OSCE, UE, NATO, UEO. (Italia)
Localization dâ Sicilia
« Tali furono, o Siciliani, le gesta dei vostri padri nel secolo decimoterzo! Ripigliarono così la indipendenza di nazione, la dignità di uomini, e ne dettero esempio alla Scozia, alla Fiandra, alla Svizzera, che scuotevano a un dipresso a quel tempo, la dominazione straniera. »
« [...]picchì lu pòpulu sicilianu vincìu l'ùnica battagghia ca si miritava d'èssiri cummattuta: chidda di la curtura, arriniscennu a sarbari la sò idintitati pì li tèmpura, ustanti di li middi duminazziuni . »
« Sicilia è na terra bedda e disgrazziata. »
«  La Sicilia ntera è na diminsioni fantàstica. Comu si fa a vìviricci senza Mmagginazzioni? »



La Sicilia è n'ìsula taliana ntô Mari Miditirràniu. Si stenni pi 25,708 km² di supirfici e cci nni càmpanu 5.098.034 abbitanti (1998). È la cchiù granni riggiuni d'Italia e rapprisenta nu dudicèsimu di lu tirritoriu talianu.
Lu nùmmuru d'abbitanti è lu terzu cchiù àutu di tutti li riggiuna di l'Italia. Havi na dinzitati di pupulazzioni di 198 abbitanti p'ogni km².
Palermu è la capitali cu na pupulazzioni di quasi 700.000 abbitanti. La Sicilia si cumponi di 9 pruvincî e havi nu tutali di 390 cumuna di li quali 199, lu 51%, hannu menu di 5.000 abbitanti. La pupulazzioni risidenti nta sti cumuna cu menu di 5.000 abbitanti rapprisenta lu 10% di tutta la pupulazzioni dâ riggiuni.

È una dî centri turìstichi cchiù mpurtanti d'Italia e ntô sèculu XVIII era l'ùrtima tappa dû viaggiu ca li picciotti aristucràtici ngrisi facìanu 'n Europa pi struìrisi.


Giografìa

La Sicilia è l'ìsula principali d'Italia e di tuttu lu Mari Miditirràniu. Nclusi ntrâ riggiuni dâ Sicilia sunnu sti diversi ìsuli minuri: lu gruppu di l'Ìsuli Eolî (Lipari), Ìsuli Ègadi, Ìsuli Pilaggî, e l'ìsuli di Pantiddarìa, Lampidusa e di Ùstica. L'ìsula è muntagnusa assai e menu dû 14% dû sò tirritoriu è cumpostu di chianuri. La chianura cchiù granni è la Chiana di Catania. Lu Salsu è lu ciumi cchiù longu: 144 km.

L'ìsula veni siparata dû cuntinenti pi menzu dû Strittu di Missina (circa 3km). La Sicilia havi lu cchiù granni vurcanu d'Europa, l'Etna (vurcanu), chi è ancura attivìssimu. Tutta la riggiuni veni assuggittata a n'attivitati giològgica, e dui ìsuli vennu chiamati doppu àutri vurcani attivi, zoè Stròmbuli e Vurcanu.

La Sicilia nta na mmàggini dâ NASA.

L'ìsula di Sicilia pigghiau lu nomu di li Sìculi, nu pòpulu c'accuminza la sò storia nta tèmpura luntani. Pi la sô furma trianculari, la Sicilia, prima d'èssiri chiamata accussì, fu chiamata di li Greci "Trinacria", chi veni a diri Terra a tri Punti, pirchì la Sicilia effittivamenti è la terra di li tri prumuntorî: Capu Faru, o Piloru, a Est, pressu Missina; Capu Boeo, o Lilibbeu, a Ovest, pressu Marsala; e Capu di l'Ìsula di li Currenti, a Sud, pressu Capu Passaru.

La Sicilia è vagnata di l'acqui tèbbiti di tri mari: Mari Tirrenu, a Nord, Mari Miditirràniu, a Sud, e Mari Joniu, a Est. Tutti e tri sti mari, nni la giografìa munniali, hannu nu nomu sulu: Mari Miditirràniu, chi signìfica « mari 'n menzu li terri ». La Sicilia havi, nta lu Miditirràniu, na pusizzioni stratèggica assai bona, cu lu Strittu di Gibbilterra a Ovest, lu canali di Suez a Sud-Est e lu Strittu di Missina a Nord-Est. Lu puntu cchiù vicinu a l'Italia, nni lu strittu di Missina, è di tri chilòmitri e menzu. Lu puntu cchiù vicinu â Tunisia, ntô Canali di Sicilia, è di centucinquanta chilòmitri. È nta la Sicilia chi avemu l'Etna, lu vurcanu cchiù granni d'Europa, cu n'autizza di 3.263 metri, o quasi dùdici mila pedi. La basi di lu vurcanu è di 200 chilòmitri. A stu vurcanu, duranti la duminazzioni àrabba, ci fu datu, di l'Àrabbi, lu nomu di Gebel Utlamat chi voli diri muntagna di focu.

Giofisicamenti l'arcipèlacu maltisi, e la pinìsula rausana (Sarausa, Rausa) sunnu ntâ chiattafurma cuntinintali africana: n'àutri paroli sti dui riggiuni, nzèmmula a l'ìsuli Pilaggî, sunnu parti dû cuntinenti africanu.

Malta fici puliticamenti parti dâ Sicilia nzinu a lu 1798.

Clima

Exquisite-kfind.png Pi sapìrinni cchiossai, vidi puru la vuci Clima dâ Sicilia.


Lu clima dâ Sicilia è di tipu subtropicali, cu stati càudi e timpiraturi ca pònnu agghicari a 40 gradi cintigradi, e verna rilativamenti miti, cu timpiraturi ca raramenti scìnninu sutta li 5 gradi.

Storia

Exquisite-kfind.png Pi sapìrinni cchiossai, vidi puru la vuci Storia dâ Sicilia.


Lu Trisceli, sìmmulu dâ Sicilia, cumpari puru ntâ bannera siciliana.

Câ sò pusizzioni giogràfica, la timpiratura piacenti, la campagna abbunata e lu tirrenu vurcànicu abbicinu a Etna assai riccu e pruduttivu, la sò propia storia è una dî guerri e dî rivurturi.

Abbitata dî Sìculi, dî Sicani e di l'Elimi, già dû terzu millenniu a.C., ntô VIII sèculu a.C. foru li finici chi si nstallaru ntâ parti uccidintali. Ntô sèttimu sèculu li greci funnaru diversi culònî nta parti a urienti, 'n particulari Naxos, Camarina, Missina. Sarausa funnata ntô 734 a.C. fu la citati cchiù mpurtanti. Ntô 212 a.C., 'n siquiutu â scunfitta di parti dî rumani, la Sicilia addiventa na pruvincia, sfruttata dî rumani pû frummentu, lu vinu e li tassi chi li cuvirnatura di l'èbbica mpunìanu â pupulazzioni. Cèlibbri fu a stu prupòsitu lu malu cuvernu di Verri. Ntô 464, la Sicilia è mmasa dî Vànnali a cui ntô 491 si sustitueru l'Ostrogoti di Tiuduricu chi ci dèttiru nu certu sviluppu ecunòmicu e suciali. Ntô 535 lu ginirali bizzantinu Bilisariu lìbbira la Sicilia dî bàrbari. La Sicilia fa parti dû mpiru bizzantinu. Dû 663 ô 668, lu mpiraturi Custanti II eliggi comu capitali Sarausa, pi megghiu addifènniri la Sicilia dî bàrbari e dî primi ncursioni musurmani. Ntâ secùnna mitati du IX sèculu, l'àrabbi sbàrcanu a Mazzara, cunquìstanu Palermu c'addiventa la nova capitali, e quarchi annu doppu, cu la cunquista di Sarausa ntô 878, la Sicilia è ntiramenti ntâ manu di l'àrabbi. Addiventa allura n'emiratu fatimita, pròspiru e tulliranti.


Tra lu 1060 e lu 1091 la Sicilia è arricunquistata dî nurmanni, e nnô cursu dû sèculu XII addiventa nu regnu putenti c'agghica a l'àpici sutta lu putiri di Fidiricu II di Hohenstaufen chi mori ntô 1250. Ntô 1266 la Sicilia passa ntê manu francisi, ma li vespru sicilianu1282 marca la fini dû putiri di l'Angiò. La Sicilia passa pirciò sutta lu putiri araunisi e ma pi cchiù di nu sèculu cuntinuava na guerra cu Nàpuli addimentri ca la Sicilia arristava nnipinnenti cû nomu: Regnu di Trinacria. A partiri dû sèculu XV, li cruni d'Arauna e Spagna si junceru e di ddu mumentu nzinu ê Burbuna, la Sicilia veni cuvirnata dâ Spagna.

Ntô 1713 passa ê Savoia 'n scanciu dâ Sardigna. Ntô 1734 lu regnu dî dui Sicilî è arricustituiutu sutta Carlu di Burbuni. Tra 1812 e 1848 cc'èranu armenu quattru rivuluzzioni ntrâ Sicilia contra li Burbuna. Chidda ùrtima, la rivuluzzioni nnipinnintista siciliana dû 1848, avìa lu risurtatu di nu cuvernu nnipinnenti dî Burbuna, cu la sò custituzzioni assai avanzata, chi durau pi 16 misi.

Li cammisi russi di Garibbardi sbarcaru a Marsala ntô 1860 e cu nu plibbiscitu quarchi misi doppu la Sicilia vinni unificata cu lu regnu d'Italia. Doppu la secunna guerra munniali, e la riprissioni di nu muvumentu nnipinnintista, la Sicilia uttinni na certa autunumìa amministrativa, cu parramentu e liggi propî.

Amministrazzioni/Pulìtica

1946 la Sicilia godi di na certa autunumìa amministrativa. L'Assemblea Siciliana è lu parramentu sicilianu chi havi la sedi a Palazzu dî Nurmanni, a Palermu. Lu parramentu sicilianu è unu di li cchiù antichi dû munnu. Novi pruvinci fannu parti dâ Sicilia: Palermu, Catania, Missina, Sarausa, Rausa, Girgenti, Trapani, Caltanissetta e Enna.

Exquisite-kfind.png Pi sapìrinni cchiossai, vidi puru la vuci Statutu d'autonumìa sicilianu.


Li cumuna:

Cultura

La Sicilia, già di l'antichità, hà datu cuntribbuti culturali di tutti li campi dâ cultura. Artisti e ntillittuali siciliani secunnu li vari campi dâ cultura si distingueru ntî sèculi ggià a pàrtiri di l'antichità.

La cultura n Sicilia si manifesta cu na cirta vivacità di la cirazzioni artistica, ntô cìnima, cô Festival ntirnazziunali di Taurmina ntô tiatru, chi si distingui ntô tiatru di prosa, tiatru anticu, rapprisintatu ogni annu ntê tiatra grechi di Sarausa, Taurmina, Seggesta, e ntô tiatru n lingua siciliana, puru assai apprizzatu.

Cucina e Gastronumìa

Exquisite-kfind.png Pi sapìrinni cchiossai, vidi puru la vuci Cucina siciliana.


  • Alici crudi a lumìa
  • Nvultini di pisci spata
  • Capunata
  • Parmiggiana Siciliana
  • Pasta chî sardi
  • Maccu di favi
  • Macchiruna â Siciliana
  • Paneddi di cìciri
  • Purpetti di nannatu
  • Salmurigghiu
  • Arancini
  • Piscistoccu â Missinisi
  • Pizza fritta â Siciliana
  • Mustazzuli Siciliani
  • Cannoli
  • Pasta riali
  • Zèppuli di risu
  • Granita
  • Cassata
  • Frutta Marturana
  • Sfinciuna di risu
  • Torta di mènnuli
  • Torta di pistacchiu
  • Pignuccata
  • cuscus â trapanisi

Taliati macari

Searchtool.svg
Talìa macari: Purtali dî tradizzioni dâ Sicilia.
Commons-logo.svg Nta Commons s'attròvanu àutri mmàggini rilativi a Sicilia.

Lijami di fora

Bandiera della Regione Sicilia Pruvincî dâ Sicilia Bandiera della Regione Sicilia
Caltanissetta | Catania | Enna | Girgenti | Missina | Palermu | Rausa | Sarausa | Tràpani

Template:Link FA Template:Link FA