Pruvincia di Rausa

Pruvincia di Rausa
Nomu ufficiali:	Provincia Regionale di Ragusa
Riggiuni:	Sicilia
Capulocu:	Rausa
Superfici:	1.614 km²
Abbitanti:	308.103
Dinsità:	190 ab./km²
Cumuni:	12 – lista

A pruvincia di Ragusa è na pruvincia dâ Sicilia di 308.103 abbitanti. Àvi n'aria di 1.614 km² e na dinzitati di 190 abbitanti p'ogni km². S'affaccia nnô mari miditirraniu e, nzèmmula câ pruvincia di Saragusa, è a pruvincia cchiù miridiunali dâ Sicilia. Cunfina chî pruvinci di Saragusa, Catania e Nissa.

I cumuna cchiù mpurtanti su': Ragusa, Mòdica, Vittoria, U Còmisu, Scìchili, U Puzzaḍḍu, Spaccafurnu, Biscari, Chiaramunti e Giarratana.

L'ecunumìa

È la pruvincia cchiù ricca dâ Sicilia comu rèdditu pro-càpiti, grazzi â so ecunumìa ciurenti, picchì si sbiluppau rapidamenti e cuntinuamenti di l'anni 60 dû XX sèculu.

L'ecunumìa dâ pruvincia di Ragusa si funna suprattuttu ncapu a l'agricurtura e a pruduzziuni ntinsiva. Nnâ cità di Vittoria esisti unu dî cchiù 'ranni mircati a l'ingrossu di frutta e virdura di tutta l'Italia.

U turìsimu di massa nun è assai sbiluppatu. Grazzi â classificazziuni di l'UNESCO dî cità di Ragusa Ibbla, Mòdica e Scìchili, nu turìsimu aduci si sta lintamenti sviluppannu.

Curiusità

A pruvincia di Ragusa è quarchi vota suprannuminata 'n senzu pusitivu "a pruvincia babba". Una dî raggiuni di stu suprannomu è ca a mafia - macari ca è prisenti 'n certi sittura di l'ecunumìa - a diffirenza di l'autri pruvinci nun à' cunnizziunatu nigativamenti l'ecunumìa e a pruvincia s'à' pututu sbiluppari rilativamenti sana, tantu ca òccupa na pusizziuni bona ntra i classìfichi ncapu â qualità dâ vita dî cità dû sud di l'Italia.

A parrata ragusana è carattirizzata dû finòminu dâ palatizzazziuni ca fa canciari u sonu dâ majuri parti dî "-ch-" 'n "-c-" moḍḍi quannu chista veni sicutata di na "e" o di na "i". Accussì paroli comu chiavi, chiovu, chiazza addivèntanu ciavi, ciovu, e ciazza. È chiaru ca chistu è sulu una dî particularità dû dialettu sicilianu mitafunèticu sud-urintali.