Carlu Muratori
Carlu Muratori (o Carlo Muratori n talianu) è un musicista sicilianu ca nascìu a Sarausa lu 19 di sittèmmiru dû 1954.
Biografìa
[cancia | cancia la surgenti]Li sò primi spirienzi juvinili foru comu chitarrista rock e pop. Ntô 1975 havi accuminzatu a appassiunàrisi â cultura pupulari siciliana; l’usi tradizziunali, li canti e li mùsichi dâ pòvira genti dâ sò terra: la Sicilia.
S’havi didicatu, quinni, pi anni ô studiu e â ricerca dâ mùsica di tradizzioni orali, cullabburannu tra l'àutru cu lu nzigni studiusu ibbleu Antonino Uccello ô nternu dâ sò Casa Museo di Palazzolo Acreide.
Ntô 1977 havi furmatu I Cilliri, un gruppu musicali cu lu quali havi divurgatu arcuni di li canti pupulari di travagghiu, di lutta, d'amuri purtati â luci cu li sò ricerchi. Cu I Cilliri hà esiquitu dicini di cuncerti nta tutta la Sicilia e havi ncidutu dui arbum "Sutta 'n velu" (1979) e "Dda bbanna a muntagna" 1980.
Ntô maiu di 1987 havi pubbricatu l'arbum "Afrodite", comu sulista: n'arbum spirimintali, na mùsica di chiara matrici ètnica, ma nun pi chistu "antica". Nzèmmula a li strumenta acùstici tradizziunali s'ammìscanu sònira d’àutri culturi e sònura alittrònici, canti pupulari e novi canzuni. C'è na cuntaminazzioni tra jazz, folk, pop.
Ntô 1983 havi custituitu l’assuciazzioni culturali Folkstudio-SR, cu un ensemble musicali stàbbili cu cui hà ntraprinnutu campagni di ricerca supra la mùsica sacra siciliana di tradizzioni orali. Havi mittutu ‘n scena "Li tri chiova", spittàculu di mùsica e puisìa supra li canti prucissiunali dû Venniridìa Santu; e "Stidda di l'Orienti" supra li tradizzioni natalizzi.
Ntô 1994 accumenza la svota cantauturali. Firma un cuntrattu discugràficu cu la CGD – WARNER pi la quali pùbbrica dui disca di rara biddizza, di cui è auturi di li testi e cumpusituri: nesci "Canti e Incanti" (nuvèmmiru di 1994), e "Stella Maris" (marzu di 1996). Cu lu primu cd vinci a dicèmmiru di 1994 lu premiu nazziunali Piero Ciampi. Li ricinzioni supra tutti li rivisti spicializzati (e nun) hannu statu entusiasti e unànimi.
A giugnu di 1995 havi participatu pi Max-Generation a lu festival SONORIA di Milanu. Dui brani di l’arbum hannu statu appoi nziruti comu culonna sunora di LA PIOVRA 7.
Cu "Stella Maris" havi vinciutu lu primu premiu ntô referendum ndittu di Vivere Giovani (dû cutidianu La Sicilia) comu megghiu arbum d’auturi sicilianu dû 1996.
Ntô giugnu di 1997, a Vercelli, havi statu mmitatu a rapprisintari la Sicilia a FOLKERMESSE, l’archestra spurimintali di mùsica ètnica furmata di li musicisti taliani cchiù rapprisintativi di lu gèniri (Ambrogio Sparagna, Riccardo Tesi, Daniele Sepe, Elena Ledda, Lucilla Galeazzi e àutri). Havi ncisu ntô dicèmmiru di 1997 "Stidda di l’Orienti"b- lecchi di canti natalizzi dâ genti di Sicilia.
A dicèmmiru di 1998 havi participatu (‘n rapprisintanza di l’Italia) a l’IBM Word Music Festival di Belo Horizonte ‘n Brasili, classificànnusi a lu primu postu ntâ classìfica di gradimentu stilata di lu prùbbicu e dâ crìtica dâ Rassegna brasiliana.
A marzu di 1999, pruduttu di l'AICS, havi pubbricatu Pesah elabburazzioni pi coru pulifònicu e archestra di càmmira dî lamintazzioni dû Venniridìa Santu 'n Sicilia. Di fini giugnettu a li primi d'austu, urganizza e diriggi (sinu dâ stati dû 2000) LITHOS-transiti a sud est, na rassegna nazziunali di mùsica pupulari e novi tinnenzi, cu di l’itinerari timàtici c’attravèrsanu la pruvincia di Sarausa. La Rassegna st'annu è junta â sò sèttima edizzioni. Ntô cuntempu è mpignatu ntôn rilivamentu di li finòmini etno-musicali di l’Ibblei sarausani; e sta cunnucennu na ricerca, cu riggistrazzioni supra lu campu, supra li canti dû travagghiu e supra la mùsica sacra dî paiseddi dâ pruvincia.
Havi cullabburatu â stisura di Thapsos, lu cd di Riccardo Tesi pi lu Manifesto, pi lu quali havi scrivutu tri brani (Fammi ballare, e lu testu di Largo Waltzer e Thapsos), e pi lu stissu auturi havi scrivutu LUNE, ca grapi lu cd omònimu pi lu Manifesto.
Ntô jinnaru di 2001 havi nisciutu PLICA POLONICA – non tagliate quella treccia, lu sò cchiù ricenti travagghiu cantauturali.
Ntô marzu di 2004 la rivista World Music Magazine havi pubbricatu la ri-mastirizzazzioni ‘n diggitali di li dui disca ‘n vinili di li Cilliri di l’anni 80. Cullàbbura spissu cu lu munnu dâ Scola, unni teni cunfirenzi, labburatori musicali e lezzioni-cuncertu supra li temi dâ mùsica pupulari.
Ntô jinnaru di 2005 havi nisciutu SICILY, cugghiuta di cover tradizziunali siciliani. Cu stu cd havi vinciutu lu premiu di Loano (SV) pi la mùsica pupulari.
Ntô 2006 havi musicatu pi lu tiatru IL VITALIZIO di L. Camilleri pi la riggìa di W,Manfrè, misu ‘n scena dû Teato Stabile di Catania e dû Teatro Vittorio Emanuele di Missina.
Ntô 2007 havi cumpunutu la canzuna d'apirtura dû film "L'uomo di vetro" di Stefano Incerti pi Rai Cinema e Red Film. A marzu di 2007 havi accabbatu li riggistrazzioni dû sò novu discu cantauturali di pròssima pubbricazzioni.
Innu nun ufficiali dâ Sicilia
[cancia | cancia la surgenti]Scrivìu e cantau l'innu di la Sicilia (nun ufficiali).
Discugrafìa
[cancia | cancia la surgenti]- Sutta 'n Velu - 1980
- Dda'bbana a muntagna - 1981
- Afrodite - 1987
- Storie di popolo - 1993
- Canti e Incanti - 1994
- Stella Maris - 1996
- Stidda di l'Orienti - 1997
- Pesah - 1999
- Plica Polonica - 2001
- Carlo Muratori e I CILLIRI - 2004
- Sicily - 2005
- La Padrona del Giardino - 2008