Caltaggiruni

Caltaggiruni
Dittagghi: Stemma di Caltaggiruni
Muttu: Urbs Gratissima (Città bonu vuluta)
Nomu ufficiali:	Caltagirone
Riggiuni:	Sicilia
Pruvincia:	Catania
Cuurdinati:	37°14'0"N, 14°31'0"E Ammustra ntâ mappa
Superfici:	382 km²
Abbitanti:	38.220
Dinzitati:	96 ab./km²
Cumuni cunfinanti:	Acati, Gela, Grammicheli, Licuddìa, Mazzarinu, Mazzarruni, Miniu, I Macchiri, Niscemi, Chiazza , Sammicheli
CAP:	95041
Prifissu telefònicu:	0933
Situ ufficiali:	http://www.comune.caltagirone.ct.it/

Caltaggiruni (Caltagirone nnû talianu) è 'n cumuni di 37 953 abbitanti dâ Città metrupolitana di Catania.

È luntana 68 km dû sò capulocu pruvinciali Catania e 195 km dû sò capulocu riggiunali Palermu. È lu quintu cumuni cchiù populatu dâ Città metrupolitana catanisi e lu primu pi grandizza tirritoriali. È ntrê 25 cumuna dâ Sicilia pi populazzioni e lu quintu pi grandizza. È sedi piscupali (Piscupatu di Caltaggiruni, nnû talianu Diocesi di Caltagirone) dû 1816. È capulocu di'n grandi cumprinsoriu tirrituriali, chiamatu nnû talianu Calatino e Sud Simeto (macari canusciuti comu li paisa caltaggirunisa), chi è nnâ parti miridiunali di l'enti metrupolitanu di oji.

Chiesa di San Francescu â Mmaculata

Paisaggiu di campagna ntra Caltaggiruni e Chiazza

Centru urbanu misu centralmenti ntrâ Sicilia cintrali, chiḍḍa urîntali e lu liturali meridiunali, è celebri pâ produzziuni dâ ciramica, la quali la renni lu majuri centru riggiunali e unu dî cchiù mpurtanti d’Italia.

Fu pi ultra dui millenni 'n puntu stratèggicu di cuntrollu pi assai populi chi contrullavanu li chiana di Catania e Gela, ntra di cui li greci, li bizzantini, l'arabbi, li ginuvisa, li aragunisa e li nurmanni. È vidè nu mpurtanti centru agriculu, pî so grandi campagni, comu Chianu Sampàulu, Costabbaira, lu Nuci, lu Mazzuni e Rannasìa.

Lu centru storicu avi lu titulu di Patrimoniu di l’umanità UNESCO dû 2002, facenti parti dû consorziu du Vaḍḍ'i Notu, nzemmula ê città di Catania, Militeḍḍu, Scicli, Modica, Ragusa, Notu e Palazzolu.

L'etimoluggìa dû nomu diriva di l'àrabbu: si sapi ca la prima parola significa casteḍḍu (qal'at), ma l'àutra parti è di etimoluggia ca nun è canusciuta, e nun si sapi pi certu zoccu putissi significari; pi chistu mutivu, li studiusi, cchiù o menu titulati, ànu prupostu assai significati, chi ponu purtari â storia greca (picciò Casteḍḍ'i Gela o Casteḍḍ'i gilisi), â storia midîvali (Casteḍḍ'i ginuvisi) u ô tirritoria 'n quantu tali (Casteḍḍ'i grutti, Casteḍḍ'i cignali, Casteḍḍ'i quartari, ecc.)

Chiazza Bellini, unu dî posta cchiù canusciuti dû centru novu di Caltaggiruni, nfacci ô viali Mariu Milazzu

Oji, ultra lu celebbri centru storicu, la città avi vidè n'area abbitata di età recenti, misa a sud-ovest, unni putemu truvari alcuni mpurtanti vî, palazzi, lochi e chiazzi centrali dâ città. Chista parti dâ città è oji lu cori urbanu dû cumuni, unni a majurìa dî pirsuni abbitanu (quasi 20 000 su' picca cchiù di 35 000 pirsuni).

La città mustràu sempri l'ambizziuni di essiri capulocu di na sò pruvincia chi fussi chiù o menu lu territoriu dî paisa caltaggirunisi (Calatino e Sud Simeto), accussì comu la vicina Gela chî sò paisi di l'area gilisi. È lu secundu centru dâ Sicilia cintrali cu cchiù abbitanti, dopu Cartanissetta e davanzi cumuna comu Caniattì, Dirnò e Castruggiuvanni.

Frazzioni

Pâ grandizza dû sò tirritoriu, Cartaggiruni avi diversi frazziuna, arcuni di chisti sunu luntani dicina di chilometri dâ città. Li cchiù canusciuti e mpurtanti sunu:

• Granieri (frazziuni li cui abbitanti veninu dê cumuna dâ pruvincia di Ràusa)
• Santu Petru (frazziuni ca si sviluppàu 'n facci ô boscu omonimu)
• Chianu Sampàulu (frazziuni agricula a quarcu chilometru dû paisi)
• Favareḍḍa (frazziuni li cui abbitanti sunu grammichilisi)

Giamillaggi

• San Diego - Venezzuela
• Kallikrateia - Grecia
• San Franciscu - Stati Uniti di Mèrica
• Arnsberg - Girmania
• Mdina - Malta
• Bittilemmi - Palistina
• Abbadia Larana - Talia

Nasciuti a Caltaggiruni

• Don Luiggi Sturzu, parrinu, funnaturi dû Partitu Pupulari Talianu, sinaturi a vita dâ Ripubblica Taliana
• Mariu Sturzu, frati di Luiggi Sturzu, piscupu di Chiazza
• Carmelu Càristia, diputatu dâ Ripubblica Taliana pâ Dimucrazzia Cristiana
• Giambattista Fanales, diputatu dâ Ripubblica Taliana pû Partitu Comunista Talianu
• Gnaziu Muntimagnu, piscupu di Girgenti
• Juseppi Missina, riggista cinematograficu
• Nnucenzu Marcinnò, riliggiusu
• Francescu Parisi, senaturi dâ Ripubblica Taliana
• Domenicu Semineriu, scritturi
• Antuninu Raguna, studiusu dâ ciramica
• Nicola Longubardi, gisuita missiunariu â Cina
• Silviu Milazzu, puliticu già presidenti dâ Riggiuni Siciliana e funnaturi dâ Uniuni Siciliana Cristianu Suciali
• Mariu Scelba, puliticu già presidenti dû Cunsigghiu dî Ministri dâ Rippubblica Taliana e midè già Ministru dô Ntiriuri.
• Gisualdu Clementi, medicu e prufissuri, già Magnificu Ritturi dâ Univirsitati di Catania
• Saveriu Fragapani, architettu
• Gualteru di Caltaggiruni, nobbili e puliticu dû periudu dî Vespri Siciliani
• Ottavia Penna Buscemi, pulitica, diputata dâ Assemblea Costituenti dâ Ripubblica Taliana pû Fronte dell'Uomo Qualunque
• Salvaturi Castagna, ginirali militari
• Paulu Ciulla, fàusaru di muneta
• Marianu Giaquinta, matimaticu
• Jacupu Rannazzu, diriggenti sportivu, già presidenti dâ Atalanta Bergamasca
• Alessiu Narbuni, gisuita e storicu
• Mariu Sampirisi, jucaturi di palluni, difinsuri dû Monza
• Nicole Grimàudu, attrici pû cinema e la televisiuni

Dialettu

Chiazza Umbertu I: si vidi la Cattidrali e lu Munti di Pietà

A Caltaggiruni, ntra li secula XIX e XX, in virtù di l’unificazziuni nazziunali e dâ diffusiuni di menza di communicazziuni di massa visiva e stampata, l’usu dâ lingua taliana si allargàu in quasi tutti li abbitanti e midé in registra diversi di chiḍḍi furmali. La lingua siciliana pirò è vidé presenti, nnâ sò varianti cittatina.

La so varietà lucali, lu caltaggirunisi, è 'n dialettu di transizziuni, chi avi elementa urîntali ( giniralmenti lìati ô catanisi, ma forsi pigghiati dû missinisi) e elementa cintrali (famigghia di dialetta a unni pirtenunu chiḍḍi di Castruggiuvanni e Nissa). Avi forti nfluenza ligguri (probabilmenti savunisi). Comu'n autri dialetta dû sicilianu, sunu prisenti nfluenzi dî lingui castigghiana, catalana, pruvinzali, bèrbira, tuscana e greca, ultra a prestiti dû talianu e vidè du nglisi.

Sutta ci stanu arcuni asempi scritti:

Dichiarazzioni Universali di li diritti di l'Omu

"Ì crìstijani nasciunu tutti lìbbiri e tutti ì stìssi, pi dignità e dirìtti.

C'ànu u stìssu ciribeḍḍu e cuscienza, e s'han'a cumpurtari 'ntra ri ìḍḍi comu si fussuru frati râ stìssa matri."

Patri nostru

Patri nostru, chi si ndû cełu,

Santiffijatu vè u nommu tò,

vinìssi prestu u tò regnu,

sempri fatta vè a tò vułuntà,

comu ndû cełu accussi 'n terra.

Danni oggi u nostru pani cutidijànu,

e levini ì nostri debbita

'ccussi comu nuatri ì tugghìmu

ê debbitura nostri.

E nun ni bbannunari ndâ tentazzijoni,

ma lìbbirini dû màłi, AMEN.

Pi sapìrinni cchiossai, vidi puru la vuci Cullina di Sant’Ippòlitu (Caltaggiruni).