Buscemi

Dâ Wikipedia, la nciclupidìa lìbbira.
Jump to navigation Jump to search
Buscemi
Buscemi-Stemma.svg
Muttu:  
Nomu ufficiali: Buscemi
Pruvincia: Sarausa (SR)
Cuurdinati: 37°5'0"N, 14°52'0"E
Ammustra ntâ mappa
Superfici: 51 km²
Abbitanti: 1.147
Dinzitati: 24 ab./km²
Cumuni cunfinanti: Bucchjeri, u Càssuru, a Ferra, Giarratana (RG), Muòrica (RG), Palazzuolu Acrèidi
CAP: 96010
Prifissu telefònicu: +0931
Situ ufficiali: http://www.comune.buscemi.sr.it

Buscema (Prununcia IPA: /buʃˈʃɛmi/; Buscemi 'n italianu; Buxema latinu; Qalʾat ʾabi Šāma in àrabbu, prununciatu IPA: /qal.ʕɑt ʕaˌbi ʃaːˈmɑ/) è nu cumuni di 1.147 abbitanti dâ pruvincia di Sarausa. L'abbitanti su' chiamati buscimisi 'n sicilianu e "buscemesi" 'n italianu.

Etimoluggìa[cancia | cancia la surgenti]

L'orìggini dô nomi mudernu veni di l'àrabbu nticu قَلْعَة أبو شَامَة (Qalʾat ʾabi Šāma), locuzzioni ca veni ripurtata d'accussì nnô 1154 dô giografu hammudita Idrisi[1]. A traduzzioni ca veni data ô nomi àrabbu origginali è sulitamenti "Casteḍḍu di chiḍḍu cô niu" (o "câ vogghia")[2].

A palora qalʾat (قَلْعَة) significa casteḍḍu, fattu ca dinota a grandi mpurtanza strateggica e militari ca Buscema avìa 'n passatu e ca manteni macari ora pi menzu dâ bona visuali dâ Vaḍḍi 'i l'Ànapu.

Stu riferimentu àrabbu di na furtificazzioni, ca veni a mancari nnô nomi latinu Buxema, u truvamu mmeci ancora oji nni tanti autri citati sicialini comu a Cartaggiruni, Calatafimi, Calascibbetta. Macari u vicinu paisi dô Cassuru trova a so orìggini nnâ palora latina castrum, addiventata appoi l'àrabbu qaṣr (قَصْر).

Pi quantu cuncerni ʾabi, probbabbilmenti si tratta di na corruzzioni di ʾabū (أبو), palora ca àvi a funzioni di kunya, cioè nu titulu unurificu ca putissi siri traduciutu comu "patri di". Veni usatu quannu si voli purtari rispettu pi quarcunu mpurtanti, nni stu casu nu figghiu primu natu o macari na prima nata. È possìbbili pirò ca nni l'assenza di figghi u kunya veni mmintatu e spissu si pigghia a casu nu nomi di nu pirsunaggiu storicu pupulari; certi voti pò macari siri u nomi dô propriu patri. Pi finiri, putissi pirò nnicari na gnùria, ca si rifirisci a na carattiristica fisica dâ pirsuna 'n quistioni. Abbisogna macari diri ca u passaggiu â prununcia simplificata “bu” addipenni dô fattu ca nni tanti dialetti àrabbi è cumuni tagghiari u sonu ʔ postu all'inizziu di ʾabū (ca graficamenti è u signu ʾ ).

Šāma (شَامَة) è mmeci l'uggettu dâ locuzzioni e significa simplicimenti niu. Quindi ʾAbi Šāma putissi siri u nomi di na pirsuna spicifica, carattirizzata dâ prisenza di soccu niu nni soccu parti dô corpu, o puru putissi macari fari riferimentu ô nomi di n'antica famigghia àrabba.

Sicunnu autri l'omu cô niu avissi a siri nu riferimentu ô prufeta [[Maumettu]. A tali riguardu si cunta ca iḍḍu avissi nnâ carina 'stu granni niu ca fu vistu comu u Siggillu dê prufeti (Arabo: ختم النبوه, Khatam an-Nabiyyin), cioè u signu ca sicunnu i mussurmani addimustrava u so distinu di prufeta; nfatti sicunnu na ntirpritazzioni pigghiata dâ Bibbia l'urtimu prufeta s'avissi distintu pi 'stu signu purtatu nnâ spaḍḍa[3].

Cô tempu s'à pruvatu a scrìviri "Buscema" cu carattiri latini. Truvamu p'esempiu Abu Xamah o Abuxama[4] o puru ancora Abisama. A virsioni latinizzata Buxema e Bussema, dô piriudu nurmannu, è pirò chiḍḍa cchiù vicina â forma moderna. Cu l'Unitati d'Italia s'à passatu difinitivamenti â forma Buscemi, ma nnâ parrata lucali u paisi è sempri chiamatu Buscema.

Buscema e Buscemi è macari nu cugnomi assai diffusu 'n Sicilia, suprattuttu nni chiḍḍa orientali[5]. 'N menzu ê cchiù famosi pirsunaggi cu 'stu ccugnomi cc'è l'atturi Steve Buscemi.

Giografìa[cancia | cancia la surgenti]

Buscema si trova 52 chilòmetri a Ovest di Saracusa, 45 a Nord di Raùsa e 70 a Sud di Catania. È 'n capu ê Munti Ibblei, spicificamenti 'n capu ô munti Vignitti (jàutu 788 m s.l.m.), e nnô so tirritoriu cci passa u çiumi Ànapu; vicinu ê lochi storici di l'antica Akrai, di Casmeni e dâ Nicropuli di Pantalica. I cumuni cchiù vicini su' Bucchieri e Palazzuolo Crèidi, ca distunu menu di 10 chilòmetri.

Buscema vistu dî fora paìsi

Storia[cancia | cancia la surgenti]

Si penza ca i primi abbitanti dô paisi arrisàlunu a l'età dô bronzu, sicunnu li ritruvamenti di l'archiòlugu Paulu Orsi. Avemu àutri tracci dô paisi nnô pirìudu dâ duminazzioni àrabba. Di 'ssu mumentu s'ancumincia a aviri tistimunianza storica moderna di Buscema comu centru abbitatu. Nnô so tirritoriu ci su' macari i ritruvamenti di l'antica Casmeni, culonia greca dô 644 a.C. U paìsi fu distrurutu cumpritamenti quannu ci fu u tirrimotu dô 1693.

Munumenta[cancia | cancia la surgenti]

Festi[cancia | cancia la surgenti]

Noti[cancia | cancia la surgenti]

  1. “Il sollazzo per chi si diletta di girare il mondo”, altrimenti detta il “Libro di Ruggero”.
  2. http://www.comuni-italiani.it/089/004/
  3. Bibbia, Libro di Daniele capitolo 9,24: "per sigillare la visione e la profezia e consacrare il più sacro dei luoghi"
  4. unni a lettira x addiriva prubbabbilmenti di l'influenza dô grecu bizantinu e quindi si tratta di nu tintativu di riprudùciri graficamenti u sonu di na cunsunanti fricativa postarveolari surda [w:en:Help:IPA/Sicilian|ʃ]]
  5. G. Rohlfs: Dizionario storico dei cognomi nella Sicilia orientale, Palermo, 1984, p.55