Cci appizzau lu sceccu e li carrubbi

Dâ Wikipedia, la nciclupidìa lìbbira.

La sprissioni "cci appizzau lu sceccu e li carrubbi" o "persi lu sceccu cu tutti î carrubbi", si dici di n'affari ca si pinzava putìa èssiri vantaggiusu e ca, anveci, jivu malamenti. Cui pinzava ca stava pi fari nu bonu affari, appoi s'attrova a pèrdiri tuttu: non sulu lu sceccu , ma macari lu càrricu traspurtatu d'iddu, li carrubbi.

Urìggini dâ sprissioni[cancia | cancia la surgenti]

Giuseppi Pitrè, ca fu unu dê cchiù granni a cògghiri e catalucari la vuci dû pòpulu sicilianu, nni spieca l'urìggini dâ sprissioni cu stu cuntu:

Cc'era na vota un Capaciotu, unu di chisti cu la pagghia-luonga, e purtava un sceccu càrricu di carrubbi. Ncugna un malufujutu di chisti chi vannu strati strati, nfila la manu, e cci pigghia un pugnu di carrubbi. Lu Capaciotu cci abbia c'un càuciu nta li sigreti, e lu stinnicchia n terra. Cùrrinu li genti: - Mischinu, mischinu!...Stu viddannazzu! ca pi nenti ammazza li genti! - e cci vulìa chiantari di manu a lu Capaciotu. Nta mentri, vennu li sbirri, unu accùcchia a lu Capaciotu, n'àutru si pigghia lu picciottu assintumatu, e n'àutru lu sceccu. Causa, Patrucinaturi, Avvocati, cumprimentu a chistu, terzu a chiddu: lu pòviru Capaciotu nni niscìu pi puru miràculu; ma nta tricchi e barracchi cci appizzò lu sceccu e li carrubbi.

Lingua Siciliana
Cosi di tutti jorna - Azzioni umani - Prufissioni - Sprissioni Tipici - Lingua Siciliana