Franciscu Cafisu

Dâ Wikipedia, la nciclupidìa lìbbira.
Franciscu Cafisu

Franciscu Cafisu (Francesco Cafiso 'n talianu) (Vittoria, 24 di maiu 1989) è nu sassufunista (sassòfunu cuntraltu) sicilianu.

Biografìa[cancia | cancia la surgenti]

Franciscu è nu musicista e cumpusituri, cunziddiratu unu dî cchiù carusi talenti [1] e mpurtanti dâ storia dû jazz. Ntô 2006 si diplumau 'n "Fràutu traversu" cû màssimu dî voti ô Liceu Musicali Parificatu V. Bellini di Catania. Sunau chiossai di na vota ntâ Mèrica, ô Lincoln Center ntâ "Alice Tully Hall" e ntâ "Avery Fisher Hall", ortri ca ô Birdland, ô Iridium, ô Dizzy's Club Coca Cola, ô BB King, pristiggiusi jazz club di Nova York.
Hà sunatu macari nti àutri Festivals ntirnazziunali comu a chiddu di New Orleans, di Montreal, di Melbourne, di Tokio, di Londra, di Ouro Preto ntô Brasili, di Tallin 'n Estonia, ntê granni festivals aurupei tra cui, Vienna, North Sea (NL), Umbria Jazz, Piscara Jazz e tanti tanti àutri. Ntô marzu2004 participau cu successu, comu òspiti d'unuri, a lu Festival di Sanremu. Ntô 2008 diriggìu, cù granni successu, lu 1° "Vittoria Jazz Festival", fattu a Vittoria, la sò cità.
A lu 19 di jinnaru2009, pô "Martin Luther King Jr. day", a la viggìlia dâ trasuta di Barack Obama â Casa Janca, duranti li fistiggiamenti, Franciscu sunàu a Washington D.C. pô novu prisidenti miricanu nzemi a la Jazz at Lincoln Center Orchestra di Wynton Marsalis.

Cullabburazzioni[cancia | cancia la surgenti]

Hà cullabburatu cu artisti di fama ntirnazziunali comu a Bob Mintzer, a George Gruntz, a Maria Schneider, a Gianni Basso, a Joe Lovano, a Hank Jones, a George Mraz, a li Manhattan Transfer, a Wynton Marsalis, [2] [3] e la Lincoln Center Orchestra, la Count Basie Orchestra, Dado Moroni, Reggie Johnson, Doug Sides, Enrico Rava, Cedar Walton, Lewis Nash, Joe Locke, Mulgrew Miller, Ronnie Matthews, Jimmy Cobb, Jessie Davis, James Williams, Ray Drummond e Ben Riley, Vincent Harring e Wess Anderson.

Lu sò attuali quartettu è furmatu di Dinu Rubino, Riccardu Fioravanti e Stefanu Bagnoli. Si esibbisci ô spissi nti na furmazzioni chiamata Island Jazz Quartet furmata di Giuvanni Mazzarino ô pianuforti, Nellu Toscano ô contrabbassu e Dinu Rubino ca, nti stu pruggettu, sona la trumma.

Premî[cancia | cancia la surgenti]

Ntô 2001 vincìu lu “Premiu nazziunali Massimu Urbani”.[4] Ntô Sittèmmiru 2003 ci vinni datu lu Premiu Positanu Jazz.
Ntô 2004 participau a l'annuali Convention di li educaturi di jazz (I.A.J.E.) a Nova York duranti lu quali appi l'International Jazz Festivals Organization Award (I.J.F.O.). Ntô nuvèmmiru 2004, vincìu la "World Saxophone Competition" duranti lu London Jazz Festival. Ntô giugnu dû 2005, a la Casa dû Jazz, a Roma, appi lu prustiggiusu premiu "Django d'Or" comu megghiu giùvani musicista. Sempri ntô 2005 la “Swing Journal”, l’auturevuli rivista giappunisi di musica jazz, ci detti lu “New Star Award”, premiu arisirvatu ê talenti straneri nascenti. Sùbbitu doppu, l’affirmazzioni ntô Top Jazz, referendum dâ rivista taliana Musica Jazz, ca lu ricanusci cchiù megghiu novu talentu di l’annu 2005. La rivista francisi Jazz Magazine [5] ntô nùmmiru di nuvèmmiru dô 2005 lu ncludìu ntra li “125 talents pour demain et aujourd’hui”, [6] na lista ca cumprenni li cchiù significativi jazzisti under 40. Ntô 2005, Down Beat, la pristiggiusa rivista miricana didicata â musica jazz, ci misi nu cuncertu fattu a lu Piscara Jazz Festival ntô giugnettu 2002, 'n cullabburazzioni cô pianista Francu D'Andrea, ntra li 25 cchiù mpurtanti eventi dâ storia dû jazz.

Discugrafìa[cancia | cancia la surgenti]

  • Portrait In Black And White - cu Giuvanni Mazzarino, Dinu Rubino, Nellu Toscano. Venus, CD (2008)
  • Seven Steps To Heaven - cu Andria Pozza, Aldu Zunino, Nicola Angelucci. Venus, LP (2006)
  • Happy Time - cu Riccardu Arrighini, Aldu Zunino, Stefanu Bagnoli. Camjazz, CD (2006)
  • Jazz Italiano Live 2006 - Live at Casa di lu Jazz, Rome - cu Sandru Gibellini e Aldu Zunino. Gruppu editurialu l'Espresso (2006)
  • Tribute to Charlie Parker - cô quartettu e li Sulisti di Piruggia. Umbria Jazz Rec., CD (2005)
  • New York lullaby - David Hazeltine, David Williams e Joe Farnsworth. Venus, LP (2005).
  • Concerto for Petrucciani - cu Riccardu Arrighini (Triu) - Philology, 2 CD (2004)
  • Standing Ovation Pescara - cu Francu D'Andrea - Philology, CD (2003)
  • First - Orchestra jazz del Mediterraneo (Guest Pietro Tonolo) - Philology, CD (2002)
  • Very Early! - cu Stefanu Bollani, Fabbrizziu Bosso, Francu D'Andrea - Philology, CD (2001)

Rifirenna[cancia | cancia la surgenti]

  1. ^ http://ricerca.repubblica.it/repubblica/archivio/repubblica/2008/08/12/cafiso-la-scoperta-di-marsalis-ora-un.html
  2. ^ http://www.corriere.it/Primo_Piano/Spettacoli/2003/07_Luglio/29/cafiso.shtml
  3. ^ http://ricerca.repubblica.it/repubblica/archivio/repubblica/2005/07/04/francesco-cafiso-enfant-prodige-incontra-il.html
  4. ^ http://ricerca.repubblica.it/repubblica/archivio/repubblica/2007/01/11/prodigi-al-sassofono-con-francesco-cafiso.html
  5. ^ http://www.vaol.it/home.jsp?idrub=15864
  6. ^ http://www.acim.asso.fr/spip.php?article186

Lijami di fora[cancia | cancia la surgenti]