Assèdiu

Dâ Wikipedia, la nciclupidìa lìbbira.
(Rinnirizzata di Assediu)

L'assèdiu è na cunnizzioni militari 'n cui n'asèrcitu circunna e cuntrolla l'accessi a nu locu furtificatu cû scopu di custrìnciri li difinsuri ô suttamittìrisicci o di cunquistaricci câ forza.

L'assedi ntâ stòria siciliana[cancia | cancia la surgenti]

La Sicilia fu nvasa ntê vari èbbichi di pupulazzioni pruvinenti di tuttu lu Miditirraniu, causannu spissu guerri tra l'invasura e la pupulazzioni pricidintimenti stabbilita.

L'assediu rumanu di Sarausa[cancia | cancia la surgenti]

Ntô 212 a.C. la cità di Sarausa fu l'urtima cità greca a tummari sutta lu dumìniu rumanu. St'assèdiu, cumannatu dû ginirali Marcellu, passau â storia pi li ligginnari nvinzioni difinsivi di Archimedi, chi sprummintau pari nu specchiu usturi e nu cannuni a cumprissioni. L'assèdiu appi successu e Archimedi stissu fu ammazzatu di nu surdatu rumanu.

Lu primu assediu arabbu di Sarausa[cancia | cancia la surgenti]

Tra la stati dû 827 e la stati dû 828 la cità di Sarausa appi a subbiri n'assediu ârabu. Li truppi àrabbi eranu cumannati di Asad ibn al-Furat e si cumpunèvanu di circa 8-9000 òmini. Rinforzi navali agghicaru di Mazzara, cunquistata quarchi simana prima, ma la cità risistiu, grazzi puru ê rinforzi chi agghicaru dû dogi di Venezzia, Giustinianu Participazziu e all'inizziativi dû cuvirnaturi bizzantinu di Palermu, chi cummattiu contra l'àrabbi dû centru dâ Sicilia, forsi arriniscennu a rumpiri li rifornimenti chi agghicavanu a Sarausa via terra di Mazzara. Dicisiva fu la diffusioni di n'epidimia tra li surdati mussurmani, chi custrinciu a livari l'assediu ntâ stati dû 828.

Lu secunnu assediu arabbu di Sarausa[cancia | cancia la surgenti]

Ntô 878 la cità di Sarausa, cuvirnata di diversi sèculi di li bizzantini appi a subbiri l'affrontu di n'assèdiu àrabbu chi durau diversi misi. La flotta bizzantina nun potti (o nun volli) vèniri n succursu dî sarausani, chi rinisceru a difènniri la cità cu tutti li forzi. All'èbbica la Sicilia era ggià quasi cumpritamenti occupata di l'àrabbi, chi avèvunu scigghiutu comu capitali la cità di Palermu. La cità tummau doppu diversi misi pi la fami e li malatî chi cuminciaru a diffunnìrisi ntra la pupulazzioni.

L'assèdiu di Malta[cancia | cancia la surgenti]

Exquisite-kfind.png Pi sapìrinni cchiossai, vidi puru la vuci Assediu di Malta (1565).


Ntô 1565 l'arcipèlacu maltisi fu lu tiatru di n'assèdiu turcu. All'èbbica Malta era lu baluardu dâ civilizzazzioni uccidintali e cristiana, e li turchi vulèvunu pigghiari l'ìsula pi la sò pusizzioni stratèggica ntô Miditirràniu cintrali e urientali. L'assèdiu, puru chi durau diversi misi, s'accapau cu nu ritiru dî turchi. Li cavaleri di Malta forru aiutati n parti dî rinforzi spagnoli

Vidi puru[cancia | cancia la surgenti]

Wikimedaglia
Chista è na vuci nzirita nni l'artìculi n vitrina, veni a diri ca è una dî mègghiu vuci criati dâ cumunità.
Fu ricanusciuta nnô 16 di jinnaru 2008

S'hai traduciutu n'artìculu o hai criatu na vuci e riteni ca sia lu casu di fàrila canùsciri picchì è cumpreta n tuttu, signàlila. Naturalmenti, sunnu boni accittati suggirimenti e canciamenti chi mìgghiùranu lu travagghiu.

Signala na vuci          Archiviu         Vidi tutti l'artìculi n vitrina