Marranzanu

Marranzanu sicilianu.

Lu marranzanu (macari mariolu o ngannalarruni) è nu strumentu musicali nicu, custituitu di nu supportu a ferru di cavaddu (arcu mitàllicu curbu) rìggidu, di diàmitru variàbbili 'ntra li 4 e li 7 cintìmitri, a cui è fissata na suttili làmina d'azzaru (linguetta mitàllica) ca veni fatta vibbrari cu nu ìditu appuiannu lu supportu a li denti.

Stu strummentu, ca s'arritrova ntê tradizzioni musicali pupulari nun sulu dâ Sicilia, ma puru di diversi populi (in particulari 'n Europa miridiunali e 'n Asia), è unu dî cchiù antichi dû munnu. È nu strummentu musicali tìpicu di la mùsica folclurìstica 'n gèniri. In Sicilia lu marranzanu è tipicu di la mùsica folclurìstica siciliana e è usatu, 'n particulari, pî tarantelli e comu accumpagnamentu pi canzuna.

Cchiù ricentimenti lu strummentu è usatu puru nta l'arranciamenti di mùsica pi film western o di mùsica rock (The guns of Brixton dî Clash).