Tammureddu (strumentu)

Lu tammureddu (o tambureddu) è nu strumentu a pircussioni a mimbrana di urìggini antichissima; la prisenza ntê musei di statuini cô tamburu a curnici ntê manu, nni tistimonia l'antica èbbica di unni nni veni.

Li sò dimenzioni ponnu èssiri variabbili e havi na sula facci custituita di na mimbrana di peddi cunciata di caprettu o di cunigghiu ca veni stirata e tirata supra nu circhiu di lignu; a li voti, nta ssu circhiu , sunnu misi cianciani.
E' nu strumentu ca si pò sunari senza aviri pi forza na priparazzioni musicali, abbasta aviri lu senzu dô ritmu; si sona tinènnulu cu na manu e cu l'àutra battènnucci li nocchi, lu parmu o li jrita o scutulannuli pi fàciri tintinnari li cianciani. Ntâ Sicilia, stu strumentu è assai usatu dî gruppi fulclurìstichi p'accumpagnari canti, tarantelli e danzi pupulari.

Accussì comu pû bùmmulu, duranti li spittàculi dê gruppi fulclurìstichi, lu tammureddu veni usatu pi criari curiografii spittaculari jittànnulu nta l'aria pri diversi metri e ripigghiànnulu a volu.