Google

Google (prununzia /'gu:gl/) è nu muturi di circata pi Internet ca nun si pròccupa sulu di catalugari lu World Wide Web, ma tratta macari mmàggini, fotu, newsgroup e nutizzi, noltri a mantèniri na copia cache di tutti li pàggini ca canusci. Cu n'ìnnici ca cumprenni chiossai di 8 miliardi di pàggini Web, veni ricanusciutu comu lu cchiù granni e lu megghiu muturi di circata, pigghiànnusi lu 80% di tutti li circati fatti 'n capu Internet e avennu clienti comu AOL e Microsoft. La pupularità di Google è talmenti granni ca ntâ lingua ngrisa nascìu lu verbu "to google" ca havi lu significatu "fari na circata ntô web".

L'azzienna

Google vinni spummintatu ntô 1998 di Larry Page e Sergey Brin, ca a l'èbbica studiàvanu ntî l'Universitati di Stanford, doppu aviri sviluppatu la tiurìa secunnu cui nu muturi di circata abbasatu 'n capu l'anàlisi matimàtica dê rilazzioni ntra siti web avissi pututu fari megghi risurtati 'n cunfrontu ê tècnichi empìrichi addupirati ntô passatu. Cumminti ca li pàggini richiamati cu nu megghiu nùmmiru d'ipirculligamenti fùssuru li cchiù mpurtanti e miritèvuli (Tiurìa dê Riti), si mìsuru d'accordiu di canùsciri megghiu la sò tiurìa dintra li sò studi e mìsuru li funnamenta pô sò muturi di circata. Funnaru l'azzienna ntô sittèmmiru dû 1998.

L'azzienna, ca risiedi a Mountain View ntâ California, ntî l'accussì diciutu Googleplex, ô mumentu veni gistuta di capitali privati, li megghiu pussiditura dê quoti sunnu Kleiner Perkins Caufield & Byers and Sequoia Capital. Ntô uttùviru 2003, discurrennu na pussìbbili uffruta pùbbrica nizziali, la sucità vinni cuntattata dâ Microsoft 'n capu nu pussìbbili accordiu o fusioni; Google rifiutau l'uffruta. Ntô jinnaru 2004 vinni annunziata l'assunzioni di Morgan Stanley e Goldman Sachs Group pi urganizzari l'uffruta pùbbrica nizziali, ca putissi èssiri di quasi 4 miliardi di dòllari miricani, dannu a Google nu capitali di mircatu di 12 miliardi di dòllari, secunnu nu banchieri cuinvurggiutu ntâ tranzazzioni.

Lu 9 di marzu 2006, Google s'accattau dâ cumpagnìa Upstartle Writely nu word processor addupiràbbili tràmiti Browser, ca pirmetti la sarvata dê files pruduciuti ntî furmati assai spargiuti, pirmittennu na fàcili nterupirabbilità cu certiduni Software di pruduttività pirsunali. Pi finiri, lu 9 di uttùviru 2006, Google s'accattau macari lu purtali pê filmati amaturiali YouTube, veru finòminu di matassa ntra li carusi pâ facilità di cunnivisioni dê vìdiu amaturiali cu quasi 20 miliuna di visitatura ô misi, pô prezzu di 1,65 miliardi di dòllari.

Lu significatu dû nomu

La palora "Google" addiveni di googol, nomu spummintatu di Milton Sirotta (niputi minurenni dû matimàticu miricanu Edward Kasner) ntô 1938, pi fari capiri lu nùmmiru rapprisintatu di 1 cu appressu 100 zera. L'addupiramentu dâ palora fattu di Google rifletta lu vuluntà dâ sucità di urganizzari la granni matassa di nfurmazzioni prisenti 'n capu ô Web. Sparti lu tèrmini veni nzirragghiatu cu nu jocu di palori dâ palora ngrisi "goggle" (ca ntô sicilianu sunnu l'ucchiali di prutizzioni) pi chistu lu muturi di circata pirmetti di "taliari di vicinu" la riti. La palora Google richiama a na fantasiusa fòrmula màggica capaci d'attruvari la qualisiasi cosa 'n capu ô Web. Pâ dirivazzioni dâ fòrmula ci sunnu diversi upinioni rivali e cuntrastanti, ma la cchiù pupulari veni attribbuiuta a na pupulazzioni africana ca addupirava la fòrmula comu auguriu pâ caccia.

PageRank

PageRank è nu sirvizziu di Google pi uttèniri nfurmazzioni 'n capu la "affidabbilità" dâ pàggina pô sò liveddu di vìsita.

AdWords

AdWords è nu sèmprici sirvizziu di Google ca pirmetti la pubbricazzioni 'n capu ô Web di annunzi ca riguàrdanu lu propiu situ. Prezza pi click e tetta màssimi ragghiuncìbbili. Veni macari canusciutu comu Pay per click (Pubbricità unni si pàjanu li click).

È lu sirvizziu di Google ca pirmetti d'ammustrari ntô propiu situ li annunzi pubbricati di àutri siti tràmiti AdWords.

Li Server

Google addòpira na matassa di màchini cu chiossai di 450.000 computer GNU/Linux pi rispùnniri ê circati e catalugari lu Web. La Catalugazzioni è fatta di nu prugramma (googlebot) ca dumanna piriodicamenti novi copi dê pàggini ca canusci. Li link ntî sti pàggini vèninu taliati pi scupriri novi pàggini e agghiuncìrili ntô database, unni l'ìnnici, nzèmmula â cache, pigghia miliuna di terabyte.

Uttimizzazzioni

Di quannu Google addivintau unu dê mutura di circata cchiù canusciuti, assai webmaster hannu accuminciatu a gghiri appressu e a circàrisi di spiegari li canciamenti ntô pusizziunamentu (rank) dô sò situ.

Na nova catigurìa prufissiunali hà nasciutu pi assistiri ê webmaster e macari a l'azzienni pi fari megghia la pusizzioni dê sò siti ntê circati ntî Google, accussì comu macari supra àutri mutura di circata. Sti cunzulenti si pròccupanu di n'attività canusciuta comu "uttumizzazzioni dê mutura di circata" (Search Engine Optimization) ca havi lu scopu di spummintari pàggini e siti ca rispèttanu li rèuli dê mutura di circata arriniscennu a fari megghia la sò pusizzioni ntê risurtati dê circati.

Ntô web ci ponnu attruvari discurruti ntî forum o siti ca fannu rifirimentu a finòmini comu la Google dance. Si tratta di nu fattu, ca ora nun succedi cchiù, ca spuntava ntî nu pirìudu di picca jorna (quasi ogni misi) unni Google aggiurnava lu sò database e macari li risurtati dê circati. Ntra na dance e n'àutra li risurtati arristàvanu li stissi. La palora dance s'arrifirìa ô fattu ca pi certiduni jorna li risurtati dê circati canciàvanu (danzàvanu) cuntinuamenti prima di abbissàrisi. Ntâ stati dû 2003 Google canciau li sò abbitùdini di catalugazzioni limitannu l'effetti dâ "danza": ora li risurtati dê circati càncianu 'n manera viloci e cuntinuativu senza nuddu stravurgimentu piriòdicu.

Una dê sfidi cchiù mpurtanti di Google, ora ca lu muturi addivintau pupulari ntra l'utenti dû web, è mpidiri ca genti senza judizziu arrinèscinu a furzari li dibbulizzi di l'algoritmu pi canciari li risurtati dê circati a sò piaciri. Assai cunzulenti pi uttumizzazzioni scarsamenti prufissiunali hannu circatu di addupirari tècnichi fasulli e dannusi pi canciari lu pusizziunamentu dê siti di certiduni dî sò clienti. Google arriniscìu a cumannari assai sti provi raffinannu lu sò algoritmu pi vìdiri li siti ca fannu nfamiati e limitàrini la rilivanza ntê risurtati (oppuru macari luvari sti siti dê sò archivia). Nu bonu pusizziunamentu ammenzu ê risurtati di Google pò fari vèniri sordi câ pala, suprattuttu pê siti di e-commerce. La scigghiuta di nu cunzulenti seriu è spissu stratèggica pâ supravivvuta o lu successu di nu situ. Pi sti mutivi, Goggle pubbricau na matassa di lìnii guida pi ajutari li prupitari dê siti a capiri comu attruvari cunzulenti prufissiunali e comu scanziari truffi.

Google e la liggi

Google hà statu criticatu pi via dê cookie ca si ni va mittennu ntê computer di l'utenti; n ogni casu la megghia parti dê sirvizzi di Google ponnu macari èssiri addupirati macari chê cookie disattivati.

Nu nùmmiru di urganizzazzioni hannu addupiratu li liggi supra ô DMCA pi dumannari a Google di luvari link di matiriali di àutri siti unni chisti riguàrdanu li sò dritti di copyright. Google rispunnìu a sti dumanni luvannu li link e mittènnunni unu â dumanna ntê risurtati dâ circata. Ci hannu statu macari crìtichi 'n capu ô fattu ca la cache di Google nun rispetta lu copyright, pi tutti li casi lu caching è nu nurmali prucessu dê funzioni dû web e lu prutucollu HTTP metti a disposizzioni miccanismi pi disattivàrilu.

Ntô 2002 si spargìu la nutizzia ca ntâ Cina la trasuta a Google avìa statu ntuppata (lu cuvernu havi lu cuntrollu dâ riti e pò luvari lu liami a bbèri certiduni siti). Nu situ mirror (nti tutti li senza, cumprinnutu lu testu ca jìa di dritta a manca; mirror littirarmenti veni a significari specchiu) chiamatu "elgooG" fu capaci di passari stu divietu. Passau lu tempu, lu divietu finìu e fu diciuta ca nun avìa statu fattu pi ntuppari li circati, ma la trasuta ntâ cache (ca pirmittìa di passari àutri divieta misi dû cuvernu). Esisti macari nu mirror di Google ca funziona comu proxy server ô nnirizzu http://www.zensur.freerk.com/google/. È ntirissanti nutari ca nu sirvizziu di caching veni rializzatu macari di Internet Active, unni pirò nun vinni ntuppata la trasuta.

Diversamenti di Yahoo!, Google nun è na directory; tutti li pàggini di Google sunnu innicizzati 'n manera automàtica di nu algoritmu statìsticu ca valuta la cunchiusioni dû situ chê palori chiavi innicati, quali palori dàricci, lu nùmmiru di trasuti e àutri paràmitri comu innicatura di qualità dû situ.

Cu tuttu chistu, Google sarva na cache di tutti li pàggini innicizzati e la leva dê sò server sulu sutta chiara dumanna dû patruni dû situ/provider internet.

La prova diciuta di Google è custruiri nu World Wide Web, primiari li siti di qualità dannu megghia "luci" ntê primi risurtati dê diversi circati, di sèrviri a l'utenti pi aviri rispunnuti suddisfacenti ê sò circati. Assai mutura di circata hannu macari na funzioni cummirciali; diversi azzienni pàjanu nu ranking ntra li primi 10 risurtati comu spisa pubbricitaria.

Google e la cinzura

Lu sirvizziu Google News cinisi, di nova ntruduzzioni, fussi fattu 'n capu li nicissità di cinzura dû paisi urientali. Certiduni nutizzi ca appartèninu ê siti cinzurati dû cuvernu di Pechinu nun vinìssuru pubbricati trasennu ntô purtali tràmiti na cunnissioni cinisa.

Tuttu chistu niscìu tràmiti li signalazzioni junciuti di nu vuluntariu di DynaWeb (proxy ca pirmetti a l'utenti cinisi na trasuta anònima capaci di nèsciri dâ putenti cinzura cuvirnativa): dipenni la lucalità dê circati li risurtati nèscinu diversi e pàrinu èssiri jittati fora particulari tistati.

Cu tuttu di Screenshot veni macari ammustratu comu tistati comu www.epochtimes.com.au e www7.chinesenewsnet.com nun ponnu èssiri pigghiati ntra li risurtati quannu na circata veni fatta quannu unu s'attrova dintra lu tirritoriu cinisi.

Secunnu quantu diciutu di P2Pnet.net, lu situ ca fici nèsciri la storia, Google attribbuisci a "na divirsità di scaciuna" la dicisioni di niari lu link a certiduni tistati e, ntra chisti scaciuna, la vera mpraticabbilità dâ trasuta ntô situ di arcuni lucalità.

Lu primu portavuci contru ô Matrix cinisi è Bill Xia ca ammutta direttamenti 'n capu la matrici ideològgica li scaciuna di tutti cosi. La tiurìa di Xia pari èssiri cunfirmata di certiduni ducumenti nterni pubbricati dô San Francisco Chronicle, secunnu chisti l'attività dû paisi urientali sunnu cumannati di liggi ca arrìvanu a vìdiri macari giusti filtri web pi siti chê cuntinuti illigali.

Chiossai proccupanti dâ nutizzia di na pussìbbili cinzura, è l'abbilitazzioni dê nurmali risurtati di circata ntî Google cinisi dû filtru "Safesearch" 'n manera pirmanenti. Tali filtru havi lu scopu di prutèggiri li minuri dû matiriali pornugràficu ca c'è ntô web. Si si fannu pirò certiduni particulari circati ntô Google cinisi, si veni avvirtuti ca lu filtru "Safesearch" è addumatu. La cosa particulari è ca li vuci 'n chistioni sunnu, p'asempiu, "Dalai Lama", "Falun Gong", nzèmmula ê palori "libbirtà", dimucrazzìa" e sumigghianti. È pussìbbili mèttiri 'n cunfrontu li risurtati dê circati ntra la virsioni cinisi dû muturi di circata e chidda uccidintali addupirannu sti nnirizzi. Ntî l'asempiu si cèrcanu li mmàggini ô quantu â palora "Dalai Lama". Ntra li cchiù significativi diffirenzi lu nùmmiru di risurtati (81 pâ virsioni cinisa, 44.100 pi chidda uccidintali) e la mancanza ntî chidda cinisa dâ mmàggini câ facci dû capu spirituali tibetanu.

Virsioni taliana: [1]

Virsioni cinisa: [2]

Cchiù putenti è la cinzura supra ô muvimentu spirituali pacifista "Falun Gong". Lu Google uccidintali nun hà scanzìa li mmàggini dâ durizza dâ riprissioni dû cuvernu cinisi contru â setta ca dumanna libbirtà civili e dritti riliggiusi pô pòpulu cinisi. Lu Google urientali duna àutri risurtati cumpritamenti diversi, purtannu siti e cummenti 'n capu â setta ca sunnu pirfittamenti alliniati câ prupaganna dû riggimi.

Virsioni taliana: [3]

Virsioni cinisa: [4]

Dê pisanti ammuvuti di l'opinioni pùbbrica, Goggle s'addifenni dicennu ca si tratta di nu sèmprici cuntrollu di pornugrafìa e di matiriali illigali. Chistu è facirmenti smintìbbili di na prova diretta, ma cu tuttu chistu Google nun cancia li sò dichiarazzioni.

Certiduni funziunalità di circata avanzata

Circata cu upiraturi "+" e "-"

Pi circari testi unni cumparunu 'n siquenza (una appressu l'àutra) dui o cchiù palòri chiavi abbisogna spartilli cô signu "+": p'asempiu, l'ammaccata "wikipedia+google" fa cumpàriri li pàggini unni spunta la palòra "wikipedia" ca havi sùbbitu appressu la palòra "google". Ntê pusizzioni cchiù vasci (cu cchiù picca ranking) s'attrovanu li pàggini ca risurtunu macari di na circata senza l'upiraturi "+" ca nun è esattamenti l'upiraturi booleanu "AND", noltri a circari tutti dui li termini ntô testu, li cerca unu appressu a l'àutru.

'N manèra cumprimintari, l'upiraturi "-" leva li testi ca cuntenunu na certa palòra chiavi e funziona di filtru: p'asempiu, "wikipedia-google" cerca certiduni pàggini di Wikipedia unni nunn'hà spunta la palòra "google".

Circata dintra a nu situ

Pi fari na circata di palòri chiavi dintra nu situ abbisogna ammaccari ntî sta manèra: site:nomusitu.com nu spazziu jancu e li palòri chiavi.

N àutra manèra è scrivìri ntâ barra dê nnirìzzi: www.google.com/custom?domain===www.nomusitu. Cumpari na barra di Google ca n'opzioni silizzionàbbili pâ circata dintra lu situ dumannatu.

Circata di na difinizzioni

Pi circari na difinizzioni di nu termini oppuru lu significatu di n'acronimu basta ammaccari ntô campu di circata di Google "define: termini", unni "termini" ìnnica la palòra di circari.

P'asempiu "define: TCP" duna comu risurtatu la difinizzioni dâ sigla. Assai putenti. Pruvati pi crìdiri!

Cunvirsioni unitati di musùra e valuti

Ammaccannu "1€ to USD" google spunta cô valuri di n'euru ntê dollari miricani. Funziona cu tutti li valuti e cu l'unitati di musùra dû munnu tuttu.

Cunti matimàtichi e custanti

Si pò uttèniri lu risurtatu di nu cuntu macari cumpricatu ammuccànnulu ntô campu di circata addupirannu li cumuni upiraturi matimàtichi.

Asempi: 9*2, (5+6)/8, 2^16, sqr 81

Si ponu macari mèttiri li custanti matimàtichi e fisichi: c, e, G, h, i, k, pi, phi

Innicizzari na pàggina web

Abbisogna scrìviri ntâ barra dê nnirìzzi www.google.it/addurl.html e ntâ pàggini graputa ammaccari URL dâ pàggina web e palòri chiavi. Si Google innicizza la pàggina, ammaccannu li palòri chiavi scigghiuti cumpari ntra li risurtati.

Àutri funziunalità particulari dû muturi di circata, macari comu beta testing, s'attrovanu ô nnirìzzu labs.google.com.

Ntî Google Maps si ponnu attruvari viduti dâ Terra dê satelliti civili miricani, no aggiurnati e ntirattivi ca arrivunu a na vicinanza di quarchi dicini di metri. Lu sirvizziu fici nèsciri assai pulèmichi picchì ntê cità miricani la vicinza secunnu certiduni è troppu assai e trasa ntî la privacy e macari picchì ntâ mappatura cumparunu zoni militari unni li ripresi sunnu vietati.

Strummenta di Google (n òrdini alfabbeticu)

Liami esterni

Situ web ufficiali
(ngrisi) Li Labburatòri Google, ticnoluggìi spirimintali
Google Newsgroups
Google Nutizzi
Lamer style
(ngrisi) google docs pirmetti di scrivìri ducumenti di testu, compritamenti gratis.
Gaffe Google, lu logi pi nu jornu senza «l» Artìculu ntô Corriere della Sera dû 15 di frivaru 2007

Vuci cunzigghiati

Muturi di circata