Gela, Voscu Littòriu-Ampòriu arcàicu

Trasuta pi l'ària archiològgica dimaniali " Voscu Littòriu-Ampòriu arcàicu"

Voscu Littòriu-Ampòriu arcàicu (Bosco Littorio 'n talianu) è na zona rinusa dâ costa siciliana ntô comuni di Gela cu na viggitazzioni fitta fitta, unni s'attrova n'ària archiològgica ca sarva li resti di n'ampòriu arcàicu, risalenti a lu VII sèculu a.C..

La zona pigghiau lu nomu chi havi ora a l'èbbica dû "Vintènniu". Cu la rializzazzioni di la raffinarìa ntî l'anni '50, la viggitazzioni patìu li cunziquenzi di li fumi tòssichi e macari aoggi si ponnu taliari l'àrvuli tumifatti e nturciuniati. Finu a l'anni '70, l' ària vinìa usata dî gilisi p'arrifriscàrisi ntâ stati e di ccà scìnniri ammeri a lu mari. Foru assai friquenti macari li tumbaroli, ca cci arrubbàvunu l'uggetti pigghiati ntâ rina.

Ntô 1983 ci foru fatti scavi archiològgichi ca purtaru a la canuscenza di l'ampòriu e dû 1992 l'ària apparteni a lu dimàniu riggiunali cu la stituzzioni di la Suprintinnenza di Caltanissetta, ca ancora aoggi òspita la sedi gilisi. Lu voscu, unni si trasi libbiramenti, vinni ricintatu e è prutiggiutu dâ Vardia furistali; l'arìa archiològgica è nzinu a ora 'n fasi di scavu.

L'Ampòriu arcàicu

Scavi di l'anticu ampòriu: si vìdunu li purtusi d'alluggiamentu pir li travi di lu tettu

Viduta di l'ambienti "A1" di lu VI sèculu a.C. e di la so' porta

L' Ampòriu arcàicu, accussì adintificatu di l'archiòlughi, sarva n'assai nùmmira di strutturi (chiossai di la dicina) ca appartènunu a nu granni quarteri, ca si spanneva dû portu supra ô mari nzinu a l'acròpuli di l'antica civitati greca di Ghélas(lu situ di l'antica acròpuli aoggi è la cullina appiddata Mulinu a ventu), ni la zona dilimitata di lu ciumi Gela a miridioni. Si tratta di edifìzî cu li stanzi quatrati chiuttostu rijulari. Li mura si sàrvanu finu a chiossai di 2 metri di autizza e a li vôti sàrvanuu la lìnia di posa di l'antichi travi dû tettu. Ni certi casi s'attruvau macari lu stratu di ntònacu ca rivistiva li mura dâ parti d'intra. Ntî una di li strutturi è ancora sana la porta di trasuta, cu li stìpiti e l'architravi. La isata era custruita 'n madduni crudi, caudiati cû suli, probabbirmenti rializzati 'n sèrii datusi cà quasi tutti prisèntanu li stissi misura (60 x 60 x 15 cm).

Na prima fasi di vita di stu quarteri, è datatu a lu pirìudu dâ funnaziuni dâ culònia greca (VIII seculu a.C.). Lu situ si sviluppau ni lu VI sèculu, nzinu a la so' distruzzioni doppu lu 480 a.C., prubabbirmenti pir causi naturali, addiforsi nu marimotu: tracci di n'avvinimentu traumàticu si vìdunu ntê mura sdirubbati di nu pocu di càmmiri d'abbitazzioni. Supra a li resti dû quarteri arcàicu, s'attruvau la tistimonianza di n'àutra fasi vitali cû ritruvamentu dî resti di banchetti, prubabbirmenti a scopu rituali.

La scuperta dû situ avvinìu mentri si travagghiava pi fari li funnamenta di chiddu c'avìa èssiri n'asilu cumunali. A sècutu di na signalazzioni, li travagghi foru bluccati e lu canteri pir lu novu l'asilu s'appi spustari a n'àutra banna.

Ni lu dicèmmiru 1999, mentri vinìanu fatti li scavi archiulòggichi, a uccidenti di lu Voscu, sutta la dirizzioni di la suprintinnenti Rosalba Panvini e cunnuciuti di l'archiòluga Lavinia Sole, foru attruvati tri altari fittili, ca si dàtanu a lu dicènniu 490-480 a.C. e su' dicurati di fijuri mitulòggichi a rilevu: ntî unu la gòrgoni Mìdusa (la fijura arricorda l'esimplari sìmili ni la forma di antifìssa espunutu a lu museu "Paolo Orsi" a Sarausa), cu li figghi Pecasu e Crisàuri sutta li vrazza; n'àutru la dia Eos, mentri ca si stà purtannu Thanatos; e pi finiri, ntî lu terzu altari c'è la rapprisintazzioni di na trìadi fimminina (tri dei fìmmini) ca nun si ponnu adintificari. L'altari su' aora espunuti ntô Museu archiològgicu riggiunali di Gela.

N'àutru ciclu di scavazzioni, accuminciatu a nuvèmmiru dû 2007, si cunchiùriu l'annu doppu, a sittèmmiru, e fu fattu assemi a lu ricùpiru di li navi arcàichi attruvati ntô mari 'n facci ê scavi. Li dui scuperti, li navi e l'ampòriu, su' tinuti 'n conzidirazzioni di li studiusi assemi, comu ùnicu uggettu di ricerca, pirchì prubabbirmenti lijati di lu stissu eventu catastròficu.

Lu situ si grapiu ni l'occasioni di lu cungressu Traffici, commerci e vie di distribuzione nel Mediterraneo tra protostoria e V secolo a.C. (27 - 29 maju 2009) dô 29 di maiu ô pubbricu.

Bibliugrafìa

• R. Panvini; F. Giudice, Ta Attika: veder greco a Gela : ceramiche attiche figurate dall'antica colonia, Roma 2003
• R. Pavini, Les autels archaïque de Géla. Une découverte exceptionelle en Sicile. Musèe du Louvre, Salle de Diane (25 septembre-17 décembre 2001), Caltanissetta 2001

Vuci currilati

• Museu archiulogìcu rigìunali (Gela)
• Amporiu
• Gela

Lijami di fora

• (IT) Zone archeologiche di Gela (acropoli e emporio greco) (Zuna archìulogìchi di Gela (acropuli e amporiu grìcu)), schìda di lu situ di la Rigìuni Siciliana, Assessorato regionale dei beni culturali e ambientali e della pubblica istruzione (Assissuratu rigìunali di li bena curturali e ambientali e di la pubrica astruzìuni).
• (IT) Archeologia. Vi fu un maremoto a Gela nel V secolo a.C.? (Archìulugìa. Vi fu 'nu marimutu ni Gela ni lu V seculu a.C.?). 'Ntirvista a Rosalba Panvini ni La Sicilia (27 lugghiu 2008), arripigghiata di lu situ CittàNuoveCorleone.com
• (IT) "Riemerge l' altra Gela, una «piccola Pompei»" (Riacchiana l'autra Gela, 'na «Pumpéi nica»). Articulu di lu Corriere della Sera.
• Gela- Scavi dell'Emporio. Alzato in mattoni crudi. VI secolo a.C. (Gela- Scavi di l'Amporiu. Ghisata ni mattuna crura. VI seculu a.C.), immagìni pubricata ni lu situ Panoramio.