Adranon (Adranu)

Adranon è n'antica cità ca fu funnata vicinu unni ora si trova a cità di Dernò nnâ pruvincia di Catania.
U tirritoriu di Adranu, pâ so ricchizza di acqui ca vèninu dû bacinu idrugràficu dû virsanti uccidintali dû vurcanu Etna, pi l'armala e pî vosca, fu accupatu di l'omu già di l'èbbichi cchiù antichi.

A zona di Adranu fu abbitata macari nni l'ità priistòrica, accussì comu sapemu, pi 'razzia dî scavi cumannati di Luiggi Bernabò Brea e Paulu Orsi, ca purtaru â scuperta 'n cuntrata Minnulitu di nuclii abbitati nnô Mesulìticu, autri ritruvamenti foru fatti macari nnê cuntrati Funtanazza, Pìlica, Fugghiuta, Maccarruni, Pellegriti e Petralonga unni s'attruvaru riperti dû pirìudu Niulìticu.

 cuntrata Funtanazza, sutta ô Poju di Santa Maria, a prisenza di tanti ossa d'armali e utènzili 'n petra sfilata fannu pinzari â prisenza di nu "killing-site" (aria pi scannari l'armali). Nnâ stissa lucalità, nnô 1976, vinni attruvata na sipurtura, circunnata di nu circu di petri, unni ô so centru vinìa misu u mortu, 'n pusizziuni ncutta supra a nu lettu di ocra.

'Ranni mpurtanza àvi a nicròpuli rupestri cu tummi scavati nnâ petra e cu n'anticchia di chissi fatti câ "cùpula a tholos", di unni pruveni assai ciràmica rifirìbbili â Curtura dû Castiḍḍuzzu (ciràmica cu signa carattirìstici bruni e nìjuri di supra e cû funnu giallu – russu, risalenti â prima ità dû bronzu).