Chiddu ca lassau lu Signuri (cuntu)

Dâ Wikipedia, la nciclupidìa lìbbira.
Jump to navigation Jump to search

Na vota, si cunta e s'arricunta, ca si prisintau nu parrinu a nostru Signuri (a li tempi ca lu Signuri java pi stu munnu munnu) e cci ddumannau na grazia. - "Chi grazia voi?" cci dissi lu Signuri. - "Signuri, jù vogghiu lu tuttu chi cc'è a stu munnu" - " Ti sia cuncessu!"

Ddoppu cci jiu lu mònacu e cci ddumannau puru lu tuttu. Risposta di lu Signuri: " Lu tuttu l'haju cuncessu a lu parrinu." - " Pacenza!" rispusi lu mònacu. - " Ti sia cuncessa!"

Jivu nu galantomu e ddumannau puru lu tuttu. Risposta: "Lu tuttu l'haju cuncessu a lu parrinu." - "Pacenza!" - "La pacenza l'haju cuncessa a lu mònacu."- "Oh diàvulu!" rispusi lu galantomu. " E chistu ti sia cuncessu!"

Vinni nu mastru e ddumannau lu tuttu. "Lu tuttu l'haju cuncessu a lu parrinu." - "Pacenza!"- "La pacenza l'haju cuncessa a lu mònacu." - " Oh diàvulu!" - "Lu diàvulu l'haju cuncessu a lu galantomu." - "Oh chi mbrogghiu!" - "Lu mbrogghiu ti sia cuncessu!" dissi lu Signuri.

Veni e veni nu viddanu: "Oh Signuri, ju vulissi lu tuttu". - "Lu tuttu fu cuncessu". - " Pacenza!" - "La pacenza fu cuncessa a lu mònacu". - "Diàvulu!" - "Lu diàvulu fu cuncessu a lu galantomu." - "Oh chi mbrogghiu!" - "Lu mbrogghiu fu cuncessu a lu mastru." - "Chiddu ca voli Ddiu", dissi allura lu viddanu. - "E chistu ti sia cuncessu!"

Veni e veni na fìmmina. - "Signuri, vurria lu tuttu". - " Lu tuttu fu cuncessu a lu parrinu". - " Pacenza!" - "La pacenza fu cuncessa a lu mònacu". - "Diàvulu!" - " Lu diàvulu fu cuncessu a lu galantomu." - " Oh chi mbrogghiu!" - " Lu mbrogghiu fu cuncessu a lu mastru."- "Chiddu ca voli Ddiu" - "Chiddu ca voli Ddiu fu cuncessu a lu viddanu". - " Oh cazzu!" - " E lu cazzu di sia cuncessu!"

E pi chistu li parrini hannu lu tuttu, li mònachi la pacenza, li galantomini lu diàvulu, li mastri li mbrogghi (veni a diri ca sù mbrugghiuna), li viddani fannu la vuluntà di Ddiu e li fìmmini hannu lu cazzu.

(Rif.: G. Pitrè - da Leggende, usi e costumi del popolo siciliano.)