Domu di Murriali

Dâ Wikipedia, la nciclupidìa lìbbira.
(Rinnirizzata di Catridali di Murriali)
Lu Domu di Murriali

Lu Domu di Murriali è cirtamenti la cresia cchiù canusciuta e chi richiama cchiù forasteri. Si dici ca cu va a Palermu e nun va a Murriali, si nni parti di sceccu e si nni torna d'armali.

Comu la Catridali di Palermu e di Cifalù, la so custrizzioni abbeni grazzi nu suvranu nurmannu: Gugghiermu II, dittu lu Bonu.

Lu travagghiu dû tempiu accuminzau ntô 1172 e doppu sulu quattru anni lu travagghiu si tirminau, puru siddu la custrizzioni di nu granni tempiu nun finisci mai. Pi la porta n bronzu, lu re cumannau lu travagghiu a Bonannu Pisanu, chi ci la mannau di Pisa tra lu 1185 e lu 1186.

Lu tempiu murrialisi ammustra diversi stili pû fattu, tra tanti, ca sparti di travagghiatura taliani e siciliani, d'urìggini cc'èranu maistri musurmani. Di straurdinaria mpurtanza sunnu li musaici, chi òccupanu n'aria di 7.584 mq. Rapprisèntanu na vera attrazzioni artìstica chi raccunta cu mmàggini suggistivi la storia dû cristianèsimu, tra cui si vidi fatti di l'anticu tistamentu, la vita di Cristu, l'Atti di l'apòstuli e lu triunfu d'Angeli e Santi.

L'absidi cu lu cèlibbri Cristu Pantucraturi, di fattura grecu-bizzantina.

Trasennu la catridali, si vidi la figura di Cristu e â manu manca nu libbru câ scrittura 'n grecu e latinu: Ju sunnu la luci dû munnu, chi sequi a mia nun va ô scuru funnu.

Sta figura è vinirata dû pòpulu e hà trasutu la lingua comu pruverbu. Sidd'unu si metti 'n cacaticchiu, si dici d'iddu: E ch'è lu Patri Eternu di Murriali?.

L'absidi


Rifirimenti[cancia | cancia la surgenti]