Armali di cumpagnìa

Cu armali di cumpagnìa si ntenni n'armali ca campa nzèmmula ê cristiani senza ca veni usatu pû travagghiu o pi manciarisillu. L'armali di cumpagnìa cchiù canusciuti sunnu sicuru cani e jatti, ma cci su' macari aceḍḍi, pisci, rusicanti e rèttili.

Ntê Pajisi punintini, cani e jatti sunnu cchiù pupulari, ma nta autri curturi, ponnu èssiri prifiruti autri armali.

Storia

L'armali tinuti nzèmmula ê cristiani è na cosa assai antica e già migghiara d'anni fa i lupiforu allatinati p'addivintari cani. Si sapi chî rumani e l'eggizziani chiancìanu i so cani quannu murìanu e ci dàvanu noma (assai particulari pinzari ca nta l'Anticu Eggittu, i noma propi avìanu un valuri màggicu forti).

Ma è ntô XIX sèculu, ntô pirìudu vitturianu, ca a pràtica di l'armali di cumpagnia pigghiau a mpigna muderna, câ criazzioni di club e ammustratini.

Binifici pâ saluti

Aviri n'armali di cumpagnìa porta assai binifici pâ saluti, sia ô patruni ca a l'armali stissu. Pû primu, s'àvi vistu comu tèniri n'armalu fa calari u stress e a prissioni sanguigna, ammigghiurari l'umuri e scanzari diprissioni e sulità. Àvi ora mai tanti anni ca a pet therapy (o zootirapìa) veni pratticata ntê spitali e ajuta i vicchiareḍḍi a nun càdiri sutta a dimenza e i genti cu disabbilità a stari megghiu.

Macari l'armali ànnu binifici grazzi ê curi dî patruna e adunca n'armalu â casa campa sicuru cchiù 'ssai di unu sarbaggiu o abbannunatu.

Speci

I speci ca foru allatinati e ca ora sunnu usati pâ cumpagnìa sunnu tanti. Comu già dittu supra, i cchiù famusi sunnu sicuru i cani e i jatti, cu tutti i razzi diversi chi nasceru. Autri armali assai diffusi sunnu chiḍḍi d'acquariu, comu i pisci russi e i tartucheḍḍi. Ancora assai antica è a tradizzioni d'âceḍḍi ntâ jaggia, comu canari, cardiḍḍi e pappajaḍḍi. Pigghiaru piḍḍu di tanti anni puru cunigghia e surci, accussì comu ê rizzi. Appoi cci sunnu l'armali chiḍḍi cunzidirati esòtici, comu i taràntuli, i scursuna e autri rèttili.