Arcu di Nuvè

Artìculu n vitrina
Dâ Wikipedia, la nciclupidìa lìbbira.

Lu arcu di Nuvè (o arcunè o arcubalenu) è nu finòminu òtticu visìbbuli n celu, specî doppu un timpurali, cunzistenti nta na serî d'archi cuncèntrici ntâ gamma di culura dû spettru sulari, duvutu â rifrazzioni e â riflissioni di na surgenti luminusa (specî lu suli) attraversu gutti d’acqua prisenti nta l’ariu.

Arcubbalenu duppiu

Li bandi di setti culura ca fòrmanu l’arcubalenu, sunnu nu spittàculu cumuni; iddi risùrtanu simpricimenti di la cumminazzioni ntra la chioggia e lu suli, taliata di nu certu àngulu.

Ci sunnu pirò arcuni uccasioni unni, pi particulari circustanzi mitirològgichi, l’arcu ca si vidi ntô celu discrivi nu semicìrculu cumpretu, certi voti è pirfinu duppiu, cu culura di na brillantizza particulari.

Nurmarmenti l’arcubalenu è na pàllita mmàggini di lu spettru sulari ca appari attraversu nùvula di chioggia; nta certi cundizzioni iddu addiventa tantu lucenti ca pari nu corpu sòlitu.

Li setti culura di l’arcubalenu n’addimustranu ca la luci è cumpunuta. La luci è na radiazzioni elettrumagnètica e nun è janca, ma lu jancu ca nuàutri videmu è la summa di li setti culura di l’arcubalenu. Si la luci veni firtrata di dui supirfici trasparenti misi nta nu certu agnuni (comu li parti di nu prisma di vitru o li lati di na gucciulina di acqua) idda arrimbarza, propiu comu na pallòttula quannu tucca na pariti torta. Accussì comu li pallòttuli di pisu diversu arrimbàrzanu cu agnuni diversi, li setti friquenzi luminusi si ncùrvanu cu ànguli diversi, e appoi si spàrtinu. Lu risurtatu, dittu rifrazzioni, è ca la luci agghica a nuàutri nta na fascia cumpunuta di li diversi radiazzioni di culura viulettu, ìndacu, blè, virdi, jarnu, aranciu e russu.

La lucintizza e la ntinzitati di li culura dipènninu di li diminzioni di li gocci di acqua: cchiù grossi sù e cchiù li culura sunnu brillanti. Spissu n’arcubalenu particularmenti càrricu di culura, veni accumpagnatu di n’àutru cchiù pàllitu, cu li culura nvirtiti. Stu secunnu arcu è na secunna rifrazzioni di la luci.

N'arcu di Nuè vistu nta nu voscu ntô Canadà

Cridenzi[cancia | cancia la surgenti]

Nta l’antichità l’arcubalenu detti vuci a diversi fantastichirìi; pi certi pòpuli era nu prisaggiu di bona vintura, pi àutri era nu segnu di gioja. Ntâ Bibbia iddu veni muntuatu comu la prova di la misiricordia divina: cu l’arcubalenu Diu voli tranquillizzari ca, macari si chiovi, Iddu non fa cchiù vèniri n’àutra vota lu dilùviu univirsali: «Purrò lu mè arcu ntê nùvula, comu signu di lu pattu ca fici Jù cu la Terra» fu la prumessa di Diu a Nuè. C’è cu ntrèppita stu testu littirarmenti e c’è cu, nveci, comu na spiegazzioni affascinanti di nu finòminu ncumprinzìbbili a li auturi di lu testu sacru.

Li pòpuli celti, nta la mituluggìa, dannu n’àutra spiegazzioni: l’arcubalenu è sìmbulu di furtuna, rapprisintata di nu vasu chinu di oru suttirratu unni ncuminza l’arcubalenu: pi pigghiàrisi ssu tisoru, abbastava jiri a lu puntu di unni spunta l’arcubalenu, scavari ntô tirrenu e dissuttirrari lu vasu.

Tutti li pòpuli hannu taliatu affascinati stu finòminu ca appari ogni tantu, e tutti hannu circatu di spiegàrilu cu la propia mmagginazzioni.

Nta la mituluggìa greca, pi asempiu, Iris era la dia di l’arcubalenu e la missaggera di li Dei. Pi li abburìggini australiani, mmeci, l’arcubalenu era lu figghiu ubbidenti di la chioggia ca mittìa lu sò arcu ntô celu ‘n modu ca lu sò patri non cascassi. Iddi cridìanu ca si l’arcubalenu nun fussi statu scacciatu o cchiù prestu dô celu, avissi vinutu na trimenta siccità e picciò facìanu li rituali cchiù strani pi alluntanàrilu.

Nta li tradizzioni uccidintali, iddu hà sempri statu nu bonu prisaggiu; mmeci, pi li Karen di la Birmania, rapprisenta nu dimòniu tintu e piriculusu ca si mancia li picciriddi; pi li pupulazzioni africani di li Zulù, l’arcubalenu è nu timìbbili amicu di li sirpenti. Arcuni pòpuli di l’indunesia crìdinu ca è lu sinteru ca porta ntô celu.

Antichi sistemi di privisioni mitirològgichi, ca hannu stati rimannati di na ginirazzioni a l’àutra attraversu pruverbi pupulari, spissu nzèttanu la viritati: comu a chidda ca ntrèppita la prisenza di l’arcubalenu di sira, comu la fini di li chioggi.


Wikimedaglia
Wikimedaglia
Chista è na vuci nzirita nni l'artìculu n vitrina, zoè una dî mègghiu vuci criati dâ cumunità.
Fu arricanusciuta lu 5 di austu 2009

S'hai traduciutu n'artìculu o hai criatu na vuci e riteni ca sia lu casu di fàrila canùsciri picchì è cumpreta n tuttu, signàlila. Naturalmenti, sunnu boni accittati suggirimenti e canciamenti chi mìgghiùranu lu travagghiu.

Signala na vuci          Archiviu         Talìa tutti l'articuli n vitrina