Pasta chî sardi
.jpg)
La pasta chî sardi è macari lu cchiù famusu chiattu sicilianu, unni grossi maccaruni vènunu cunzati cu nu sucu a ragù di sardi accustati cû finocchiu sirvaggiu, racina passa, pinoli e zaffaranu (straurdinariu ncontru di sapuri e di aromi, si servi cummigghiatu di sardi sani).
La rizzetta
[cancia | cancia lu còdici]- Dosi: pi 4/6 pirsuna
- Tempu di priparazzioni e di cuttura: n'ura.
- Ncritienti:gr.400 di maccaruncini - na cipudda tagghiata a fidduzzi - ogghiu d'aliva - 4 anciovi lavati dô sali e sinza resca - nu mazzu di finucchetti sirvaggi - na vusta di zaffaranu - gr. 50 di racinedda misa nta l'acqua e sculata - gr. 50 di pinoli - sali - pipi - ogghiu pi frìjiri.
- Comu si cunza:
Munnati li finucchetti, sarvannu la parti cchiù tènira ca faciti còciri pi deci minuti nta na para litri di acqua vugghenti e salata. Sculàtili, tritàtili e tiniti sarvata l'acqua dâ cuciuta.
Tugghètici la testa ê sardi, grapìtili dâ parti dû ventri, pulizziàtili dê ntiriora e dâ resca, lavàtili e sciucàtili.
Nta nu tiànu faciti suffrijiri picca la cipudda nta 8 cucchiara di ogghiu, juncìtici l'anciovi scafazzànnuli cu na furchetta fora dô focu, mittiti n'àutra vota supra û focu cu mitati dî sardi frischi e mmiscati e scacciàtili p'arridùciri tuttu nta na pastedda. Junciti li finucchetti, li pinoli, la racinedda e lu zaffaranu sciugghiutu nta acchi cucchiarata d'acqua sarvata ntâ cuttura di li finucchetti, mittìtici lu sali (quantu abbasta), lu pipi e teniti n càuru. Ora, frijiti di tutti dui lati li sardi c'arristaru e lassàtili sculari di l'ogghiu.
Faciti vugghiri l'acqua di li finucchetti juncènnucci àutra acqua e sali, calàtici li maccaruncini e sculàtili "al denti" ; cunzàtili cu mitati dâ sarsa priparata. Nzunzati na tigghia cu l'ogghiu, mittìtici nu stratu di pasta, unu di sardi e tanticchia di sarsa e accussì di sequitu e pi finiri ammugghiati tuttu câ sarsa.
Nfurnati a 200 grati pi na vintina di minuti. Sta pasta è assai bona pistiata càura o videmma fridda.
