Batasuna
Batasuna è nu partitu puliticu attivu ntî riggiuna spagnola di Navarra e dê Paisi Baschi e ntô dipartimentu francisi di li Pirinèi atlantichi (tirritorî canusciuti ccô nomu di Euskal Herria). S'addichiara nnipinnintista, sucialista, fimminista e ammientalista. Ntra li sò ubbiettivi cchiù mpurtanti c'è la criazzioni di nu statu sucialista ca purtassi a l'autuditirminazzioni e appoi a la nnipinnenza di li Paisi Baschi dû Statu spagnolu e di chiddu franzisi. Pâ Maggistratura spagnola è la spadda pulìtica di l'ETA. Arricugghieva assai cunzenzi (ammeri ô 10 %) nzinu a la sò sbannuta.
Ntî l'ùrtimi anni havi canciatu ô spissu lu sò nomu (Herri Batasuna, Euskal Herritarrok, Batasuna), pi nun ncagghiari li divieta dû Statu spagnolu. Ntî l'ilizzioni riggiunali dû 2005 Batasuna cunzigghiò a li sò ilitturi di vutari pi lu Partido Comunista de las Tierras Vascas (EHAK, la sò sigla n lingua basca voli diri Euskal Herrialdeetako Alderdi Komunista), ca assai pènzunu è nenti àutru ca nu prestanomu di Batasuna stissu.
Lu sò status pulìticu havi statu sempri cuntraversu. Lu parramentu spagnolu avìa accuminzatu ntî l'austu 2002, cu tutta l'assenza di assai cunzenzu, nu prucessu p'addichiariari Batasuna illiàli. Ô stissu tempu, lu judici Baltazar Garzòn nn'avìa dispunuta la suspinziòni doppu ca l'attivitati di intelligence avìa tistimuniatu dî rilazzioni stritti ntra lu partitu e l'ETA. Lu Tribunal Constitucional, a l'ùrtimu, addichiarò illiàli Batasuna lu 18 di marzu 2003. N Francia, mmeci, Batasuna è ancora liàli, e ddocu l'Eta spustau macari la sò sidi.
Li Stati Uniti cunzìdiranu Batasuna n'urganizzazzioni tirrurìstica accuminzannu dô stissu 2003, e a chistu arrivàru videmma li paisi di l'Unioni Aurupèa.
Li mèmmira di Batasuna, e di tutti li partiti e li muvimenti nazziunalisti e nnipinnintisti baschi, sòlinu addifinirisi cu l'appeddu di Abertzale.