Uttùviru 2008
| 2007 | Abbinimenti dû 2008 | 2009 |
|---|---|---|
| Jinnaru 2008 | Frivaru 2008 | Marzu 2008 | Aprili 2008 | Maiu 2008 | Giugnu 2008 | Giugnettu 2008 | Austu 2008 | Sittèmmiru 2008 | Uttùviru 2008 | Nuvèmmiru 2008 | Dicèmmiru 2008 | ||
2 di uttùviru, jovidìa
- Italia: 'N cuntinenti cuntinuanu a succèdiri casi di razzismu: a Milanu nu senigalisi veni bastuniantu e a Roma un cinisi pigghia corpa a la firmata di l'autobussu.
5 di uttùviru, duminicadìa
- Sicilia: A stamatina, ammeri li 7,30, cci foru dui scossi di tirrimotu di magnitùdini 2,3 e 3,4 cû centru agghiri a l'àrii di Rausa, Morica e Scicli. Non ci foru danni a cristiani e cosi.
10 di uttùviru, venridìa
- Tokyo: Pû fattu dâ crisi finanziaria, li cchiù mpurtanti borsi dû munnu pèrdinu valuri.
13 di uttùviru, lunidìa
- Gioia Tauru: Lu sìnnacu dâ cità, accusatu di cullusioni câ 'ndrànghita, fu arristatu, nzemmula cu dui òmini dâ famigghia Piromalli, tra cui n'abbucatu, chi avìa statu chiamatu spissu pi cunsulenzi ligali ô cumuni.
15 di uttùviru, mercuridìa
- Roma: La Lega Nord cuntìnua la sò campagna a prutizzioni dê picciriddi straneri. Doppu la pruposta di pigghiari li mpronti diggitali dî cristiani di ettinnìa non taliana e accussì prutiggiri cchiù megghiu li picciriddi ca non si sapi bonu di cui sù figghi, ora vinni prisintata a la Càmmira na muzzioni dâ Lega ca privedi â scola li "classi di nzirimentu" pê straneri ca non pàrranu bonu lu talianu. Pi favurìrini lu nzirimentu di ssi picciriddi ntâ sucitati, dici la Lega, è megghiu siparàrili dê nostri figghi.
17 di uttùviru, venniridìa
- Londra: Lu spazziu fà ciàuru di carni arrustuta ntâ padedda ammiscatu cô ciàuru dô mitallu caudiatu. Sta strana ammiscata di ciàuri, hà stata cuntata di l'astrunàuti ca passiaru ntô spazziu e ca, na vota turnati d'intra la navicedda spazziali, sinteru ssi ciàuri ntê tuti.
(Rifirenna:nutizzia "ANSA")
22 di uttùviru, mercuridìa
- Africu: Lu boss, Duminicu Morabbitu, 33 anni, di l'omònima cosca dâ 'ndranghita, ricircatu, fu arristatu dî Carrabbinieri.
- Nova Delhi: L'aginzia spazziali indiana mannau la sò prima sunna spazziali versu la luna pi lu studiu dû nostru satelliti naturali.
23 di uttùviru, jovidìa
- Italia: Ancora prutesti, curtèi, scoli uccupati e lizzioni pâ strata contr'a la rifurma dâ ministra Gelmini. Ajieri lu primu ministru Silviu Berlusconi, nta na cunfirenza stampa, ci mannau a diri ê carusi dê scoli ca iddu nun avissi pirmittutu l'uccupazzioni di scoli e univirsitati e ca, ntô casu, avissi fattu ntirviniri la polizzìa, ma lu risurtatu a ssi palori fu ca nuddu s'hà scantatu e, aianzi, passi ca ci addumau cchiossai lu focu: uccupata la facultati di Scenza di l'Univirsitati Roma Tri; a Milanu, foru abbluccati pi n'ura li canceddi dâ Facultati di Scenzi Pulìtichi; studenti dî scoli supiriori 'n curteu a Turinu, Nàpuli e a Matera; a Palermu lizzioni di ncignirìa ntâ chiazza.
- Palermu: Ntî nu cunvegnu supra lu restauru foru prisnitati li risurtati dû ristuaru dî mosaici dâ villa dû Casali di Piazza Armerina, chi foru cumpritati ô 80%. La villa avissi a ràpiri attorna ntô 2009.
24 di uttùviru, venniridìa
- Catania: Nu jucaturi anònimu di na tabbacchirìa catanisa nzirtau la cumminazzioni dû superenalottu. Cu lu sò 6 vincìu circa 100 miliuna di euru.
25 di uttùviru, sabbatudìa
- Roma: Aoggi a Roma ci fu la manifistizzioni vuluta dû Pd contr'a lu cuvernu unni, secunnu l'urganizzaturi, participaru quarchi 2 miliuna di cristiani. Walter Veltroni, dû parcu dû Circu Màssimu, arrivurgènnusi a Berlusconi cci dissi ca «la dimucrazzìa nun e' nu cunsigghiu d'amministrazzioni». Berlusconi mannau a diri, di unni s'attrova nta stu mumentu ntâ Cina, ca iddu nun è priuccupatu. Tanti cummintaturi dìciunu: «Menu mali ca, armenu iddu, nun è priuccupatu...»
- Yemen: Armenu 41 pirsuni mureru annijati e 31 nun s'attròvanu cchiù pi l'acqua ca cuntinua a cascari supr'a lu Yemen; mòrsiru noltri macari n'àutri 6 pirsuni pî fùlmini. Nta tuttu ssu paisi, ca è unu dê cchiù pòviri dû munnu, si distruggeru, pê ciumi e turrenti ca si furmaru, chiossai di 1700 casi.
- Lussemburgu: La Cummissiuni UE stanziau 300.000 euru pi nu sistema di viggilanza fattu ntî l'Europol supra matiriali di pornugrafìa dî picciriddi supra lu web. Lu sistema cunzenti a li nvisticaturi di cibercrìmini di scanciàrisi e cunnivìdiri nfurmazzioni cu cchiù facilitati.
26 di uttùviru, duminicadìa
- Napuli: Megghiu lu càrciri ca 'n famigghia - Un cristianu di 32 anni a l'arresti dumiciliari a Frattamaggiuri (NA), ci chiamau ô cummissariatu lucali p'addumannàricci di mintìrilu 'n carciri, pirchì â casa avìa cuntinuamenti custioni e sciarri. Quannu s'apprisintaru l'aggenti di polizzìa pi circari di mèttiri paci, ssu cristianu arrispunnìu jennasinni dâ casa e cummèttiri accuddì lu riatu d'evasioni, pi fàrisi arristari. Lu jùdici, pirò, ntô prucessu pi dirittìssima l'assurvìu e ci desi n'àutra vota l'arresti dumiciliari.
(Rifirenna: nutizzia Ansa)
27 di uttùviru, lunidìa
- Siria: N'attaccu miricanu fà na uttina di morti ntî nu paiseddu ô cunfini cu l'Iraq. Lu cuvernu sirianu è scannaliatu di l'inizziativa militari miricana ntô sò tirritoriu.
28 di uttùviru, martidìa
- Missina: Nu tirrimotu di magnitudini 4 dâ scala Richter ntirissau la zona di mari tra l'ìsuli Eolî e la costa siciliana, senza fari danni a pirsuni o cosi.
- USA: Ntô Utah s'attruvaru mùmmii di dinusàuri cu la peddi e li tissuti moddi ancora sani. Sta nutizzia veni ripurtata dû "New Scientist" ca macari dici ca li paleontòlughi, scinzati di lu Utah Museum of Natural History, attruvaru quarchi dùdici mùmmii nzemi a àutri fòssili ntê dipòsiti di rina d'intra lèttira di ciumi, unni c'èranu macari fogghi e lignu. Ntô stòmmacu dî dinusàuri c'era ancora zoccu avìa ristatu di l'ùrtima manciata.
29 di uttùviru, mercuridìa
- USA: A na simana di l'elizzioni prisidinziali miricani Barack Obama è sempri 'n vantagghiu cu na pircintuali di prifirenzi di circa 52% ntî l'ùrtimi sundaggi, contra lu 45% pi John McCain.
30 di uttùviru, jovidìa
- Ginevra: Ntî l'Iraq ci sunnu chiossai di 420 càrciri ammucciati di cui nuddu nni sapi nenti. Lu dicìu aoggi lu parlamintari irachenu Mohammad Al-Daini ê jurnalista ntô mentri di nu cunvegnu priparatu di l'urganizzazzioni non cuvirnativa Alkarama. Lu parlamintari cuntàu macari ca nta ssi càrciri li cunnizzioni dî carzarati sunnu mprissiunanti e dicìu ancora ca ci sunnu pri cuntìnuu ammazzatini e viulenzi sissuali. Pri comu dici iddu, di quannu ci fu la mmasioni dâ Mèrica ntô 2003, hannu murutu 1,5 miliuna d'iracheni.
- Italia: Doppu ca ajeri matina lu dicretu Gelmini addivintau liggi cu l'appruvazzioni difinitiva ô sinatu, a sta matina l'agginzìi di stampa signaliàvanu ca avìanu partuti curtèi di manifistanti cuntràrii a Vibbu Valenzia, L'Aquila, Bulogna, Ancona, Cagliari, Catania, Lecci, Palermu, Pavìa, Turinu, Brescia, Bari, Missina, Milanu, Gènuva, Pàduva, Cartanissetta, Sarausa, Cùneu, Algheru, Nùoru, Rausa, Sassari, Mòdena, Cusenza, Mòrica, Còmmisu, Trani, Bèrgamu, Crimona. A Napuli lu curteu partìu ê dui di pumiriggiu. A Roma li manifistanti foru cchiossai di nu miliuni.
31 di uttùviru, venniridìa
- Mosca: Lu capu di statu dâ Lìbbia, Muammar Gheddafi, è prontu p'accògghiri na basi militari navali dâ Russia ntâ Lìbbia. Ssa nutizzia veni data dû jurnali russu Kommersant ca l'appi dû staff urganizzaturi dâ visita ca Gheddafi quantu prima hà fari ntâ Russia. Secunnu a quantu dici la funti, la basi avissi a èssiri misa a Bengasi.
(Rifirenna:nutizzia "ANSA")