Stemma dê citati dâ Terra di Aci

• 
  Aci Bonaccossi
• 
  Aci Catina
• 
  Aci Casteddu
• 
  Aci Riali

Ntô 1092 li tirritori di li citati ca oggi sunnu li cumuni autònumi di Aci Casteddu, Aci Riali, Aci Bonaccossi, Aci Catina, Aci Sant'Antoniu, Valverde (all'èbbica Aci Valverde), facèvanu parti di l'accussì chiamata "Universitati di Aci", ditta accuddì pi nnicàrini l'unitati dô tirritoriu, pulìtica, murali, ecunòmica e stòrica dâ "Terra di Aci"; chista fu assignata dû Gran Conti Ruggeru a Angeriu, nzemi â nòmina di vìscuvu di Catania.

Ntô 1392 li "terri di Aci" tòrnanu ô Riggiu Dimàniu, ma ntô 1420 lu re Alfonzu V d’Aragona e appoi Firdinandu Velasquez la fannu n'àutra vota turnari a èssiri nu fèudu. Dopu èssiri passata di na famigghia nubbiliari a n'àutra, ntô 1528, lu cunsigghiu cìvicu s'ancontra a Casalottu (oggi Aci Sant'Antoniu) e nùmina sei "sìnnachi", ca vènunu ncaricati di pigghiari li tassi e cu chissi pajari lu riscattu. L' Universitati di Aci si vuleva livari dû puteri dê baruni e ntô 1531 ci arrinisciu pajannu la summa di 72.000 fiurini.
Nta ss'uccasioni, pi l' "Universitati di Aci", turnata a èssiri dimaniali, vinni criatu lu "siggillu" dâ cità, ca era ubblicatòriu apporri nta l'atti pùbbrici cìvichi e ca arresta appoi prisenti nta tutti li citati di "Aci" : “Pro certitudine veritatis has nostras patentes lítteras fieri fecimus sub parvo Universitatis nostrae sigillo in pede muni- tas, ex territorio Jacis, die IV ind. 1551” .
Nta stu siggillu circulari, ca havi nu bordu cu la liggenda “REDEMPTA FUIT 3 AUSTI 4 IND. 1531” , sunnu rapprisintati chiusi intra nu scudu nu casteddu a tri turri a manu dritta e tri faragghiuni ca nesciunu dû mari a manu manca.
La "Terra di Aci", comu sìmmulu di la sò nova libbirtati scegghi l’anticu Castrum di Acicasteddu, ca rapprisintava la dimanialitati di "Aci", prima d'èssiri addivintata fèudu, e li tri Faragghiuni di Aci Trizza unni si rapprisenta la liggenna mitulòggica du pastureddu Aci e dâ ninfa marina Galatea. Lu casteddu e li faragghiuni arrèstanu prisenti nzinu ad oggi ntê stemmi di Aciriali, Acicasteddu, Aci Catina, Aci Bonaccossi, e ntô stemma di Aci Sant'Antoniu nzinu ô 1985.