Jaci Trizza

Dâ Wikipedia, la nciclupidìa lìbbira.
(Rinnirizzata di Aci Trizza)
Aci Trizza
«  Jèmu pî mari a navigari oltri, di ddà cu lu cori angusciatu, e agghiuncemu la terra di li Ciclopi…
… tuttu nasci senza simenza e mancu aratru, lu granu, l’orzu, li viti ca prudùciunu vinu di boni e beddi
ràppuli, e la chioggia di Zeus li fa crìsciri. »

Jaci Trizza (videmma scrittu Jacitrizza o Acitrizza e chiamata simpricimenti Trizza ntâ parrata lucali) è na frazzioni dô cumuni di Aci Casteddu nta pruvincia di Catania, centru turìsticu e pischarecciu di antica e nutiuli tradizzioni e famusu pi lu sò stupennu paisaggiu. Li sò abbitanti si chiàmanu trizzoti (trezzoti 'n italianu).

Lu panurama di Jaci Trizza è duminatu di li faragghiuni di li Ciclopi: ottu pittureschi scogghi basàltici ca, secunnu la liggenna, furu scagghiati di Polifemu a Ulissi. Na picca cchiù luntanu dâ costa (a quarchi 400 m.), c’è l'Ìsula Lachea, adintificata cu l'umèrica Ìsula di li Capri, unni oggi havi la sedi na stazzioni di studî di biuluggìa di l'Universitati di Catania.

Fu lu paisi unni Giuvanni Virga ci ammientò lu famusu rumanzu I Malavogghia (1881) e unni, ntô 1948, vinni firriatu lu film La terra trema di Luchinu Visconti e Antonio Pietràngeli, capulaùru di lu niurialìsimu rializzatu cû attori pigghiati ntô postu (nun prufissionisti).

Storia[cancia | cancia la surgenti]

Jaci Trizza havi na storia ca accuminza ntâ l'èbbica di la duminazzioni spagnola ntâ Sicilia.

Ntê primi dû '600 la "Terra di Trizza" era na zona disabbitata unni arcuni mircanti di la citati di Jaci Aquilìa (addivintò appoi a mitati dû '600 Aciriali) tinìanu gurni (vaschi di acqua stagnanti) pi fari macirari linu e cànapa pi travagghiàrilli comu curdami.

Ntô 1639 li cumunitati di Jaci Sant'Antoniu e Jaci S. Fulippu àppiru lu pirmissu di staccàrisi di Jaci Aquilia e ntonzi la Trizza vinni dunata n fèudu a la famigghia di li prìncipi Riggio di Campuciuritu. La "Terra di Trizza" era lu sbuccu a mari dô fèudu, na fascia di picca chilòmitri ncuniata ntra Capumulini e lu Casteddu di Jaci (tutti dui sutta lu duminiu di la citati di Jaci Aquilìa), e la famigghia Riggio pinzò di criari nta sta zona disabbitata, nu molu nicareddu o sirvizziu cummirciali di tuttu lu fèudu. Li prìncipi Riggio, chiamati di lu pòpulu comu "li Prìncipi di Jaci", diriggìanu lu fèudu stannu a Jaci Sant'Antoniu, unni si fìciru custruiri nu granni palazzu (ora palazzu Càrcaci).

Ntê primi di lu '700 Acitrizza avìa già agghiri 150 abbitanti e duranti ssu sèculu, la zona accuminzò a èssiri sempri cchiù apprizzata comu puntu di attraccu pi la pisca di li sardi.

Tannu ancora nun cc’era la strata custera ca lijava Aciriali cu Catania, ma sti dui citati eranu cullicati sulu pi menzu di na strata caruzzàbbili ca passava nta li cullini, attraversu Bedduviddi e Nizzeti. La strata custera (chidda ca accamora è la strata statali 114) fu custruita ntô 1835. L'ùnicu culliamentu stratali di Jaci Trizza era la "strata dô prìncipi", na carruzzàbbili ca di lu portu acchianava nzinu ô palazzu Riggio ntâ cuntrada "Catina" di Jaci S. Antoniu.

A fini di lu Setticentu la dinastìa dê Riggiu addivintò pùvira e doppu picca tempu sparìu di la zona, comu pirsunaggi pùbbrici.

Ntantu, la Sicilia, doppu èssiri appartinuta pi picca tempu a li Savoia (di lu 1713 a lu 1718), tornò sutta a lu duminiu spagnolu e appoi, dô 1816, furmò cu lu regnu di Napoli lu regnu dî Dui Sicili.

Di l’Ottucentu, scumparennu li maciraturi pi la lavurazzioni di la cànapa, Jaci Trizza addivintò sempri cchiù assai paisi di piscatura, ma cu risurtati nun tantu boni, ca la pisca arrinascìa appena a dunari dda cosa pi campari.

Pi casi tuttu lu Novicentu, la pisca arristò la principali attivitati pi li trizzoti ca, ntantu, era addivintata menu puviredda cu la ntruduzzioni di li varchi a muturi e cu li piscarecci sempri cchiù granni.

Ammeri la fini di lu '900, mentri lu cummerciu di la pisca jìa ngranninnusi, lu paisi di Trizza si sviluppò nta la custruzzioni di abbitazzioni, spissu a la sanfasò, pi la custruzzioni di arbegghi e tantissimi "villini" distinati a li catanisi sempri cchiù attratti di li biddizzi dû paisaggiu.

Nta st'ùrtimi vin'’anni, la nnustria turìstica jìu sviluppànnusi cu arbegghi, tanti risturanti, pizzerìi, tratturìi tìpichi, paninirìi, pub, discutechi, jilatarìi e arritrovi pi lu svagu, ca, spiciarmenti nta l'istati, attràjunu na granni sfunnacata di òmini.

Galleria[cancia | cancia la surgenti]