San Binidittu lu Moru

Dâ Wikipedia, la nciclupidìa lìbbira.
Jump to navigation Jump to search

Binidittu lu Moru (Santu Frateddu, pruvincia di Missina, 1524 - Palermu 4 di aprili 1589) fu mònacu e santu. Nascìu di na famigghia di schiavi etiopi, purtati n Sicilia. Libbiratu dû patruni, avìa fama di santu già n vita, e appi a ammucciàrisi nti tanti cunventa dâ Sicilia pirchì li genti lu jevunu circannu pi fari miraculi. Fu lu primu santu nìuru dâ chiesa cattòlica. E' viniratu n Sicilia, unni cu Santa Rusalìa è cunpatronu di Palermu e ntâ Mèrica Latina, unni è viniratu supratuttu dî cumunità nìuri.

Aggiografìa[cancia | cancia la surgenti]

Figghiiu di schiavi etìupi purtati 'n Sicilia, Cristofuru e Diana Manasseri, appi puru du' soru. Quannu Binidittu appi vintun’anni, Gilormu Lanza, omu nòbbili e riccu ca facìa lu rimitu nti l’èremu di Santa Duminica, vicinu a Santu Frateddu (ME), si lu pigghiau cu iddu pi fari la vita di li rimiti, pirmissa dû Papa Giuliu III. Canciaru tanti posti: a Platanella, a Mancusa, a Madonna da Dayna a Marineu, supra lu Munti Piddirinu.
 morti di Lanza, Binidittu fu fattu Supiriuri, ma doppu diciassett’anni n'òrdini dû Patri Ginirali di Franciscani dissi ca tutti li rimiti avìanu a passari ntê Frati Minuri o nnê Cappuccini. Doppu aviri prijatu, Binidittu scigghìu li Frati Minuri dû Cummentu di S. Maria di Gesù a Palermu. Pi iddu c’eranu sulitudini, silenziu, prijera e puvertà. Puru ca era idiota, veni a diri analfabeta, lu vòsiru fari Supiriuri. Pòviri o ricchi, nòbbili o plibbei, allittrati o gnuranti, tutti èranu arricivuti di Binidittu e pi tutti avìa palori di cunsulazzioni. Granni maistri e tiòlughi avìanu li risposti giusti a tanti dubbi. Puru lu Vicirè Marcantoniu Culonna lu priò pi sò muggheri malata.
Murìu lu 4 di aprili 1589. Quannu si seppi dâ sò morti, palirmitani, missinisi, giurgintani e serausani si prisintaru ô Cummentu; Cardinali, Arciviscuvi, Vicirè, maggistrati e fideli dâ Spagna, ca s'attruvaru a Palermu, curreru pi prijàrilu, supplicàrilu e tessiri li sò laudi. Lu re dâ Spagna Fulippu III vosi ca fussi fattu Santu. Si principiaru cincu Prucessi. Lu corpu fu livatu dâ terra e purtatu nnâ Crèsia. Nnô 1763 lu Papa Climenti XIII lu dichiarò Biatu. Lu Papa Piu VII lu 25 di maju 1807 lu fici Santu.
Spagna, Portugallu, Brasili, Perù, Argintina, Venezuela, Messicu, fìciru festi granni e chiamaru Binidittu “ Benitu di Palermu “. Lu sò cultu si diffunnìu dâ Sicilia nti tutta l'Italia, nti la Spagna, ntô restu di l'Europa e puru ntâ Mèrica dû Sud, unni addivintò lu prutitturi dî pupulazioni nìuri. Lu Sinatu di Palermu ntô 1713 lu scigghìu comu Patronu dâ Citati.

Li Riliqui[cancia | cancia la surgenti]

Lu Corpu, ancora sanu sanu, s'attrova nnâ Crèsia di Santa Maria di Gesù a Palermu.

Bibbliografìa[cancia | cancia la surgenti]

  • P.Ludovico M.Mariani, San Benedetto da Palermo detto il moro, Kefagrafica, Palermu, 1989