Parrata catanisa
| « Catania, li so' chiazzi, li so' strati.....l'occhi di li so donni non tingiuti!...E la Villa Bellini, 'ntra la stati, ccu lu passiju di tutti li ziti, cu' tristi, cu' fistanti, cu' 'ncagnati, cu' 'ncunnatizzi e cu' tutti puliti! ... (di Centona di Ninu Martogliu) » |
Pi parrata catanisa si ntenni la varianti dû sicilianu ca si parra ntî tutta la pruvincia di Catania e pò cuntèniri variazzioni nichi tra nu cumuni e n'autru. La parrata catanisa si distingui nun sulu pi na ntunazzioni tìpica ca la fa arricanusciri e distinguiri tra àutri parrati dû sicilianu, ma pi paroli tìpichi comu annunca.
Ntâ parrata catanisa, si la “r” è prima di na cunzunanti veni eliminata e la cunzunanti veni radduppiata:
- “articulu” veni prununzatu “atticulu”
- “corda” veni prununzata “codda”
- “carta” veni prununzata “catta”
- “varca” veni prununzata “vacca”
La “r”, nta tanti palori veni sustituita a la cunzunanti “d”:
- “ vidìri” veni prununzatu “virìri”
- “dumani” veni prununzatu “rumani”
- “duminicadìa” = “ruminicarìa”
- “deci” (nùmmuru) = “reci”
Tanti palori ca accumìncianu cu “gr” , pèrdinu la “g”:
grattari = rattari
grossu = rossu
granni = ranni
gruppu = ruppu.
Arcuni palori c'accumìncianu cu la “gua/gue” addivèntanu “va/ve”:
guardari = vaddari (la “r” prima di la cunzunanti veni eliminata e la cunzunanti si radduppia)
guardia = vaddia (comu supra)
guerra = verra
Palori c'accumìncianu "cu bi/bu/ba" addivèntanu "vi/vu/va":
bilancia = vilanza
brazza – braccia = vrazza
bucca – bocca = vucca
baciu = vasu
barili = varili
barbarottu = varvarottu o vavvarottu
Li artìculi ditirminativi “la/li/lu”, pèrdinu la “l” e addivèntanu “a/i/u”:
la casa = a casa
li munti = i munti
lu mari = u mari
Li pripusizzioni “ntâ/ntê/ntô” pèrdinu la “t” e addivèntanu “nâ/nê/nô”:
Ntâ strata = Nâ strata
Ntê strati = Nê strati
Ntô muru = Nô muru
(Oppuru, li pripusizzioni “ntâ/ntê/ntô”, quannu raramenti vèninu usati addivèntanu funeticamenti “ndâ/ndê/ndô”)
Alli vôti[1] li palori ca cuntèninu na doppia "r" ni pèrdunu una:
- "verra" veni prununzata "vera"
- "terra" veni prununzata "tera"
- "serra" veni prununzata "sera"