Palermu: lu prisidenti dâ Riggiuni Raffaeli Lumbardu sciugghìu la giunta riggiunali n sequitu a sciarri nterni. Addichiarau di vuliri apprisintari nu prugettu di cuvernu di liggislatura novu, e di ricustituri na giunta cu cu ci stapi.
Palermu: Pi lu 17mu annivirsariu dâ straggi di Capaci, unni foru ammazzati Giuvanni Falcuni e l'òmini dâ scorta, lu prisidenti dâ ripubbrica Giorgiu Napulitanu prisedi li cirimoni di cummimurazzioni.
Sri Lanka: Lu cuvernu dichiara accapata la guerra contra li tigri tamil, chi di diversi anni cummattevanu na guerrigghia pi lu cuntrollu di l'isula. secunu funti dû cuvernu, li capi dâ guerrigghia foru tutti ammazzati.
Madrid: Lu campiuni di tennisRafael Nadal perdi la mbattibbilità ntâ tirra battuta. Doppu 33 vittori cunsicutivi supra stu turrinu, Roger Federer lu battiu ntâ finali dû turneu spagnolu.
Rangoon: Lu premiu Nobel pi la paci, Aung San Suu Ky assignata a risidenza di diversi anni e prossima â libbirazzioni fu arristata cu la scusa chi n'amiricanu trasiu à so casa, puru siddu nun fu nvitatu. Pi chistu, idda rischia n'autri 5 anni di galera.
Palermu: Nti n'opirazzioni contra la mafia 37 pirsuni foru arristati cu l'accusa di estorsioni e assuciazzioni mafiusa.
Cape Canaveral: Lu ShuttleAtlantis partiu pi na missioni di na dicina di jorna. La missioni havi lu scopu d'arriparari lu telescopiu spazziali Hubble, di manera di farilu funziunari pi n'autra cinchina d'anni.
Tripoli: Nu varcuni ccu 227 pirsuni fu succurrutu ntô canali di Sicilia dâ guardia costiera italiana e dâ Guardia di Finanza, chi su dumanna dû cuvernu italianu àppiru lu pirmissu di tràsiri ntô portu dâ capitali lìbbica e ricunsignari li naufragghi all'auturitati dû paisi di unni parteru. Cunsidiratu nu successu dû cuvernu italianu, l'opirazzioni ha statu criticata di l'ONU pi lu distinu chi la Libbia riserba ê pirsuni accittati narreri.
Messicu: Doppu quarchi dicina di morti pi la nfluenza suina, e quarchi cintinara di pirsuni nfittati ntô munnu, la prugrissioni dâ maladdia pari arristàrisi o armenu sutta cuntrollu, grazzi puru ê drastichi misuri di prufilassi aduttati dî cuverna di vari Paisi.
Milanu: La muggheri di Silviu Berlusconi addumannau lu divorziu di sò maritu. Doppu circa trent'anni di spusalizziu e tri figghi, la signura Berlusconi nun ammucciava cchiù la sò collira contra sò maritu, n particulari pi li sò ricenti nizziativi di ricrutari na pocu di soubrettes pi cògghiri voti pi l'elizzioni europei.
Spagna: Valintinu Rossi câ sò prima vittoria di l'annu, pigghiau la testa dâ classifica dû campiunatu di motociclismu classi Motu GP.
