John David Lawson

John David Lawson (Coventry, 4 d'aprili 1923 – Abingdon, 15 di jinnaru 2008) fu nu ncigneri e fìsicu ngrisi, canusciutu ntra l'autri cosi pû so artìculu ncapu ô criteriu di Lawson. Stu criteriu è na misura chi nquatra i cunnizzioni chi ci sèrbinu a un riatturi di fusioni nucliari pi prudùciri energìa quantu si nni pigghi.

Biugrafìa

Studiau ncignirìa ô Saint John's College a Cambridge pi si pigghiari a lauria di du' anni 'n miccànica. Doppu a lauria ntô 1943, trasìu ntô Telecommunications Research Establishment a Malvern, unni travagghiau ncapu a l'addisignu dî ntinni radar. Dû 1947 accuminciau a travagghiari pi l'Atomic Energy Research Establishment (AERE) unni, ntra l'autri cosi, fici ricerca ncapu a sincrutroni e ciclutroni.

Quannu ntô 1951 spustaru u gruppu unni travagghiava â General Physics Division di l'AERE, ad Harwell, Lawson fu misu a travagghiari ô clistroni nta un gruppu guidatu di Peter Thonemann. Thonemann era macari u capu dû pruggettu Zero Energy Toroidal Assembly (ZETA) e fu grazzi a iḍḍu ca Lawson si ntirissau â fusioni nucliari. Nta stu cuntestu, Lawson accanzau u so risurtatu cchiù mintuvatu, u criteriu di Lawson, ntô 1955, appoi pubblicatu ntô 1957.^[1] Ristau a travagghiari pi l'AERE nzinu ô 1961, passannu un pezzu ntra u 1959 e u 1960 comu ricircaturi ê Hansen Laboratories a Stanford.

Ntô 1961 si spustau ô National Institute for Research in Nuclear Science, vicinu ad Harwell, chi addivintau doppu picca u Rutherford Appleton Laboratory. Cca sicutau a travagghiari ncapu a l'acciliratura di particelli. Fici macari du' anni ô Culham Laboratory, dû 1975 ô 1976, unni turnau a travagghiari ncapu â fusioni nucliari, studiannu l'addisignu di un riatturi basatu supra u principiu dâ strincitina a campu abbuccatu.

Ntô 1977 turnau ô Rutherford Appleton Laboratory, unni sicutau a travagghiari ncapu ê laser di elittroni lìbbiri e a l'addisignu di accilliratura di particelli. Nta l'anni prima di si nni jiri 'n pinzioni ntô 1987, abbirsau un gruppu di ricerca basatu supra a tècnica di l'accilirazzioni cû plasma.

Ntô 1959 l'Università di Cambridge ci vosi dari u dutturatu 'n fìsica. Addivintau mèmmiru (fellow) di l'Institute of Physics (IOP) ntô 1970 e dâ Royal Society ntô 1983, pî so cuntribbuti ntô campu di l'elettrumagnatìsimu applicatu.