Gela
| Gela | |
| |
| Muttu: Heraclea Civitas Antiquissima (Heraclea città antichissima) | |
| Nomu ufficiali: | Gela |
|---|---|
| Riggiuni: | Sicilia |
| Pruvincia: | Caltanissetta |
| Cuurdinati: | 37°4'N, 14°15'E Ammustra ntâ mappa |
| Superfici: | 276 km² |
| Abbitanti: | 72.444 |
| Dinzitati: | 262 ab./km² |
| Cumuni cunfinanti: | Acati (RG), Caltaggiruni (CT), Butera, Mazzarinu, Niscemi |
| CAP: | 93012 |
| Prifissu telefònicu: | 0933 |
| Situ ufficiali: | http://www.comune.gela.cl.it |
Gela è na città di 72.444 abbitanti dâ pruvincia di Cartanissetta, chi si trova nnâ costa miridiunali dâ Sicilia. L'abbitanti si chiàmanu gilisi. È pi nùmmaru d'abbitanti, lu settimu cumuni sicilianu (doppu Palermu, Catania, Missina, Sarausa, Marsala e Ràusa), i è lu centru agrìculu, nnustriali e cummirciali cchiù mpurtanti nnâ sò pruvincia e nnû sò tirritoriu, chiḍḍu dâ Sicilia centru-miridiunali, astrema prupaggini dû già Vaḍḍu di Notu.
Antica culonia greca, la città si sviluppàu nnû vintèsimu sèculu grazzî ô pòlu petrucchìmicu di l'ENI.
La città avi l'aspirazziuni di essiri la dècima città capulocu di pruvincia dâ Sicilia, aspirizziuni spartuti cû centru vicinu di Caltaggiruni.
Gela è lu capulocu dû comprinsoriu chiamatu arèa gilisi (o paisa gilisa), chi ultra ô capulocu, è cumpostu dî paisa di Niscemi, Butera, Rijesi e Mazzarinu.
Nomu dâ città
Gela è na città di cchiù di dui mila anni e nnû cursu dî sèculi canciàu cchiù voti lu nomu:
- Lindioi: è lu nomu dû primu nzidiamentu culuniali c'acchiana ô sèculu VIII a.C
- Ghelas: è lu nomu dâ gluriusa culonia dòrica funnata nnû 689 a. C. e distruduta difinitivamenti nnû 288 a.C. Diriva dû nomu ndìgginu dû ciumi Gela chi sfocia a est echisignìfica prubbabbirmenti "vurticusu" o "jèlidu"
- Massa Ghelas: unu di l'appillativi attribbuutu dî rumani â zona dâ Gela antica
- Culunnariu: nomu datu â lucalitati pirchì carattirizzata dî ruvini dî templi (chî culonni)
- Eraclea o Heraclea: nomu dû borgu àrabbu medievali funnatu apprima di l’annu 1000 nnâ parti cintrali dâ cullina gilisa.
- Terranova (Terra nova): nomu dâ città funnata nnû 1233 dû reghi Fidiricu II di Svevia ditta macari Eraclea (Riggistri Vaticani);
- Terranova di Sicilia: nnû 1862 vinni agghiunciuta la spicificazziuni “di Sicilia” pi diffirinziari lu centru sicilianu cu l'àutri centri taliani chi ànu lu stissu nomu;
- Gela: lu gluriusu nomu ristitujutu nnû 1927 â città p'arricurdari li fasti dâ città clàssica antica.
Giografìa
Lu tirritoriu di Gela è pi mitati chianiggianti e pi mitati cullinari i è cumprisu ntrâ fascia custera miridiunali e li tirritori di Vutera, Caltaggiruni, Mazzarinu, Niscemi e Acati. La costa, bascia e rinusa, prisenta a tratti dî pareti e rocci di furmazziuni argillusa o carcària sempri priciduti dû rinili. Ê spaḍḍi dâ città si stenni la secunna chianura di l'ìsula p'astinziuni. Lu Golfu di Gela, anchiu e picca prununzatu, è lu cchiù vastu dâ Sicilia. Longu la costa sunnu prisenti tri furmazziuna cullinari dî quali li primi dui sunnu quasi "giamelli": chiḍḍa supra la quali sorgi la città stòrica, chiḍḍa di Muntilongu e chiḍḍa di Mànfria. La prima è quasi cumpletamenti mmaduta dî custruzziuna mentri l'àutri dui sulu parziarmenti.
Clima
La città e la fascia custera currispunnenti gòdinu dû clima miditirràniu, cu mmernu cchiuttostu miti e stati mudiratamenti càuda. Li pricipitazziuni sunni cchiuttostu scarsi (circa 350 mm a l'annu), nnâ granni parti cuncintrati ntra l'autunnu e lu mmernu e sunnu friquenti pirìudi longhi di siccittà di stati. Lu tirritoriu gilisi è assai vintuliatu e è chiḍḍu cchiù assulicchiatu nnâ Europa.
Culligamenti e trasporti
La città si junci principarmenti attraversu strati nazziunali a scurrimentu viloci o tràmiti ferruvìi.
Culligamenti stratali
Gela òccupa na pusizziuni di baricentru rispettu a nummarusi strati statali siciliani. È attravirsata dâ statali 115 c’unisci Sarausa a Tràpani attraversu Rausa e Girgenti. Nultra si junci di: Catania tràmiti la SS 417 di Caltaggiruni; di Castruggiuvanni e Chiazza Armerina attraversu la SS 117 bis "nord-sud" (c’havi a culligàrisi a Santu Stèfanu di Camastra); di Caltanissetta assicutannu la SS 626 "dâ Valli dû Salsu"chi sbucca supra la SS 115 Licata-Gela nnâ cuntrata Burgiu (Vutera); di Riesi e Mazzarinu pigghiannu la statali 190. Nfini tràmiti strati pruvinciali si pò jùnciri di: Niscemi, Scuglitti e Vutera. Gela è capulìnia dâ strata eurupea E45 e è nultra privista comu puntu d'agghicata di l'autustrata A18 Missina-Sarausa-Gela. La Tanginziali cittatina fu custruuta surtantu pi nu trattu brevi di circa 4 chilòmetra nnâ cuntrata Fareḍḍu e, nnî pruggetta, avissi a passari a latu dâ città avitannu accussì lu tràfficu e culligannu megghiu la zona est (portu e zona nnustriali) cu chiḍḍa uccidintali (Manfria e Falcunara) unennu li vari strata statali.
La città è culligata attraversu sirvizza muderni d’autulìnia a tutti li capulochi siciliani (eccettu Tràpani e Missina) e chî lucalitati principali dî pruvinci cunfinanti e di l'hinterland. Li culligamenti cchiù assìdui sunnu chiḍḍi cu Catania, Palermu, Caltanissetta, Castruggiuvanni e Girgenti. Li capulìnia dâ città, senza na vera e propia stazziuni di l’autubbussi, sunnu: lu chiazzali dâ stazziuni firruviaria (attrizzatu cu pinzilini e bigghiettarìa); via Palazzi di frunti lu ngressu dû Spitali Vittoriu Manueli; viali Curtimajuri nnî pressi dî "muretti" (quarteri Macchitella). Quarchi annu ‘n arreri fu criata na stazziuni di l’autubbussi nnâ cuntrata Cantina Sociale ma, nun utilizzata, fu distruduta dî vànnali.
Culligamenti firruviari
Gela è dutata di na stazziuni firruviaria muderna e granni junciuta di treni riggiunali. È stazziuni ntermedia dâ lìnea a binariu ùnicu Caniattì-Mòdica (Caltanissetta-Sarausa) nunchì stazziuni di punta dâ ferruvìa Catania-Caltaggiruni-Gela. A càusa dâ lintizza dî lìnii lu menzu firruviariu è picca utilizzatu dî gilisi.
Culligamenti marìttimi
Gela è dutata di dui strutturi purtuali e na terza è abbannunata di dicenni (lu puntili sbarcatoru): lu portu-ìsula e lu portu rifuggiu (rispittivamenti portu mircantili e portu turìsticu-piscarizzu). Lu portu-ìsula è attrizzatu p’accògghiri navi mircantili di stazza grossa e àutri catigurìi di menzi navali sulamenti nnî casi d’amirgenza cu l'auturizzazziuni spiciali dâ lucali Capitanarìa di portu. Lu portu rifuggiu prisenta na mmuccatura cu funnali assai arriduciuti (menu di 2 metri) tantu di cumprumèttiri lu tràfficu dî mmarcazziuni cchiù nichi. È comu egghiè discretamenti attrizzatu p’accògghiri mmarcazziuni nichi di passaggiu (Canteri navali). Nta l’ùrtimi anni fu uggettu di mmistimenti pùbbrici e privati pâ riqualificazziuni dû molu e la criazziuni di nummarusi puntila d'ormeggiu privati ncintivati dâ crìscita dî prupietari di barchi di diportu. Nu finanziamentu di 67 miliuna d’èuru avissi a sèrviri ô sò ampliamentu e ô migghiuramentu dî sirvizza e di l’attrizzatura purtuali.
Culligamenti aèrii
L’aèruporti cchiù vicini â città di Gela sunnu chiḍḍu di Catania (110 km) e chiḍḍu di Palermu (220 km). Quannu veni attivatu l'ariuportu di Còmisu (45 km) è prubbàbbili chi parti dî viaggiatura gilisi trova cchiù cmminienti utilizzari st'ùrtimu.
È in pruggettu di diversu tempu n'aèruportu di rializzari nnâ Chiana di Gela, n cuntrata Ponti Alivu unni piràutru asisti già na pista aèria criata duranti la Secunna Guerra Munniali.
Lu tirritoriu è dutatu di n'èlipista (centru dirizziunali Enimed di cuntrata Ponti Alivu) e d’un Campu di Volu nnâ cuntrata Fìmmina Morta.
Trasporti urbani
Lu sirvizziu di trasportu urbanu nnâ città è manijatu di l’AST (Azienda Siciliana Trasporti). La lìnia cchiù friquintata è la n. 1 chi culliga la stazziuni firruviaria ô centru, Capusupranu (Spitali) e Macchitella. Li vari riuna cittatini si ponnu jùnciri appoi di l’accussidditti “navetti” (12 lìnii), autubbussu di diminziuni nichi cchiù adatti ê diminziuni dî strati gilisi. Lu culligamentu câ frazziuni di Manfria è gistitu di na ditta lucali. Pî fistivitati vènninu stituiti cursi straurdinari pi culligari megghiu la città ô centru e ô cimiteru (fora dâ città) di Fareḍḍu. Nnî misi dâ stati arcuni autubbussi sèrvinu lu Longumari cittatinu.
Storia
Li tempi antichi
Comu dici lu stòricu Tucìdidi: "A funnari Gela foru nzèmmula Antifemu di Rodi e Èntimu di Crita; iḍḍi si purtaru appressu li culoni dî sò paisa di pruvinenza; chistu successi quarantacincu anni dopu la funnazziuni di Sarausa".
.jpg)
Lu paisi pigghiàu lu nomu dû ciumi Gela, ma lu postu unni ora si trova lu paisi e chi prima era circunnatu dî mura, si chiamàu Lindioi, àppinu leggi dòrichi. Pressappocu 108 anni dopu la culunizzazziuni, li Geloi funnaru Girgenti, chi pigghiau lu nomu dû ciumi chi si trova ḍḍà vicinu; nni fìciru funnatura Aristinu e Pistilu, e cumannaru di usari li stissi liggi di Geloi". E primi tempi dâ sò storia Gela appi un guvernu ripubblicanu ma lu partitu dî nòbbili cumannava câ priputenza, allura ci foru ribilliuna e mmazzatini, e ci foru pirsuni chi àppiru a scappari e si eru a mmucciari a Mactorium chi si truvava dû munti Bubbunia, chi si trova nnû territoriu di oji chi apparteni a Mazzarinu.
A pinzari a ripurtari li fujuti a Gela ci pinzàu, sulu câ bona parola, Telini chi era un sacirdoti dî divinità nfirnali, Plutoni, Cèrbiru, Caronti e Minossi. Lu pirìudu ripubblicanu duràu finu a quannu Cliantru nun addivintau tirannu. Dopu setti anni di tirannìa un cittadinu geloo, Sabellu, l'ammazzau. Dopu Cliantru fu sò frati Ippòcrati a divintari tirannu. Sutta iḍḍu la putenza di Gela criscìu finu ô puntu chi la megghiu parti dî città grechi dâ Sicilia finìu sutta lu sò cumannu, inclusa Sarausa. Duranti tutti chisti vicenni, lu cumannanti dâ cavallarìa di Gela, Giluni, figghiu di Dinumeni e discinnenti di Tilini, si fici canùsciri pû sò curaggiu e valuri. Ippòcrati murìu nnû 486 a.C. mentri cummattiva contra li Sìculi di Ibla Èrea; â sò morti Giluni si fici acclamari tirannu.
Dû 485 a.C. câ caliuna di fari fari la paci ntrê nòbbili e la plebbi di Saràusa, si proclamàu tirannu puru di chist'àutra città. Giluni prifiriva però Sarausa a Gela, aḍḍura lassàu lu guvernu di Gela a sò frati Giruni e iḍḍu si trasfirìu a Sarausa. Di chistu mumentu in poi Gela puliticamenti persi lu sò pristiggiu.
