Càrculu spartutu

Ntâ nfurmàtica, u càrculu spartutu (calcolo parallelo 'n italianu e parallel computing 'n ngrisi) è na speci di càrculu unni si fannu cunti 'n parallelu (zuè tutti nzèmmula e nta na vota) cu dui o cchiù assai prucissura. U càrculu spartutu è assai ùtili quannu un prubblema granni s'arrinesci a spàrtiri nta prubblemi cchiù nichi chi si ponnu arrisòrbiri spartuti. L'ubbiettivu è chiḍḍu di fari cchiù lesti ḍḍi còdici chi pi firrijari abbisògnanu di tantu assai putenza di càrculu.

Càrculu spartutu, distribbujutu e cuncurrenti

L'aggittivu spartutu s'usa sparti pi signalijari na virsioni cchiù spicializzata di càrculu spartutu unni cc'è sulu na mimoria ntra tutti i prucissura. Sta spicìfica serbi pi nun cunfùnniri u càrculu spartutu strictu sensu cu chiḍḍu distribbujutu, unni si fannu tanti cunti 'n parallelu cu dui o cchiù assai prucissura e cu dui o cchiù assai mimori, e chiḍḍu cuncurrenti, unni si fannu tanti cunti 'n parallelu cu un prucissuri sulu.

Liveḍḍi dû parallillìsimu

Cci sunnu furmi diversi di càrculu spartutu:

• parallillìsimu a liveḍḍu di bit,
• parallillìsimu a liveḍḍu d'istruzzioni,
• parallillìsimu a liveḍḍu di dati,
• parallillìsimu a liveḍḍu di còmpiti.

Bibbliugrafìa

• Almerico Murli, Lezioni di calcolo parallelo, Liguori, 2006.

Lijami di fora

• treccani.it, https://www.treccani.it/enciclopedia/computer-calcolo-parallelo_(Enciclopedia-della-Scienza-e-della-Tecnica)/.