Bicicletta di muntagna

Dâ Wikipedia, la nciclupidìa lìbbira.

La bicicletta di muntagna (in ngrisi Mountain Bike, MTB, o puru All-Terrain Bike, ATB) è na bicicletta fatta pi’ putiri caminari macari fora dî strati asfaltati, tantu ntâ nchianata quantu ntâ scinnnuta.

Na bicicletta di muntagna di ciclu-escursiunismu

Storia[cancia | cancia la surgenti]

La bicicletta di muntagna muderna nasci â fini di l’anni ’70, ntâ California, dopu nu longu pirìudu ntô quali s’adupiràvunu bicicletti cumuni cunsati artiggianalmenti, chiamati klunker (scassuni), pi’ fari cursi nta scinnuta supra a’ strati furistali; si riteni ca la prima bicicletta custruuta apposta pi’ l’usu forastrata fu’ chidda di Joe Breeze, ntô 1978. Succissivamenti Gary Fisher, Charlie Kelly e Tom Ritchey s’assuciaru ntâ cumpagnìa MountainBikes chi’ vinnìa sta sorta di bicicletti. Ntê primi anni ’80 furu vinnuti li primi bicicletti di muntagna fabbricati supra a’ larga scala, chi’ a’ ddu tempu erunu picca cchiu’ ssai chi’ bicicletti di cursa rrubustuti, cu’ manubbriu drittu e gummi cchiu’ larghi.

Ntê vint’anni a’ cavaddu dû 2000 la bicicletta di muntagna divintàu nu sport dî cchiu’ diffusi, e la crìscita dû mircatu e la nascita dî cumpitizzioni spurtivi basati supra ê so spicialità pirmitteru nu sviluppu tecnulòggicu cuntinuu, tantu chi’ oggi su’ pussìbili attività chi’ na vota nun si putìunu mancu pinsari.[1]

Carattirìstichi dâ bicicletta di muntagna[cancia | cancia la surgenti]

Tra tutti li sorti di bicicletta, li bicicletti di muntagna sunnu senz’autru chiddi cchiu’ cumplicati: lu funziunamentu ginirali e li cumpunenti principali su’ sempri chiddi, però sparti ca su’ di sòlitu cchiu’ rubbusti, ntâ bicicletta di muntagna sunnu macari prisenti diffirenzi carattirizzanti e elimenti spicìfici.

Tilaru[cancia | cancia la surgenti]

Nu tilaru suspinnutu avanti e arreti

Li tilara pî bicicletti di muntagna su’ carattirizzati di l’aviri na geumitrìa tinninzialmenti cchiu’ cumpatta rispettu a’ chiddi pî bicicletti di strata, a’ manera di cunfiriri maniggivulizza e risistenza. Pi’ stu fattu è diffusa la geumitrìa sloping (abbuccata), ntâ quali lu tubbu orizzuntali è particularmenti nclinatu versu dû basciu, cugnuncènnusi a’ nu tubbu virticali assai curtu. N’autra diffirenza è ntê tilara cu’ suspinsioni d’arreti, unni lu carru havi nu sistema d’articulazzioni pi’ cunsèntiri lu muvimentu virticali dâ rota. Li principali matiriali adupirati sunnu:

  • azzaru cromu-mulibdenu, pisanti, picca caru, risistenti ed elàsticu, si usa ntê mudelli picca custusi ma macari nta cirtuni di nicchia, ntê quali lavuraturi spiciali càlunu lu pisu;
  • leghi d’aluminiu, cchiu’ leggiu di l’azzaru ma tinnenzialmenti cchiu’ rìggidu; la lavuratura è cchiu’ fàcili ed è cchiu’ risistenti a’ l’ossidazzioni, nfatti è lu matiriali ca veni adupiratu cchiu’ ssai;
  • cumpòsiti di fibbra di carboniu: assai leggiu e risistenti, è cchiu’ suscittìbbili di l’autri ê mmistuti e havi nu costu jautu;
  • titaniu, liggissimu e risistenti â currusioni, è lu cchiu’ custusu, ma pû restu assimigghia a’ l’azzaru.

Geumitrìa[cancia | cancia la surgenti]

Schema illustrativu dâ geumitrìa di na bicicletta.

La geumitrìa dû tilaru havi nu rollu funnamintali pi’ ditirminari li capacità e l’inclinazzioni di na bicicletta di muntagna. Nfatti, rispettu a’ l’autri bicicletti, ca hannu tutti n’usu sìmili, tra dî varî sorti di bicicletti di muntagna li geumitrìi ponnu canciari assai.

Appressu cci su’ cirtuni dî variàbbili in jocu: s’havi a’ tèniri prisenti ca spissu sunnu intirdipinnenti.[2]

Àngulu di sterzu (B)
È l’àngulu dâ furcedda cû tirrenu. Fa’ parti dâ geumitrìa dâ furcedda. Maggiuri è l’àngulu, e dunca cchiu’ virticali è la furcedda, maggiuri è la manuvrabbilità. Cchiu’ l’àngulu è nicu, e dunca la furcedda è purtata cchiu’ p’avanti, maggiuri sunnu la capacità d’assòrbiri li mmistuti in vilucità e la stabbilità.
Passu (P+F)
È la distanza tra dî muzza. Na lunghizza cchiu’ ranni duna cchiu’ stabbilità, na lunghizza cchiu’ curta dugna cchiu’ manuvrabbilità.
Lunghizza dû carru (P)
È la distanza dû muvimentu cintrali nfina ô muzzu d’arreti. Cchiu’ curta è, maggiuri è la manuvrabbilità, però è puru maggiuri la tinnenza a’ jisàrisi dâ rota d’avanti. Nu carru longu duna cchiu’ stabbilità, in particulari ntâ nchianata.
Àngulu dû tubbu virticali (A)
È l’àngulu disignatu dû tubbu virticali rispettu ô tirrenu. Nfluenza lu pusizziunamentu dû ciclista, ntâ pidaliata e macari quannu sta’ â ddritta. N’àngulu cchiu’ virticali è cchiu’ bonu pî disciplini pidaliati, n’àngulu cchiu’ abbuccatu pî disciplini di gravità (in ngrisi, gravity).
Autizza dû muvimentu cintrali
È l’autizza dû muvimentu cintrali rispettu a’ nterra, chî roti muntati. Nu muvimentu cintrali basciu cala lu baricentru dû ciclista e renni cchiu’ fàcili ghîcari la bicicletta ntâ curva, però renni macari cchiu’ fàcili annari a’ mmèstiri cu’ petri e autri ostàculi di nterra.
Lunghizza dû tubbu orizzuntali (L)
Ntê tilara sloping s’havi a’ cunsiddirari chidda cu’ l’orizzuntali virtuali. Dipenni sulu dâ cumudità dû ciclista, e di sòlitu è la cosa ca megghiu rapprisenta la tagghia di na bicicletta.

A’ tutti sti cunsiddirazzioni s’havi a’ gghiùnciri macari unni si va’ e metti lu baricentru dû ciclista: si’ è cchiu’ p’avanti sarravi cchiu’ orientatu pâ nchianata, si è cchiu’ p’arreti sarravi cchiu’ orientatu pâ scinnuta.

Suspinsioni[cancia | cancia la surgenti]

Na serî di furceddi

La prisenza di suspinsioni si po’ cunsiddirari la diffirenza cchiu’ evidenti tra na bicicletta di muntagna muderna e l’autri sorti di bicicletta. Li tecnuluggìi appricati nta st’àmmitu ereditannu assai di chiddi sviluppati pi’ l’autri veìculi. In basi ê suspinsioni, li bicicletti di muntagna si ponnu classificari comu:

  • rìggidi, senza suspinsioni;
  • ammurtizzati d’avanti, câ sula suspinsioni antiriuri (in ngrisi front suspended, front, hardtail);
  • biammurtizzati, cu’ tutti dui suspinsioni antiriuri e pustiriuri (in ngrisi full suspended, full).
Schema di na suspinsioni a’ quatrilàtiru

Cu’ l’ammurtizzaturi, di sòlitu idràulici, si ùsunu moddi ed elastòmiri ntê casi cchiu’ ecunòmici, sistemi pneumàtici nta chiddi unni si ricerca la liggirizza, e moddi sulu ntê situazzioni cchiu’ gravusi, comu chi’ sunnu la suluzzioni cchiu’ pisanti.

A’ secunna dû costu, nn’havi cchiu’ o menu sufisticati, e ponnu aviri tanti rigulazzioni idràulichi comu lu bluccaggiu cumpletu, lu smurzamentu e la rigulazzioni di l’autizza.

Lu cumpurtamentu dî suspinsioni d’arreti cancia assai a’ secunna dâ struttura ch’adupirannu. Li principali catigurìi sunnu chidda dû fulcru singulu (in ngrisi, pivot) e chidda dû quatrilàtiru (in ngrisi, 4-bar). St’ùltima cumprenni tanti varianti brivittati, comu lu giuntu Horst, lu quatrilàtiru Lawwill e li sistemi a’ brazza curti comu lu «VPP» dâ Santa Cruz o lu «Maestro» dâ Giant, ognunu chî so particulari punti di forza. Lu schema dâ suspinsioni d’arreti ditèrmina l’effettu dî forzi trasmittuti tra la rota e li pidali pi’ menzu dâ catina (pedal kickback, bobbing), e l’effettu nfunnanti dû frenu.[3]

Trasmissioni[cancia | cancia la surgenti]

La trasmissioni di na bicicletta di muntagna è carattirizzata supra a’ tuttu di rapporti curti, ca sunnu boni pi’ pidaliari supra ê tirreni impervî e rìpidi.

Guarnitura[cancia | cancia la surgenti]

La guarnitura tradizionali cumprenni tri’ curuni (tripla), però si ùsunu macari guarnituri duppî e monucuruna. Lu monucuruna si usa supra a’ menzi distinati ô downhill e ô cross country, chi’ hannu orientamenti spicìfici e nun hannu di bisognu di na gamma di rapporti larghissima. Supra ê menzi distinati ê disciplini cchiu’ ntensi è cumuni muntari, quannu nun è gia’ prisenti, n’aneddu rinfurzatu ca si chiama in ngrisi bash ring e giuva pi’ prutèggiri li curuni dî mmistuti. St’aneddu po’ jèssiri puru fissu e muntatu dû latu d’intra, e di solitu è ncucchiatu a nu sistema guida-catina e attisa-catina, chi’ mpidisci la caduta dâ catina dî curuni.[4]

Canciu e diragghiaturi[cancia | cancia la surgenti]

Canciu d’arreti di na bicicletta di muntagna dû 2013

Comu ntê bicicletti tradizziunali, la canciata è sempri affidata ê diragghiatura a’ trapezziu. Chiddu d’arreti cumunimenti s’intenni canciu, pi’ distinguìrulu di chiddu d’avanti. Cci sunnu cumanni a’ griddu e a’ rutazzioni (ntigrati ntâ manòpula dû manubbriu). Lu canciu di solitu havi la carattirìstica d’aviri lu tinsiunaturi particularmenti longu rispettu a’ chiddu dî bicicletti di cursa, picchì avennu cchiu’ ampîzza di rapporti havi di bisognu di cchiu’ variazzioni dâ lunghizza dâ catina.

La tecnuluggìa a’ diragghiaturi nun è tantu innicata pâ bicicletta di muntagna, datu chi’ esponi parti dilicati a’ mmistuti, lurdìa e fangu. Cci snnu na para d’altirnativi, comu li muzza d’arreti a’ canciu nternu Rohloff e Alfine, lu sistema Pinion e la guarnitura Hammerschmidt. St’ùltimi dui in particulari sunnu innicati pi’ l’utilizzu forastrata, datu ca prutèggiunu li miccanismi di canciata e riddùciunu lu mmarazzu dâ curuna. In gèniri però tutti sti suluzzioni, puru chi’ sunnu efficaci, nun sunnu leggî ed efficenti comu lu sistema tradizziunali a’ diragghiatura, curuni e pignuna, ca pi’ chistu rèstunu li cchiu’ diffusi.[5] [6]

Pidali[cancia | cancia la surgenti]

Li pidali si’ spàrtunu nta dui catigurìi principali: chiatti e a’ scroccu ràpidu.[7]

Li pidali chiatti sunnu chiddi clàssici di bicicletta, evulùtisi cu na supirficî d’appoju ampia, ca pò’ prisintari piricudda (in ngrisi pin) ca nun fannu sciddicari lu pedi in casu di fangu. Li pidali chiatti sunnu li cchiu’ boni pi’ cu ccumencia, e pi’ cu pratica disciplini cchiu’ orientati â guida, o puru va unni putiri appujari nterra un pedi listamenti po’ evitari caduti (ad esempiu, ntô ciclu-alpinismu). Ad ognin modu, assai dipenni puru dâ prifirenza dû ciclista.

Li pidali a’ scroccu ràpidu, nveci, s’hannu a’ adupirari cu’ scarpitti fatti apposta e dutati di ntacchitti, e ancurannu lu pedi dû ciclista â bicicletta; jùtunu a’ dari na pidaliata cchiu’ tunna ed efficaci, picchì li pidali nun sulu vènunu spinciuti, ma puru vènunu tirati versu l’autu. Si ncròccunu autumaticamenti carcannu lu pedi supra ô pidali, e si scròccunu dannu na tursioni latirali. A’ diffirenza dî pidali di strata, lu pedi si po’ ttaccari nta tutti dui li banni dû pidali, offrennu na pussibbilità cchiu’ ssai di ncroccu casumai fangu o terra avìssuru a’ bluccari na modda dû pidali. Attornu a’ l’agganciu cc’è na basi d’appoju, cchiu’ nica o assenti pû cross country e cchiu’ ampia pî disciplini di gravità.

Roti[cancia | cancia la surgenti]

Roti di 29″ e di 26″ a’ cunfruntu

Li roti nun sunnu diffirenti di chiddi di l’autri bicicletti, si’ nun pâ maggiuri rubbustizza e pâ capacità d’alluggiari cupirtuna di sizzioni maggiurata. Parti dâ so maggiuri rubbustizza po’ jèssiri cunfiruta dî perni dî muzza, ca ponnu aviri nu diàmitru tra li 9 e li 20 millimitri. A’ parti lu casu cchiu’ nicu, nfatti, si tratta di l’accussì’ ditti perni passanti ca si nzìtunu sulidamenti ntâ furcedda o ntô carru, garantennu na maggiuri risistenza â tursioni.[8]

Pî roti dâ bicicletta di muntagna, comu ad ora su’ cumuni tri’ furmati. Chiddu tradizziunali è lu standard a’ 26 puseri. La misura ìnnica lu diàmitru dâ rota cu’ tuttu lu cupirtuni, mentri chiddu dû circuni misura 559 mm. A’ pàrtiri dû 2010[9] nto mircatu s’affirmaru autri standard, primu di tutti chiddu a’ 29 puseri. Macari nta stu casu la misura si rifirisci ô diàmitru tutali, tantu chi’ lu sulu circuni havi in effetti lu classicu furmatu 700c (⌀ 622 mm) dî bicicletti di cursa, di trekking e di cità.[10] Li bicicletti pruggittati pî roti di 29 puseri sunnu chiamati in ngrisi 29er.

N’autru standard è chiddu di 27,5″, cu’ circuni 650b (⌀ 584 mm).

La prisenza di tanti standard cunsenti d’aviri cumprumisi diffirenti tra aggilità, rubbustizza, pisu, adirenza ô tirrenu e risistenza ô rutuliamentu. Na rota cchiu’ ranni duna na maggiuri mpronta nterra e rutulìa megghiu, però è menu rubbusta latiralmenti, pisa cchiu’ ssai e havi maggiuri mumentu d’inerzia ed effettu giruscòpicu. Pi’ chistu li roti cchiu’ ranni sunnu megghiu pî disciplini cchiu’ rigulari, nveci chiddi cchiu’ picciriddi sunnu megghiu pî disciplini cchiu’ tècnichi; macari ccani, però, assai è lassatu â prifirenza dû ciclista.[11]

Pneumatici[cancia | cancia la surgenti]

Cupirtuna di bicicletta di muntagna

Li pneumatici hannu sizzioni cumprisa di sòlitu tra 1,8 e 2,5 puseri, ma nta casi spiciali (fat bike) si ponnu rruvari li 4,8 puseri (circa 122 mm). La carcassa havi rubbustizza e pisu variàbbili a’ secunna dâ distinazzioni d’utilizzu. Si carattirizza cu’ l’ìnnici TPI (acrònimu ngrisi di threads per inch, vali a’ diri fila pi’ puseri), chi’ è na misura dû nùmmiru e dunca dû spissuri dî fila ch’a cumpònunu.[12]

Lu disignu dû batti-strata di sòlitu è tassiddatu: certi disigni sunnu cchiu’ boni pû fangu, autri pi’ tirreni pitrusi, autri pi’ chiddi purvirusi, e lu mircatu pruponi tanti autri suluzzioni. È diffusa macari la pràttica, nta l’ammitu agunìsticu, di pirsunalizzari lu disignu in basi ê cunnizzioni particulari di na cursa.[13] Puru li mèsculi sunnu particularmenti evuluti, e si hannu batti-strata macari a’ tripla mèscula.

Li cupirtuna di bicicletta di muntagna esìstunu pi’ càmmara d’aria o puru tubeless; st’ùltimi hannu lu vantaggiu ca ponnu mantèniri prissioni d’usciamentu cchii’ basci, e dunca aviri megghiu adirenza, senza lu rischiu di scuppiari pi’ pizzicatura.[14] Nta stu casu si usa nu latti ca siggìlla autumaticamenti li spirciati nichi, comu chiddi dî spini.

Manubbriu[cancia | cancia la surgenti]

Comu lu tilaru, po’ jèssiri d’aluminiu, d’azzaru, di titaniu o di fibbra di carboniu. Di forma giniralmenti dritta o picca arcuata, havi na lunghizza ca dipenni dâ larghizza dî spaddi dû ciclista, ma nta tutti òi disciplini unni lu rinnimentu dâ pidaliata nun è essinziali, si prifirìsciunu manubbrî cchiu’ larghi, ca garantìsciunu maggiuri cuntrollu e nu megghiu supportu contra dî mmistuti dâ rota d’avanti.

A’ l’estremità dû manubbriu si ponnu gghiùnciri appinnici spiciali, puru noti comu corna, ca secunnu a’ quarchidunu giùvunu ntâ nchianata e in particulari quannu si sta’ â ddritta. St’appinnici però sunnu sempri menu diffusi, picchì sunnu piriculosi in casu di caduta.[15]

Frena[cancia | cancia la surgenti]

Frenu a’ discu

Avanti ca s’intruduceru li frena a’ discu, lu principali riquisitu ch’avìunu a’ aviri li frena di bicicletta di muntagna era la capacità di lassari spazziu bastanti p’evitari l’accùmulu di fangu, ca vinìa cugghiutu dî gummi larghi. Nfina â fini di l’anni nuvanta s’adupiràvunu universalmenti frena di manera cantilever, ca si usàvanu ntô ciclocross; ppoi a’ picca a’ picca furu rimpiazzati dî frena liniari o V-brake, chi’ oggi si usunu supra a’ certi bicicletti di cumpitizzioni o supra a’ chiddi menu custusi. Li frena V-brake sunnu leggî, cùstunu picca e sunnu fàcili a’ mantèniri. L’ùltima varianti di frena ad azzioni supra ô circuni sunnu chiddi idràulici vinnuti dâ Magura.

A’ ccuminciari dû 1997, câ cummircializzazioni dî «Hayes Mag»,[16] si diffunneru li frena a’ discu idràulici, sìmili pi’ custruzzioni e funziunamentu a’ chiddi motuciclìstici. Si ponnu adupirari sulu cu’ roti pruggittati apposta pi sta sorta di frenu, ca hannu raggiaturi boni pi’ gguantari lu mumentu turcenti forti chi’ si crea tra lu muzzu e lu circuni ntâ frinata. Macari lu tilaru e la furcedda hannu a’ jèssiri pridisposti pî frena a’ discu, cu’ appòsiti supporti pû fissaggiu dâ pinza dû frenu.

Li frena a’ discu furu na nnuvazzioni mpurtanti. La maggiuri putenza, mudulabbilità e affidabbilità dâ frinata cunsinteru di rruvari vilucità maggiuri e sfidari scinnuti cchiu’ rìpidi e tècnichi. Pi’ chistu nfluinzaru macari la larghizza dî gummi, la mpurtanza di suspinsioni ca tinìssuru li roti boni a’ cuntattu cû tirrenu, e in ginirali l’entità dî sullicitazzioni ê quali na bicicletta di muntagna po’ jèssiri suttaposta.[16]

Cci sunnu macari frena a’ discu miccànici, unni la prissioni veni mpressa ê pasticchi tirannu nu cavu; ô cuntrariu di chiddi idràulici, li freni a’ discu miccànici spìnciunu sulamenti una dî pasticchi contra dû discu; sunnu menu putenti e pìsunu cchiu’ ssai.[17]

Lu reggi-sedda teliscòpicu[cancia | cancia la surgenti]

Lu reggi-sedda teliscòpicu havi statu supra ô mircatu pi’ tanti anni, però divintàu pupulari a’ cuminciari dû 2010, câ trasuta ntô mircatu di tanti prudutti in cuncurrenza tra d’iddi.

Nun po’ mancari supra â bicicletta di muntagna di enduro: cunsenti di calari e sùrgiri la sedda cuntinuannu a’ pidaliari e a’ guidari, pi’ garantiri la màssima efficienza tantu ntâ nchianata, câ sedda jauta, quantu ntâ scinnuta, câ sedda calata. Ntê mudelli cchiu’ evuluti lu comannu d’azziunamentu si trova supra dû manubbriu, nta l’autri si trova sutta â menza d’avanti dâ sedda.

Maneri di bicicletta di muntagna[cancia | cancia la surgenti]

Cci sunnu tanti maneri di bicicletta di muntagna, ca currispùnnunu a’ l’incirca ê diffirenti attività chi’ si fannu cud idda. La classificazzioni è suttili e nun sempri netta. Pi’ chistu, puru si’ giuva aviri tèrmini cunvinziunali di putiri adupirari, cunta cchiu’ ssai canusciri li fatturi ca megghiu diffirènziunu nu mudellu di n’autru: la geumitrìa dû tilaru, l’escursioni dî suspinsioni, e la sorta dî cumpunenti ca si mùntunu.[18]

Cross country («cursa campestri»)[cancia | cancia la surgenti]

Bicicletta di cross country di carboniu

Sunnu bicicletti di muntagna pruggittati apposta pî cumpitizzioni di cross country, dî quali l’ènfasi supra ê nchianati e lu mantinimentu di na vilucità media jauta, richièdunu bicicletti leggî ed efficienti. Nta l’anni ’80 e li primi ’90 li bicicletti di muntagna di cross country avìunu tilara leggî d’azzaru e furceddi rìggidi. Duranti l’anni ’90 s’evulveru, passannu a’ tilara d’aluminiu e furceddi ammurtizzati (di solitu 80-100 mm). Comu migghiuraru li tecnuluggìi e arruvàu l’usu di cumpòsiti di carboniu, macari nto cross country s’accuminciaru a’ usari bicicletti biammurtizzati e cu’ escursioni un pocu cchiu’ ranni, spicialmenti ntô casu dî cumpitizzioni a’ maratona ca richièdunu pirmanenzi longhi supra dâ sedda.

Lu pisu di na bicicletta di cross country po’ scìnniri sutta a’ l’8 kg. La geumitrìa, chi’ metti lu ciclista nta na pusizzioni assai avanzata, favurisci l’arrampicata e la riattività (vali a’ diri na rispusta ràpida ê corpa di pidali), e trascura la stabbilità e li capacità di scinnuta, dunca sta sorta di bicicletta nun havi bisognu mancu di freni particularmenti putenti, ca pisirìunu cchiu’ ssai. Sti bicicletti ponnu èssiri monucuruna, specialmenti si’ sunnu pî ciclisti cchiu’ allinati. Li roti di 29″ sunnu innicati. Pâ so simplicità sti bicicletti sunnu dispunìbbili macari nta virsioni abbastanza ecunòmichi, però lu pisu di chisti po’ rrivari macari a’ 15 kg.

Downhill («scinnuta»)[cancia | cancia la surgenti]

Bicicletta di downhill

Li bicicletti di muntagna di downhill sunnu sviluppati attornu â cumpitizzioni omònima, ca è na cursa nta scinnuta a’ tempu, supra a’ tracciati viloci e tècnici. Hannu a’ mantèniri vilucità assai auti, dunca hannu na geumitrìa assai stàbbili, cu’ passu longu e ànguli di sedda e sterzu assai distinnuti. La furcedda è a’ doppia piastra, di sòlitu a’ modda, cu’ steli di 40 mm di manera ca resta rìggida cu’ tutti li 200 mm d’escursioni. Si spirimèntunu macari suspinsioni ad aria, picchì la liggirizza è nu fatturi mpurtanti pî bicicletti di downhill: cchiu’ picca inerzia voli diri cchiu’ ssai accilirazzioni e supra a’ tuttu frinati cchiu’ curti. Macari li roti e lu restu dî cumpunenti nun sunnu vutati cumplitamenti â rubbustizza comu ntê bicicletti di freeride, ma rapprisèntunu nu cumprumisu cû pisu. Lu furmatu dî roti è di sòlitu di 26″.

All mountain (ciclu-escursiunismu)[cancia | cancia la surgenti]

Bicicletta di ciclu-escursiunismu

Li bicicletti di all mountain sunnu didicati â disciplina ricriativa nota comu «ciclu-escursiunismu». Si tratta di nu cumprumisu tra li doti di pidaliabbilità, capacità di scinnuta, affidabbilità e cummudità, e di stu puntu di vista si po’ cunsiddirari ntô menzu tra dû cross country e lu downhill. Sti bicicletti di sòlitu hannu suspinsioni d’avanti e d’arreti, cu’ escursioni (rigulàbbili) di 140-150 mm; hannu na furcedda cu’ steli di 32 mm, nu pisu di 12-15 kg, na geumitrìa stàbbili quantu basta pi na scinnuta nun cumpititiva e ca cunsenti ô ciclista di purtàrisi p’arreti pi’ passari tratti rìpidi, ma ca nun priggiùdica la pidaliabbilità ntâ nchianata. È cumuni aviri na guarnitura duppia cu’ bash ring, e rapporti curti pi’ gguantari li nchianati longhi. Li roti di 27,5″ sunnu l’ideali pi na bicicletta di ciclu-escursiunismu.

Di sti bicicletti sunnnu parenti stritti chiddi di trail («trazzera»). Li bicicletti di trail sunnu na via di menzu tra bicicletti di maratona e bicicletti di ciclu-escursiunismu. Hannu escursioni attornu ê 130 mm e cunnivìdunu l’affidabbilità dî bicicletti all mountain, però sunnu cchiu’ orientati â pidaliabbilità e menu â scinnuta. Lu so pisu nun passa li 13 kg. Nta stu segmentu si ponnnu truvari macari bicicletti d’azzaru ammurtizzati sulu d’avanti, ditti front da enduro.

Enduro[cancia | cancia la surgenti]

L’«enduro» è la disciplina cumpititìva dû ciclu-escursiunismu. Pi’ tantu li bicicletti di muntagna di enduro assimìgghiunu a’ chiddi di ciclu-escursiunismu, però sunnu cchiu’ cumpititivi. Hannu 160 mm di escursioni, perni passanti ntê roti, furcedda cu’ steli di 34 o 36 mm pâ maggiuri riggidità ca giuva, ammurtizzaturi d’arreti cu’ serbatoju siparatu, ponnu èssiri monucuruna e hannu nu pisu paragunàbbili a’ chiddu di l’all mountain. Comu furmatu dî roti si scegghî tra 27,5″ e 26″.

Freeride (guida lìbbira)[cancia | cancia la surgenti]

Li bicicletti di muntagna di freeride sunnu distinati a’ l’utilizzu supra a’ pircursi tècnici rializzati apposta, cu’ picca o nuddi nchianati e ostàculi artificiali, rampi e piattafurmi, pi’ cumpitizzioni unni cùntunu sauti e manovri stilìstichi nterra e nta l’aria. Pi’ sti bicicletti la pidaliabbilità nun è quasi mai na nicissità, mentri sunnu mpurtanti rubbustizza e capacità di scinnuta. Li suspinsioni di circa 180 mm di sòlitu sunnu a’ modda, lu tilaru e l’allistimentu li rènnunu capaci di gguantari li sforzi ca sunnu tìpici di sta disciplina. Li roti, di 26″, sunnu larghi e rubbusti. Li pisi ponnu canciari: quarchidunu, nfatti, prifirisci muntari cumpunenti cchiu’ leggî pi’ putiri a’ l’occurrenza pidaliari ntê nchianati; si parra nta sti casi di freeride leggiu.

Autri[cancia | cancia la surgenti]

Na rubbusta dirtbike

Autri mudelli di bicicletta di muntagna sunnu distinati a’ utilizzi particulari: trial, four-cross, street (assimigghiunu â BMX), dirt jump. Livannu chiddi pî primi dui disciplini, ca sunnu particularmenti spicializzati, l’autri s’assimìgghiunu assai, essennu in sustanza bicicletti ammurtizzati davanti, picciriddi e rubbusti, distinati a’ cumpîri evuluzzioni.

Vidi macari[cancia | cancia la surgenti]

Note[cancia | cancia la surgenti]

  1. Billy Savage. (EN) Klunkerz: A Film About Mountain Bikes. Pumelo Pictures, 2006
  2. Michael “AqueousBeef” Zhao. (EN) Geometry, an In Depth Explanation. 10 febbraio 2009. URL spiatu lu 23 gennaio 2014.
  3. Daniel Naftali. Dai monocross alle sospensioni a quadrilatero. 11 febbraio 2012. URL spiatu lu 23 gennaio 2014.
  4. Daniel Naftali. Guarnitura doppia: guida alla conversione. 9 agosto 2012. URL spiatu lu 23 gennaio 2014.
  5. Daniel Naftali. Trasmissioni: cosa c’è di nuovo?. 6 febbraio 2013. URL spiatu lu 23 gennaio 2014.
  6. Daniel Naftali. Pinion e Rohloff, trasmissioni interne a confronto. 30 agosto 2012. URL spiatu lu 23 gennaio 2014.
  7. Jack Bisi. Flat vs SPD. 9 maggio 2013. URL spiatu lu 23 gennaio 2014.
  8. Daniel Naftali. Perno passante vs quick release: chi avrà la meglio?. 4 gennaio 2011. URL spiatu lu 23 gennaio 2014.
  9. Guitar Ted. (EN) The Beginnings Of The Modern 29"er: a History. 2010. URL spiatu lu 23 gennaio 2014.
  10. Di sòlitu a’ chisti si cci rifirisci macari comu 28 puseri, picchì in effetti adupirannu cupirtuna câ spadda cchiu’ bascia.
  11. Daniel Naftali. 26, 27.5 e 29: diametri diversi per discipline diverse?. 25 dicembre 2013. URL spiatu lu 23 gennaio 2014.
  12. Cchiu’ ranni è lu nùmmiru dî fila, e cchiu’ fini hannu a’ jèssiri, e dunca cchiu’ flissìbili.
  13. Daniel Naftali. Tyres mod: come ottenere la gomma perfetta!. 5 ottobre 2011. URL spiatu lu 23 gennaio 2014.
  14. La pizzicatura è dda scuppiata ca si havi quannu la càmmara d’aria resta scafazzata tra dû circuni e lu tirrenu.
  15. "Mountain bike: ecco i rischi". 
  16. 16,0 16,1 Vernon Felton. (EN) Exclusive: The Brake that Changed Everything. novembre 2013. URL spiatu lu 23 gennaio 2014.
  17. (EN) Articles about Brakes. URL spiatu lu 23 gennaio 2014.
  18. Daniel Naftali. Guida e classificazione dei principali tipi di mountain bike. 15 gennaio 2014. URL spiatu lu 23 gennaio 2014.