Béjaïa

Béjaïa o Bugìa è na cità dâ costa di l'Algirìa di circa 160'000 abbitanti. Canusciuta già di èbbica rumana, Béjaïa fu na cità assai mpurtanti ntô mediu evu, quannu era ô centru dî scanci cummirciali tra lu munnu àrabbu e lu Meditirràniu cintrali. Sedi di nu cuvernu illuminatu e di na curti chi uspitava pueti e ntillittuali assai fini (lu cèlibbri pueta sicilianu Ibn Hamdis passau di docu versu lu 1100.), la mpurtanza dû cummerciu era tali chi la scola di raggiuniria dâ cità fu frinquintata di cristiani comu Liunardu Fibonacci chi versu lu 1200 diffunneru la scienza cuntabbili e li nùmmura arabbi ntî tutta l'Europa di l'ebbica.