Usu dâ «A» davanti a li verbi siciliani

Unu dî latinismi cchiù caratturìstici dû sicilianu è chiddu di l'agghiunciuta di la pripusizzioni latina "ad" davanti a li verbi siciliani.

Diffusioni

• Stu finòminu succedi nta tutti li zoni di l'Ìsula dû suli (accussì chiamava Omeru lu grecu la Sicilia).

Asempi

bastari -> abbastari

canùsciri -> accanùsciri

difènniri -> addifènniri

dimustrari -> addimustari

dipènniri -> addipènniri

divintari -> addivintari

dumannari -> addumannari

mustrari -> ammustrari

ricanùsciri -> arricanùsciri

ricugghìrisi -> arricugghìrisi

ricurdari -> arricurdari

rinnìrisi -> arrinnìrisi

ripètiri -> arripètiri, arrupètiri

ristari -> arristari

risvigghiari -> arrisvigghiari, arrisbigghiari, arruspigghiari

sapiri -> assapiri

truvari -> attruvari

vulari -> avvulari, abbulari

ecc.

Rifirimenti ca ùsanu verbi cu sta "a" nizziali

• Vucabbulariu di Piccittu, 1950-1980 (n'ammustra tutti dui)
• Dizziunariu etimològgicu di Giarrizzo, 1989
• Vucabbulariu di Camilleri, 1998
• Vucabbulariu di Lucio Zinna - Antares Editrice, 2002

Ntâ littiratura siciliana

• Traduzzioni di William Shakespeare di Renzu Porcelli:

e vaju contru a mia si t'addifennu.

Cca dintra fannu verra odiu ed amuri

addivintannu còmprici pi forza

penza chi soccu ammenta u tò pueta

è dèbbitu pi soccu t'arrubbàu.

• Lamentu cubbu pi Rocca Ciravula di Santu Calì:

- O figghiu,

m'arrispunnevi, - O figghiu, O figghiu, O figghiu!

E jù lu visti accumpariri allura

• La Barunissa di Carini, virsioni di Salvatore Salomone-Marino:

A dui, a tri s'arròtanu la genti,

Fannu cuncumiu cû pettu trimanti;

Pri la citati un lapuni si senti

Ammiscatu di rucculi e di chianti.

• Dî pruverbi siciliani cugghiuti di Giuseppi Pitrè:

Cui bonu simìna, megghiu arricogghi.

Cui nesci, arrinesci.

Sicilianu standard usatu ntâ wikipedia siciliana

• Pi scrìviri artìculi nta la wikipedia siciliana, si ponnu usari li furmi siciliani curti o chiddi longhi. Nun avemu nudda prifirenza puru siddu li furmi longhi sicilianizzanti (abbastari, abballari, arricògghiri, arrispùnniri, ecc.) sunnu chiddi cchiù tìpichi siciliani mentri arcuni di li furmi curti siciliani putìssiru èssiri furmi taliani sicilianizzati ricentimenti.