Petra do' Malucunsigghiu

Dâ Wikipedia, la nciclupidìa lìbbira.

Cuurdinati: 37°29′57″N 15°05′04″E / 37.499278°N 15.084308°E / 37.499278; 15.084308

Petra do' Malucunsigghiu.

La Petra do' Malucunsigghiu è 'na crjata antica ni petra labbìca cha nun si sapi di unn'è cha veni, ljata alli tràggici vicenni do' 1516, di unni si pigghiau lu nomi, e s'attrova o' centru di Catania.

Forma[cancia | cancia la surgenti]

S'atratta di 'na pettra labbìca assai pirciata, frummata a cilinniru picca svasatu e allicchittata cu' 'na traccia a toro tantu di susu quantu di jusu do' cilinnuru. La petra è assai cunsunta pri causa da' chioggia e si vidi macari 'na mala rattata, 'na scaffa, cha po' essiri cha si furmò doppu 'na bedda adduppicata. Francesco Ferrara ni duna li minsuri 'mperi siciliani: tri peri n'autizza pri tri peri di diamitru[1]

Origgìni[cancia | cancia la surgenti]

Picca sapemu di 'sta petra. Si dici cha fu nu capitello dorico in pietra lavica[2], ma lu stili doricu non ni havi di 'sti frommi: putissi essiri 'na strana fromma do' stili tuscanicu o di n'autru stili.

La prisenza di la petra labbìca ne' tempi di l'antichi si havi assai a Catania sulamenti pozza lu tempu ripubblicanu, fussi fussi appressu all'eruzioni do' 122-121 a.C.: chissu putissi essiri nu' terminus post quem cha n'aggiuvassi pri darini ajutu a darici l'età alla crjata. Si dici cha 'stu capiteddu faciva parti di 'ntempliu di la civitati antica[3], 'nsemulla a 'na travi 'rossa 'rossa cha oggi'addì sparìu[4]. La banda unni s'attruava di princìpiu fa penzari cha 'sta petra fu parti di 'na struttura 'ranni assai e pubbrica, cha s'attruava intra alla civitati vecchia: difattu chiùi a settentrioni l'Anfitiatru chiuriva la civitati ròmana e a iddu s'attaccaunu li necròpuli.

Storia[cancia | cancia la surgenti]

La petra, di facci o' Castiddu.

La petra fici parti di tutta 'na seri' di ruini cha faceunu parti di 'na vecchia struttura cha oggi'addì non c'è chiùi. Nto 1516 'sti ruini foru lu puntu unni s'ancontraunu li ribelli allu suvranu di Spagna. Quannu mossi Ferrannu Lu Cattolicu ndo 23 di jinnaru, la Sicilia passau di li manu de' Trastamara o' picciriddu Carru d'Asbuggu.

Nda 'stu climu 'ncertu e 'scuru pri la succesioni, lu viceré cha si n'hava gghiri, Ugo di Moncada, non vosi irasinni e li nobbìli siciliani ci desuru versu e curmogghiu: accussini, iddi crideunu, puteunu aviri favuri di Ugo e, fussi fussi, macari la libbirtà di lu Rejnu di Ispagna. Ci fu appressu 'na viulenta verra civili cha abbruciò tutta l'insula pri tri anni e Catania ni fici parti, mustrannusi tra le civitati chiussai ardimentusi[5].

Li nobbìli di 'sta civitati si videunu o' chianu de' Trixini, l'antica chiazza cha si chiamava accussini pri la prisenza do' ritiru nicareddu di San Nicola de' Trixini (aoggiaddì Santa Nicolella), cha s'attruava appressu e' Quattru Canti ntra la strata Etnea e l'acchianata di Sangiulianu. Pozza cha ci fu tradimentu, 'nu sbirru ci dissi e' surdati do' re unni è cha si radunaunu li ribbelli: 'st'urtimi irunu all'appuntamentu senza sapiri nenti e attruvarunu l'esercitu mannatu do' novu vicerè (Etturi Pignateddi) cha li aspittava e fici straggi di cu è cha c'era pri la cuspiraziuni[3][5][6].

La petra, lorda di lu sancu de' ribbelli, fu misa ndi la pubblica chiazza[7] addimodu cha si minacciassi sempri la civitati e li cuspiraturi cha ancora nun si canusceunu. Accuddì fu chiamata Petra do' Malucunzigghiu, malu cunsigghiu o Malucunsigghiu, pricchìni ci cunsigghiau mali alli ribbelli di irici all'appuntamentu, quannu l'aspittava la morti. L'acchitravi, mmeci, 'u purtaru alla vecchia Loggia (lu palazzu do' Sinatu, cha appoi fu scassatu ndo 1693 e rifattu chiù supra, aoggiaddì è lu Palazzu de' Liafanti) pri frustari a cu è cha non pavava lu dazìu[8]. Ndo 1872 la petra fu pigghiata e puttata e' Quattru Cantuni, fussi fussi pri lassalla unni è cha s'attruava e' so' tempi[3][5][8], di pricisu ni unu de' cantucceddido' curtigghieddu nicu do' Palazzu Paternò Castello di Carcaci, unni arristau 'nfinu o' 2009, quannu fu puttata alli porti do' Museu Civicu do' Castiddu Ursinu[6], misu intra a 'nu jardineddu che' ciuri. Lassata all'aqua e o' ventu, nde mani de' zaurdi cha scipparu li chiantini do' jardinu, la petra arristau senza nomu nfinu o' 28 di maiu 2013, quannu 'na scola di Lebbrinu che' soddi do' POR, arrialau a' civitati e alla petra 'ncartidduzzu cu' la istoria da' crjata[9][10].

Note[cancia | cancia la surgenti]

  1. ^ Francesco Ferrara, op. cit., 190
  2. ^ Capiteddu doricu 'mpetra labbìca. Viri, pri l'asempiu Claudio Alessandri, op. cit., 164
  3. ^ a b c Claudio Alessandri, op. cit., 164
  4. ^ Pari cha 'stu frammentu fu pigghiatu e purtatu do' chianu de' Trixini alla Loggia e appoi purtatu ndo' curtigghieddu do' Tiatru massimu Vincenzu Bellini unni fu scurdatu; cfr. Claudio Alessandri, op. cit., 164. Ma però di' 'stu curtigghi sparìu completamenti, cha fossi si persi cu' sapi quannu; viri Quella pietra senza nome.
  5. ^ a b c Pietra del malconsiglio.
  6. ^ a b Quella pietra..., op. cit.'
  7. ^ Lu chianu di la Fera, oggi'addì unni è na chiazzedda d'arrera alla Colleggiata.
  8. ^ a b Storie e Leggende Catanesi - Pietra del Malconsiglio (Catania 1516)
  9. ^ Segnali di civiltà: Librino adotta la memoria di Catania
  10. ^ Castello Ursino, storia della pietra anonima «I ragazzi di Librino svegliano Catania»

Bibbliografia[cancia | cancia la surgenti]

Vuci currilati[cancia | cancia la surgenti]


Siti archiològgichi di Catania
Foro1.jpg

Antichità di Catania; Foru rumanu; Anfitiatru rumanu di Catania; Tiatru rumanu di Catania; Odeon; Termi di Catania; Termi Achilliani; Termi di lu ndirizzu; Pantiùni; Petra do' Malucunsigghiu;