Gela, Voscu Littòriu-Ampòriu arcàicu

Dâ Wikipedia, la nciclupidìa lìbbira.
Trasuta pi l'ària archiològgica dimaniali " Voscu Littòriu-Ampòriu arcàicu"

Voscu Littòriu-Ampòriu arcàicu (Bosco Littorio 'n talianu) è na zona rinusa dâ costa siciliana ntô comuni di Gela cu na viggitazzioni fitta fitta, unni s'attrova n'ària archiològgica ca sarva li resti di n'ampòriu arcàicu, risalenti a lu VII sèculu a.C..

La zona pigghiau lu nomu chi havi ora a l'èbbica dû "Vintènniu". Cu la rializzazzioni di la raffinarìa nti l'anni '50, la viggitazzioni patìu li cunziquenzi di li fumi tòssichi e macari aoggi si ponnu taliari l'àrvuli tumifatti e nturciuniati. Finu a l'anni '70, l' ària vinìa usata dî gilisi p'arrifriscàrisi ntâ stati e di ccà scìnniri ammeri a lu mari. Foru assai friquenti macari li tumbaroli, ca cci arrubbàvunu l'uggetti pigghiati ntâ rina[1].

Ntô 1983 ci foru fatti scavi archiològgichi ca purtaru a la canuscenza di l'ampòriu e dû 1992 l'ària apparteni a lu dimàniu riggiunali cu la stituzzioni di la Suprintinnenza di Caltanissetta, ca ancora aoggi òspita la sedi gilisi. Lu voscu, unni si trasi libbiramenti, vinni ricintatu e è prutiggiutu dâ Vardia furistali; l'arìa archiològgica è nzinu a ora 'n fasi di scavu.

L'Ampòriu arcàicu[cancia | cancia la surgenti]

Scavi di l'anticu ampòriu: si vìdunu li purtusi d'alluggiamentu pir li travi di lu tettu
Viduta di l'ambienti "A1" di lu VI sèculu a.C. e di la so' porta

L' Ampòriu arcàicu[2], accussì adintificatu di l'archiòlughi, sarva n'assai nùmmira di strutturi (chiossai di la dicina) ca appartènunu a nu granni quarteri, ca si spanneva dû portu supra ô mari nzinu a l'acròpuli di l'antica civitati greca di Ghélas(lu situ di l'antica acròpuli aoggi è la cullina appiddata Mulinu a ventu), ni la zona dilimitata di lu ciumi Gela a miridioni. Si tratta di edifìzî cu li stanzi quatrati chiuttostu rijulari. Li mura si sàrvanu finu a chiossai di 2 metri di autizza e a li vôti sàrvanuu la lìnia di posa di l'antichi travi dû tettu. Ni certi casi s'attruvau macari lu stratu di ntònacu ca rivistiva li mura dâ parti d'intra. Nti una di li strutturi è ancora sana la porta di trasuta, cu li stìpiti e l'architravi. La isata era custruita 'n madduni crudi, caudiati cû suli, probabbirmenti rializzati 'n sèrii datusi cà quasi tutti prisèntanu li stissi misura (60 x 60 x 15 cm).

Na prima fasi di vita di stu quarteri, è datatu a lu pirìudu dâ funnaziuni dâ culònia greca (VIII seculu a.C.). Lu situ si sviluppau ni lu VI sèculu, nzinu a la so' distruzzioni doppu lu 480 a.C., prubabbirmenti pir causi naturali, addiforsi nu marimotu: tracci di n'avvinimentu traumàticu si vìdunu ntê mura sdirubbati di nu pocu di càmmiri d'abbitazzioni. Supra a li resti dû quarteri arcàicu, s'attruvau la tistimonianza di n'àutra fasi vitali cû ritruvamentu dî resti di banchetti, prubabbirmenti a scopu rituali.

La scuperta dû situ avvinìu mentri si travagghiava pi fari li funnamenta di chiddu c'avìa èssiri n'asilu cumunali. A sècutu di na signalazzioni, li travagghi foru bluccati e lu canteri pir lu novu l'asilu s'appi spustari a n'àutra banna.

Ni lu dicèmmiru 1999, mentri vinìanu fatti li scavi archiulòggichi, a uccidenti di lu Voscu, sutta la dirizzioni di la suprintinnenti Rosalba Panvini e cunnuciuti di l'archiòluga Lavinia Sole, foru attruvati tri altari fittili, ca si dàtanu a lu dicènniu 490-480 a.C. e su' dicurati di fijuri mitulòggichi a rilevu: nti unu la gòrgoni Mìdusa (la fijura arricorda l'esimplari sìmili ni la forma di antifìssa espunutu a lu museu "Paolo Orsi" a Sarausa), cu li figghi Pecasu e Crisàuri sutta li vrazza; n'àutru la dia Eos, mentri ca si stà purtannu Thanatos; e pi finiri, nti lu terzu altari c'è la rapprisintazzioni di na trìadi fimminina (tri dei fìmmini) ca nun si ponnu adintificari. L'altari su' aora espunuti ntô Museu archiològgicu riggiunali di Gela[3].

N'àutru ciclu di scavazzioni, accuminciatu a nuvèmmiru2007, si cunchiùriu l'annu doppu, a sittèmmiru[4], e fu fattu assemi a lu ricùpiru di li navi arcàichi attruvati ntô mari 'n facci ê scavi. Li dui scuperti, li navi e l'ampòriu, su' tinuti 'n conzidirazzioni di li studiusi assemi, comu ùnicu uggettu di ricerca, pirchì prubabbirmenti lijati di lu stissu eventu catastròficu[5].

Lu situ si grapiu ni l'occasioni di lu cungressu Traffici, commerci e vie di distribuzione nel Mediterraneo tra protostoria e V secolo a.C. (27 - 29 maju 2009) dô 29 di maiu ô pubbricu[6].

Nuta[cancia | cancia la surgenti]

  1. Lu prubblema dû furtu di li riperti archiològgichi hà sempri statu tìpicu dâ Sicilia e di sti banni spiciarmenti, cunzidirannu la quantità mprissiunanti di matiriali geloi ca s'attròvunu 'n tuttu lu munnu ni li varî musei, unni su' sarvati li riperti di la cui urìggini è assai vôti clannistina
  2. La dinominazzioni ufficiali è Gela, Bosco Littorio-Emporio arcaico (Gela, Voscu Littòriu-Ampòriu arcàicu). Pir la rializzazzioni di stu paràgrafu ci s'abbasau supra lu testu R. Panvini; F. Giudice, Ta Attika: veder greco a Gela : ceramiche attiche figurate dall'antica colonia, Roma 2003, pagg. 215 passim
  3. Pir li altari - cronuluggìa, stili, rafficurazzini - talìa R. Pavini, Les autels archaïque de Gela. Une découverte exceptionelle en Sicile. Musèe du Louvre, Salle de Diane (25 septembre-17 décembre 2001), Caltanissetta 2001
  4. Pi' sti novi acquisizzioni L. Sole, senza pubblicazzioni.
  5. Accomora talìa pi asìmpiu la 'ntervista a Rosalba Panvini
  6. Talìa lu situ dô Ministeru pir li beni e li attività culturali

Bibliugrafìa[cancia | cancia la surgenti]

  • R. Panvini; F. Giudice, Ta Attika: veder greco a Gela : ceramiche attiche figurate dall'antica colonia, Roma 2003
  • R. Pavini, Les autels archaïque de Géla. Une découverte exceptionelle en Sicile. Musèe du Louvre, Salle de Diane (25 septembre-17 décembre 2001), Caltanissetta 2001

Vuci currilati[cancia | cancia la surgenti]

Lijami di fora[cancia | cancia la surgenti]


Siti archiològgichi dâ Sicilia

Adranon (Adranu)  • Akragas (Girgenti) • Akrai (Palazzolu Acrèidi) • Akrillai • Antichità di Catania • Casmeni • Castellucciu • Catacummi di Sarausa • Cava d'Ispica • Cefalù • Centuripe • Culli Maduri • Cullina di Sant’Ippòlitu • Eloru • Eraclea Minoa • Imera • Kamarina  • Marsala • Megara Hyblaea • Morgantina • Mozzia • Munti Adranuni • Notu Antica • Pantalica • Parcu Archiòloggicu dâ Neapolis • Sammuca Zabut. • Seggesta • Silinunti • Thapsos • Ustica • Villa Rumana dû Casali (Chiazza) • Villa Rumana di Castruriali • Villa rumana dû Tellaru • Voscu Littòriu-Ampòriu arcàicu-Gela