Praja di Catania

Dâ Wikipedia, la nciclupidìa lìbbira.
Jump to navigation Jump to search
La praja di Catania.
La praja di Catania a l'arba.
La praja di Catania a lu scurari.

La Praja (ditta macari Plaja ) , è lu nomu dû liturali, fattu tuttu di rina, ca si stenni pi 18 chilòmitri accuminciannu dû portu di Catania e, jiènnu versu Sarausa, nzinu a la lucalità di Agnuni Bagni (frazioni di Augusta, ntâ pruvincia di Sarausa). La praja (scritta macari Playa ‘n talianu) è, ntâ stati, la lucalitati barniari cchiù friquintata dê catanisi, unni, tra iddi, sarausani e turisti, ogni jornu è affuddata di migghiara di cristiani.

Ntâ Praja ci sunnu na granni quantitati di stabbilimenti barniari, arberghi, villaggi turìstichi, discutechi, acquapark e diversi spiaggi lìbbiri gistiti dô cumuni.
A li spaddi dâ spiaggia, nta la parti nizziali di Catania, c’è lu "buschettu dâ Praja", granni quarchi 280 Kmq; chistu è cumpostu di na macchia virdi, ca fu fatta cu nu rimbuscamentu ntô pirìudu tra li dui guerri munniali: ci sù chiantati chiossai àrbiri di pini marìttimi e quarchi deci anni fa vinni trasfurmatu n ària attrizzata, unni spissu ci fannu manifistazziuni spurtivi agunìstici e amaturiali; c’è nu lachettu cu li cigni e li pàpiri, ci sù jòchi pi li picciriddi, ci sù tàvuli e seggi di lignu pi la scampagnata e, tanticchia chiù ddà, c’è nu maniggiu unni cuegghè si po’ scrìviri e jiri a cavaddu macari ammenzu a la rina di la Praja, quannu nun è pirìudu barniari.

Cchiù avanti di quarchi 10 chilòmitri, unni finìsciunu li stabbilimenti barniari e li strutturi turìstichi, sempri ntô liturali, c’è n’ària risidenziali chiamata "Villaggiu Paradisu di l’Aranci", unni ci foru fatti cintinara di abbitazziuni pi villiggiatura, senza nudda cunziddirazziuni pi li vìnculi tirriturriali e ambientali: tantìssimi casi sù custruiti, si po’ diri, a riva dû mari.

Ancora chiù avanti, c’è la foci dû ciumi Simetu: macari ccà stàvanu custruennu abbitazziuni nzichiatanza, ma, siccomu, pi furtuna, na granni ària attornu a lu ciumi addivintau oasi naturali, ntirvìnnuru li naturalisti e l’ambientalisti ca custrìnsiru lu cumuni a tàliari ddòcu e tanti abbitaziuni foru sdirubbati.

Tutti chiddi ca hannu visitatu la Praja, dìciunu ca idda rapprisenta n’uccasiuni pirduta pi la citati: la sò rina d'oru, la biddizza dô mari, lu crima, putìa fari addivintari sta zona na vera e propia “rivera rumagnola” siciliana. Pi stu mutivu, s’hà circatu di riqualificari la zona, ma, purtroppu, î migghiuramenti, pi chiddu ca si putìa fari, sunu picca e nenti.