Òasi dô Simetu
La Riserva Naturali "Oasi del Simeto", comu veni dilimitata di lu D.A. di lu 13/3/1984, òccupa na supirfici di quarchi 1850 èttari e si stenni nta la costa pi 8 Km, cu na prufunnità di quarchi 2,3 Km. Lu sò tirritoriu è nzoccu arresta di n'anticu e granni ecusistema palustri ca si estinnìa a sud di la citati di Catania e ca cumprinnìa diversi zoni ùmidi:la foci di lu Simetu, î Pantani di Catania e lu Bivieri di Lintini.
Lu Simetu, lu chiù granni ciumi sicilianu pi bacinu e purtata, criò l'ecusistema unni è cullucata la Riserva. Iddu hà urìggini nta la Serra di lu Re, unu di li rilevi chiù àuti di la catina di munti di li Nèbbrudi. Ntô sò caminu, intra a la riserva, è custiggiatu di chianti tìpichi di li tirreni milmusi: canni di paludi, junchi di la stoia, lischi a fogghi stritti.
Doppu sta fascia milmusa accumincia na zona di chianura, suggetta a nnundazziuni nvirnali e siccamenti d'astati, unni la viggitazioni è cumposta di Tamerici, Junchi pungenti, acuti e miridiunali, Salici cumuni e pedicellati.
Na terza fascia, furmata di nu tirrenu chiù mpirmiàbbili, argillusu e cupertu di salsìdini, è custituita di na viggitazzioni di arbusti nichi, comu la Salicornia fruticusa, la Suaeda marìttima, l'Atriplice portulacoide e lu Limoniu cumuni.
Lu liturali rinusu a li lati di la fuci dû ciumi, havi na viggitazzioni ancora cchiù ricca: Violaciocca sirvatica, Sàlsola, Santolina, Poligono marìttimu e Ravastrello marìttimu, nta la battiggia.
Nta lu nternu, tra li duni sabbiusi, truvamu Gramigna di li spiaggi, Sparto pungenti, Mirto, Fiordalisu di li spiaggi, Gigghiu di li spiaggi, macchi di Lentiscu e Olivastru.
Numirusi sunnu l’acceddi ca, duranti la migrazzioni, si fèrmanu pi sosta nta la foci: Airuni cenerinu, airuni jancu, airuni russu, pittima, pittima riali, mignattaiu, chiurlu, ischiuni, avucetta, vulpoca, piviere duratu, beccaccia di mari, garzetta, sgarza ciuffettu, nitticora, spàtula, cumbattente e cavaleri d'Italia sunnu li speci chiù rapprisintativi.
Altrettantu numirusi sunnu l’acceddi stanziali. Nta li zoni palustri sunnu assai cumuni la gallinedda d'acqua e la folaga; chiù rari lu tuffettu, lu tarabusinu, la moretta tabaccata e lu purciglioni. Ntra la viggitazzioni riparata nitìficanu la calandrella, l'usignolu di ciumi, lu beccamoschinu, la cannaiola, lu pendulinu, lu fratinu e lu fanellu. Ntra li zoni aperti e nta li pàsculi sunnu prisenti la calandra, la cappellaccia, l'occhiucottu e lu strilluzzu. Nta li zoni arbirati s’attròvanu capineri, cinciallegri, rampichini, ghiandaie e virduni. Nta l’àrii marginali o curtivati ci sunnu cardillini, verzellini, pàssiri mattuggi, fringueddi, saltimpali e gazzi.
L’ùnici rapaci, nidificanti nta la riserva sunnu lu gheppiu e lu barbagianni, ca si nùtrinu di ruditura e rèttili nichi. Oltri ca acceddi, ci sunnu macari: tartarughi d'acqua duci, natrici, sarpenti di granni dimenzioni (ca si nùtrinu di pisci), nzetti macari rari, vurpi, dònnuli, lepri e cunigghi sirvaggi.
Nta la foci di lu Simetu, speciarmenti doppu na forti mariggiata,si po’ ancora arriccògghiri l'ambra, na resina fùssili canusciuta già nta l’èbbica preistòrica.
L'ambra, "electron" 'n grecu, ca pi tantu tempu si pinzava ca s’attruvava sulu nta lu Simetu, fu chiamata "simetite". Ancora oggi è ricircata nta li giuellerìi e è cunziddirata tra li chiù priaggiati di lu munnu. A Catania, unni c’è la chiù ricca cullezzioni di ambra di lu Simetu, la pòlviri di ambra vinìa usata di li mastri liutari pi lucidari li strumenti di particulari preggiu.