Papiru
Lu papiru apparteni a lu gèniri cyperus e è nativu di l'Àfrica nord-ovist e dâ Sicilia ; pò addivintari àutu nzinu a dui o tri metri (certi voti macari cincu metri) e lu sò diàmitru pò èssiri di menzu metru finu a nu metru e menzu; lu fustu è lisciu e virdi-scuru; li ciuri spùntunu ‘n pizzu a li fusti tra giugnettu e sittèmmiru e hannu na furma comu di piumi longhi finu a vinticincu cintìmitri
Usu dû papiru nta l’antichità
[cancia | cancia la surgenti]Nta l’antichitati lu papiru vinìa usatu ppi fari uggetti di usu cumuni comu, p’asempiu, scarpi. Li radici vinìanu siccati ô suli e addumati ppi usàrili ô postu dû carbuni. La parti cchiù moddi dû fustu vinìa manciata, mentri li ciuri vinianu ntrizzati ppi fari curuni pi li dei. Ma chiddu ca fu l’usu cchiù mpurtanti è lu fogghiu ca vinìa criatu pâ scrittura. 'N particulari l'Eggizziani ô tempu dî farauni, avìanu sprummintatu nu mètudu di trattamentu dâ carta di papiru chi renni lu papiru assai chiaru e stàbbili pi millenni. E' curiusu lu fattu chi stu mètudu si persi. Oggi lu trattamentu pâ carta di papiru, comu si pràtica ntî l'Eggittu mudernu e n Sicilia, nun rinesci cchiù a agghicari a stu liveddu di stabbilità.
Lu papiru di Sarausa
[cancia | cancia la surgenti]Lu papiru ca crisci a Sarausa veni chiamatu di li studiusi Cyperus Papyrus Linneo. Secunnu quarcunu di ssi studiusi, sta chianta dìciunu ca fu purtata di l'Eggittu ammeri lu 250 a.c., àutri nveci dìciunu ca foru l’ àrabbi a purtari la chianta nta la Sicilia, e dìciunu àutri studiusi ca stu papiru è propriu nativu di Sarausa. Lu papiru sarausanu crisci nta nu ciumi nicareddu chiamatu Ciani e la biddizza di iddu è propriu data di la ricca viggitazzioni di papiri ca ci crisci.
Ancora oggi cu lu papiru di Sarausa veni rializzata la carta-papiru, ca veni appoi addisignata di l’artisti lucali e vinnuta ntê nicuzzietti a li turristi.
A Sarausa, ô viali Teòcritu n.66, c’è lu Museo dô Papiru apertu tutti li jorna (tranni lu lunidìa) di li novi di matina nzinu a n’ura doppu menzujornu e appoi dê cincu di pumiriggiu finu ê setti di sira.
