La Barunissa di Carini (puema)
La Barunissa di Carini è nu puema tradizziunali chi si tratta dâ storia tràggica di l'omicidiu di Laura Lanza, ê manu di so patri, Cèsari Lanza.
Ntra picca tempu dâ so morti, la storia dâ barunissa addiventa lu cuntinutu dî cantastorii, e trasi ntâ cultura pupulari. Attraversu li sèculi, tanti variazzioni si svilupparu.
Lu folkloristu, Sarvaturi Salumuni-Marinu, studiau tutti sti variazzioni pi na cinquantina d'anni, e pubbricau dui libbra di stu puema, ntô 1873 e ntô 1914. [1]
Dui virsioni[cancia | cancia la surgenti]
Chissi sunnu asempi di dui virsioni dû puema chi cumprènninu lu risurtatu dî studii di Salumuni-Marinu, accuminzanu cû primu versu: [2]
- Virsioni di 1873:
- Chianci Palermu, chianci Siragusa,
- Carini cc'è lu luttu ad ogni casa;
- Cu' la purtau sta nova dulurusa
- Mai paci pozz'aviri a la sò casa.
- Haju la menti mia tantu cunfusa,
- Lu cori abbunna, lu sangu stravasa;
- Vurria 'na canzunedda rispittusa,
- Chiancissi la culonna a la mè casa;
- La megghiu stidda chi rideva in celu,
- Arma senza cappottu e senza velu;
- La megghiu stidda di li sarafini,
- Povira Barunissa di Carini!
- Virsioni di 1914:
- Chianci Palermu, chianci Siragusa,
- chianci Carini lu amaru Casu
- chi fu petra di l'àriu dulusa,
- fu dragunara arbòlica, marvasa.
- A cuntalia, la Storia rispittusa,
- lu cori abbunna e lu sangu stravasa,
- e a cu' la senti resta l'arma 'nvasa;
- e resta un gruppu, e resta 'na rancura:
- Comu si persi sta Bella Signura!
- Stidda lucenti, com'appi sta fini?
- Povira Barunissa di Carini!
e l'ùrtimu versu:
- Virsioni di 1873:
- L'ira fa scava la nostra ragiuni,
- Nui metti all'occhi 'na manta di sangu;
- Lu suspicu strascina a valancuni,
- L'onori e la virtù cci damu bannu.
- Lu sarilegiu di l'impiu Baruni
- Tutti li rami soi lu chiancirannu;
- Cu' fa lu mali cu l'occhi cicati,
- E 'ntra la cara sua onuri 'un senti,
- E la manu di Diu calcula nenti;
- Cala, manu di Diu, ca tantu pisi,
- Cala manu di Diu, fati palisi!
- Virsioni di 1914:
- Stu munnu è un gurgu di dolu e fruduri,
- ma lu distinu nni junti fatali;
- e stu Casu ruinu d'attirruri
- chi mai si 'ntisi 'ntra li Cristiani
- è sagrilègiu chi, senza pirduni,
- lu chiancirannu lu zuccu e li rami.
- Lu chiancirannu! Pinzati, pinzati,
- cu' fa lu mali cu l'occhi cicati,
- e caru teni l'onuri fallenti
- e la manu di Diu càlcula nenti!
- O gran manu di Diu, ca tantu pisi,
- cala, manu di Diu, fatti palisi.