Ibrahim II
Abu Is`haq Ibrahim II (in àrabbu أبو اسحاق ابراهيم الثاني; natu versu lu 850 e mortu a Cosenza lu 23 di uttùviru 902) fu lu nonu emiru aglabbita in Ifriqiya.
Succidiu a so frati Muhammad II (864-875). Puru siddu ereditau nu regnu dicimatu dâ pesti dû 874, lu so regnu fu ecunomicamenti prospiru. Ntô 876 custruù nu palazzu novu vicinu Kairouan e tra li sò cuntribbuti ci foru nu sviluppu di l'agricurtura grazzi puru â costruzzioni di sistemi d'irrigazzioni.
Sutta lu sò regnu la cunquista dâ Sicilia fu cuntinuata câ cunquista di Sarausa ntô 878, ma ntô 874 li bizzantini avèvanu rinisciutu a jittari fora di Bari li mussulmani chi dû 847 duminavanu la cità. Puru l'emiratu di Tarantu, già ntî na fasi di dicadenza doppu na trintina d'anni di esistenza fu attaccatu e distruttu dî bizzantini ntô 880. Ibrahim sbarcau 'n Sicilia a Trapani â fini di maiu dû 902 pigghiannu pirsunarmenti lu cuntrollu dâ Sicilia. Participau pirsunarmenti a cummattimenti dicisivi pi nstaurari lu duminiu mussurmanu n Sicilia e parziarmenti puru n Calabbria. Doppu n'assediu militari riniscìu a pigghiari la cità di Taurmina. Murìu di pesti a Cosenza duranti n'assediu chi cumannau a da cità e chi durava ggià di 22 jorna.
