Hylobatidae

? Hylobatidae
Na cucchia di Hylobates lar
Classificazzioni scintìfica
Duminiu: Eukaryota Suprafilu: Deuterostomia Filu: Chordata Suttafilu: Vertebrata Nfrafilu: Gnathostomata Supraclassi: Tetrapoda Classi: Mammalia Suttaclassi: Theria Nfraclassi: Eutheria Supraòrdini: Euarchontoglires Òrdini: Primates Suttaòrdini: Haplorrhini Nfraòrdini: Simiiformes Suprafamigghia: Hominoidea Famigghia: Hylobatidae

Hylobatidae (Gray, 1870) sunnu na famigghia di primati di Hominoidea ca junci quattru gèniri : Hoolock, Symphalangus, Hylobates e Nomascus, cumprinnenti sìdici speci.

Nomu

Sta famigghia è canusciuta a liveḍḍu ntirnazziunali cu un nomu di urìggini malisiana, ca passau dû francisi e àppi comu risurtatu 'n talianu gibbone, 'n nglisi gibbon. Sicutannu sta linia, si vidi ca u talianu àvi a o chiusa, adunca 'n sicilianu avissi a èssiri gibbuni, ô plurali gibbuna.

Carattirìstichi

Sicuru a prima cosa chi si alluma quannu si talìa un Hylobatidae sunnu li vrazza longhi, ca ci pirmèttinu di aviri na vita arburìcula cumpleta. Sti vrazza pirmèttinu chiḍḍa ca si chiama brachiazzioni, un tipu di lucumuzzioni ntrê rami di l'àrbuli. Quannu sunnu 'n terra, stannu â dritta supra ê jammi senza usari i vrazza.

N'autra carattirìstica di stu gruppu di signi è ca nun stannu nta branchi ma nta cucchi stàbbili a furmari rapporti monugàmici. Spissu, u màsculu e a fìmmina ànnu culuri e mpigna diversi.

I vucalizzi di sti signi sunnu assai tìpici e ponnu èssiri assai forti, puru grazzi ê sacchi chi ànnu certi speci ntâ gula.

Dieta

Hylobatidae sunnu viggitariani e màncianu frutta di purpa. Sulu quarchi vota ponnu agghiùnciri ô menù quarchi armaleḍḍu mmirtibbratu. Unu dî frutti cchiù struduti sunnu diversi speci di ficu.

Tassunumìa e evuluzzioni

Hylobatidae sunnu parenti cu Homo sapiens picchì sunnu dâ stissa suprafamigghia (Hominoidea). Sicunnu dati ginètici, Hylobatidae e Hominidae si sparteru agghiri 19,25 miliuna d'anni arrè.

Accamora si canùscinu 16 speci di sti primati:

• Famiglia Hylobatidae
  • Gèniri Hoolock
    • Hoolock hoolock
    • Hoolock leuconedys
  • Gèniri Hylobates
    • Hylobates abbotti
    • Hylobates agilis
    • Hylobates albibarbis
    • Hylobates funereus
    • Hylobates klossii
    • Hylobates lar
      • Hylobates lar carpenteri
      • Hylobates lar entelloides
      • Hylobates lar lar
      • Hylobates lar vestitus
      • Hylobates lar yunnanensis
    • Hylobates moloch
    • Hylobates muelleri
      • Hylobates muelleri abbotti
      • Hylobates muelleri funereus
      • Hylobates muelleri muelleri
    • Hylobates pileatus
  • Gèniri Nomascus
    • Nomascus concolor
      • Nomascus concolor concolor
      • Nomascus concolor furvogaster
      • Nomascus concolor jingdongensis
      • Nomascus concolor lu
    • Nomascus gabriellae
    • Nomascus hainanus
    • Nomascus leucogenys
    • Nomascus nasutus
    • Nomascus siki
  • Gèniri Symphalangus
    • Symphalangus syndactylus

Certi studiusi arricanùscinu macari a Nomascus annamensis comu na speci nova discritta ntô 2010.

Gèniri fòssili:

• Gèniri Bunopithecus
  • Bunopithecus sericus
• Gèniri Junzi
  • Junzi imperialis

Habitat e sarbamentu

Tutti i speci di sta famigghia càmpanu ntê furesti pluviali dû sud-est asiàticu, unni cc'è abbunnanzia di frutta, puru siḍḍu Symphalangus syndactylus si nùtrica macari di pàmpini mpaḍḍati ca po truvari ntê furesti cchiù auti di muntagna.

Tutti e 16 li speci sunnu cunzidirati amminazzati di scumpàriri. Nomascus hainanus, ca sta nta l'ìsula cinisa di Hainan, arrisurta a speci cchiù 'n pirìculu, cu sulu 17 esimplari ancora lìbbiri.